Edition
de C.L.F. Panckoucke (Paris 1847)
CAII JULII SOLINI,
DE MIRABILIBUS MUNDI
Hyperliens
par chapitres :
I II III IV V VI
VII VIII IX X XI XII XIII XIV XV XVI XVII XVIII XIX XX XXI XXII XXIII XXIV
XXV XXVI XXVII XXVIII XXIX XXX XXXI XXXII XXXIII XXXIV XXXV XXXVI XXXVII XXXVIII
XXXIX XL XLI XLII XLIII XLIV XLV XLVI XLVII XLVIII XLIX L LI LII LIII LIV LV LVI LVII
I. De origine urbis Romæ et temporibus
ejus, de diebus intercalaribus, de genitura hominis, et his quæ memorabilia in
hominibus fuere, de alectorio lapide.
Sunt, qui videri velint, Romæ
vocabulum ab Evandro primum datum, quum oppidum ibi offendisset, quod extructum
antea Valentiam dixerat juventus Latina: servataque significatione impositi
prius nominis, Romam Græce Valentiam nominatam: quam Arcades quoniam in excelsa
habitassent parte montis, derivatum deinceps ut tutissima urbium arces
vocarentur. Heraclidi placet, Troja capta quosdam ex Achivis in ea loca, ubi
nunc Roma est, devenisse per Tiberim, deinde suadente Rome, nobilissima
captivarum, quæ his comes erat, incensis navibus, posuisse sedes, instruxisse
mnia, et oppidum ab ea Romen vocavisse. Agathocles scribit Romen non captivam
fuisse, ut supradictum est; sed ab Ascanio natam, Æneæ neptem, appellationis
istius causam fuisse. Traditur etiam proprium Romæ nomen, et verum magis, quod
nunquam in vulgum venit, sed vetitum publicari, quandoquidem quo minus
enuntiaretur, cerimoniarum arcana sanxerunt, ut hoc pacto noticiam eius aboleret
fides placite taciturnitatis. Denique Valerius Soranus, quod contra interdictum
id eloqui ausus foret; ob meritum profanæ vocis neci datum. Inter antiquissimas
sane religiones sacellum colitur Angeronæ, cui sacrificatur ante diem duodecimum
kalendarum januariarum: quæ diva præsul silentii istius prænexo obsignatoque ore
simulachrum habet.
De temporibus Urbis conditæ ambiguitatum quæstiones
excitavit, quod quædam ibi multo ante Romulum culta sint. Quippe ante aram
Hercules, quam voverat, si amissas boves reperisset, punito Caco, Patri
Inventori dicavit. Qui Cacus habitavit locum, cui Salinæ nomen est, ubi
Trigemina nunc porta. Hic ut Gellius tradit, quum ab Tarchone Tyrreno, ad quem
legatus venerat missu Marsyæ regis, socio Megale Phryge, custodiæ foret datus,
frustratus vincula, et unde venerat redux, præsidiis amplioribus occupato circa
Vulternum et Campaniam regno, dum attrectat etiam quæ concesserant in Arcadum
jura, duce Hercule, qui tunc forte aderat, oppressus est. Megalen Sabini
receperunt, disciplinam augurandi ab eo docti.
Suo quoque numini idem
Hercules instituit aram, quæ Maxima apud pontifices habetur, quum se ex
Nicostrata, Evandri matre, quæ a vaticinio Carmentis dicta est, immortalem
comperisset fore: conseptum etiam intra quod ritus sacrorum, factis bovicidiis,
docuit Potitios. Hoc sacellum Herculi in boario foro est, in quo argumenta et
convivii et majestatis ipsius remanent: nam divinitus illo neque canibus neque
muscis ingressus est. Et enim cum viscerationem sacricolis daret, Myagrum deum
dicitur imprecatus; clavam vero in aditu reliquisse, cuius olfactum refugerent
canes; id usque nunc durat.
Aedem etiam quæ Saturni ærarium fertur,
comites ejus condiderunt in honorem Saturni, quem cultorem regionis illius
cognoverunt extitisse. Iidem et montem Capitolinum Saturnium nominaverunt.
Castelli quoque, quod excitaverant, portam Saturniam apellaverunt, quæ postmodum
Pandana vocitata est. Pars infima et Capitolini montis habitaculum Carmenti
fuit, ubi et Carmentis nunc fanum est, a qua Carmentali portæ nomen datum est.
Palatinum nemo dubitaverit, quin Arcades habeat auctores, a quibus primum
Pallanteum oppidum: quod aliquandiu Aborigines habitatum, propter incomodum
vicinæ paludis, quam præterfluens Tiberis fecerat, profecti Reate, postmodum
reliquerunt. Sunt, qui velint a balatibus ovium mutata littera, vel a Pale
pastorali dea, aut, ut Silenus probat, a Palantho Hyperborei filia, quam
Hercules ibi compresisse visus est, nomen monti adaptatum. Sed quamquam ista sic
congruant palam est, prospero illi augurio deberi Romani nominis gloriam, maxime
quum annorum ratio faciat cardinem veritati: nam ut affirmat Varro, auctor
diligentissimus, Romam condidit Romulus, Marte genitus et Rhea Silvia: vel, ut
nonnulli, Marte et Ilia: dictaque est primum Roma Quadrata, quod ad æquilibrium
foret posita.
Ea incipit a silva, quæ est in area Apollinis, et ad
supercilium scalarum Caci habet terminum, ubi tugurium fuit Faustuli. Ibi
Romulus mansitavit qui auspicato murorum fundamenta jecit duodeviginti natus
annos, undecimo kalendas maias, hora post secundam ante tertiam plenam: sicut
Lucius Tarruntius prodidit, mathematicorum nobilissimus, Jove in piscibus,
Saturno, Venere, Marte, Mercurio in Scorpione, Sole in Tauro, Luna in Libra
constitutis. Et observatum deinceps, ne qua hostia Parilibus cæderetur, ut dies
ista a sanguine purus esset, cujus significationem de partu Iliæ tractam volunt.
Idem Romulus regnavit annos septem et triginta. De Cæninensibus egit primum
triumphum, et Acroni regi eorum detraxit spolia, qua Jovi Feretrio primus
suspendit, et opima dixit. Rursum de Antemnatibus triumphavit. De Veientibus
tertio. Apud Capreæ paludem nonis quintilibus apparere desiit. Ceteri reges
quibus locis habitaverunt, dicemus. Tatius in arce, ubi nunc est ædes Junonis
Monetæ: qui anno quinto, postquam ingressus Urbem fuerat, a Laurentibus
interemptus, septima et vicesima olympiade hominem exivit. Numa in colle primum
Quirinali. Deinde propter ædem Vestæ in Regia, quæ adhuc ita appellatur: qui
regnavit annis tribus et quadraginta, sepultus sub Janiculo. Tullus Hostilius in
Velia, ubi postea deum Penatium ædes facta est: qui regnavit annos duos et
triginta, obiit olympiade quinta et tricesima. Ancus Martius, in summa Sacra
via, ubi ædes Larum est: qui regnavit annos quatuor et viginti, obiit olympiade
prima et quadragesima. Tarquinius Priscus ad Mugoniam portam supra summam Novam
viam: qui regnavit annos septem et triginta. Servius Tullius Esquiliis supra
clivum Urbium: qui regnavit annos duos et quadraginta. Tarquinius Superbus, et
ipse Esquiliis supra clivum Pullium ad Fagutalem lacum: qui regnavit annos
quinque et viginti.
Cincio Romam duodecima olympiade placet conditam;
Pictori octava; Nepoti et Lutatio, opinionem Erathostenis et Appollodori
comprobantibus, olympiadis septimæ anno secundo: Pomponio Attico et M. Tullio
olympiadis sextæ anno tertio. Collatis igitur nostris et Græcorum temporibus,
invenimus, incipiente olympiade septima Romam conditam, anno post Ilium captum
quadringentesimo tricesimo tertio. Quippe certamen Olympicum, quod Hercules in
honorem atavi materni Pelopis ediderat, intermissum Iphitus Eleus instauravit,
post excidium Trojæ, anno quadringentesimo ocatavo. Ergo ab Iphito numeratur
olympias prima. Ita sex mediis olympiadibus interjectis, quibus singulis anni
quaterni imputantur cum septima cptante, Roma condita sit, inter exortum Urbis
et Trojam captam, jure esse annos quadringentos et triginta tres constat. Huic
argumento illud accedit, qui cum Caius Pompeius Gallus et Quintus Verannius
Urbis conditæ anno octingentesimo primo fuerint consules, consulatu eorum
olympias septima et ducentesima actis publicis annotata est. Quarter ergo
multiplicatis sex et ducentis olympiadibus erunt anni octingenti viginti
quatuor, quibus de septimæ olympiade annectendus primus annus est, ut in solido
colligantur octingenti viginti quinque. Ex qua summa detractis viginti annos, et
quatuor olympiadum retro sex, manifeste anni octingenti et unus reliqui fient.
Quapropter cum octingentesimo primo anno Urbis conditæ ducentesima septima
olympias computetur, par est Romam septimæ olympiadis anno primo credi conditam.
In qua regnatum est annis ducentis quadraginta tribus.
Decemviri creati
anno trecentesimo secundo. Primum Punicum bellum anno quadringentesimo
octogesimo nono. Secundum quingentesimo tricesimo quinto. Tertium sexcentesimo
quarto. Sociale sexcentesimo sexagesimo secundo. Ad Hircium et Caium Pansam
consules anni septingenti et decem: quorum consulatu Cæsar Augustus est consul
creatus, octavum decimum annum agens: qui principatum ita ingressus est, ut
vigilantia illius uon modo securum, verum etiam tutum imperium esset. Quod
tempus ferme solum repertum est, quo plurimum et arma cessaverint, et ingenia
floruerint, scilicet ne inerti justitio languerent virtutis opera, bellis
quiescentibus.
Tunc ergo primum cursus anni perspecta ratio est, quæ a
rerum origine profunda caligine tegebatur. Nam ante Augustum Cæsarem incerto
modo annum computabant, qui apud Ægyptios quatuor mensibus terminabatur, apud
Arcadas tribus, apud Acarnanas sex, in Italia apud Lavinios tredecim, quorum
annus trecentis septuaginta et quatuor diebus ferebatur. Romani initio annum
decem mensibus computaverunt, a Martio auspicantes, adeo ut ejus die prima de
annis vestalibus ignes accenderent, mutarent veteribus virides laureas, senatus
et populus comitia agerent, matronæ servis suis cnas ponerent, sicuti
Saturnalibus domini: illæ, ut per honores promptius obsequium provocarent; hi
quasi gratiam repensarent perfecti laboris: maximeque hunc mensem principem
testatur fuisse, quod qui ab hoc quintus erat, quintilis dictus est, deinde
numero decurrente, december solemnem circuitum finiebat intra diem trecentesimum
quartum: tunc enim iste munerus explebat annum, ita ut sex menses tricenum
dierum essent, quatuor reliqui tricenis et singulis expedirentur. Sed quum ratio
illa ante Numam a luna cursu discreparet, lunari computatione annum peræquarunt,
quinquaginta et uno die auctis. Ut ergo perficerent duodecim menses, de sex
mensibus superioribus detraxerunt dies singulos, eosque quinquaginta istis et
uno diebus adnexuerunt, factique quinquaginta septem divisi sunt in duos menses,
quorum alter novem et viginti, alter octo et viginti dies detinebant. Sic annus
habere quinque atque quinquaginta et trecentos dies cpit. Postmodum, quum
perspicerent, temere annum clausum intra dies, quos supra diximus, quandoquidem
appareret, solis meatum non ante trecentesimum sexagesimum quintum diem,
abundante insuper quadrantis particula, zodiacum conficere decursum; quadrantem
illum et decem dies addiderunt, ut ad liquidum annus trecentis diebus sexaginta
quinque et quadrante constaret, hortante observatione imparis numeri, quem
Pythagoras monuit præponi in omnibus oportere. Unde propter dies impares, diis
superis et januarius dicatur et martius: propter pares februarius, quasi
ominosus, diis inferis deputatur. Quum itaque hæc definitio toto orbe
placuisset, custodiendi quadrantis gratia, a diversis gentibus varie
intercalabatur, nec unquam tamen ad liquidum fiebat temporum peræquatio. Græci
ergo singulis annis undecim dies et quadrantem detrahebant, eosque octies
multiplicatos in anno nonum reservabant, ut contractus nonagenarius numerus in
tres menses per tricenos dies scinderetur: qui anno nono restituti efficiebant
dies quadringentos quadraginta quatuor, quos embolimos, vel hyperballontas
nominabant.
Quod quum in initio Romani probassent, contemplatione
parilis numeri offensi neglectum brevi perdiderunt, translata in sacerdotes
intercalandi potestate: qui plerumque gratificantes rationibus publicanorum, pro
libidine sua subtrahebant tempora, vel augebant. Quum hæc sic forent constituta,
modusque intercalandi interdum cumulatior, interdum fieret imminutior, vel
omnino dissimulatus præteriretur, nonnunquam accidebat ut menses qui fuerant
transacti hieme, modo æstivum, modo autumnale tempus inciderent. Itaque Cæsar
universam hanc inconstantiam, incisa temporum turbatione, composuit, et, ut
statum certum præteritus error acciperet, dies viginti et unum et quadrantem
simul intercalavit: quo pacto regradati menses, de cetero statuta ordinis sui
tempora detinerent. Ille ergo annus solus trecentos quatuor et quadraginta dies
habuit: alii deinceps trecentenos sexagenos quinos et quadrantem, et tunc quoque
vitium admissum est per sacerdotes. Nam quum præceptum esset, anno quarto ut
intercalarent unum diem, et oporteret confecto quarto anno id observari ante
quam quintus auspicaretur, illi incipiente quarto intercalarunt, non desinente.
Sic per annos sex et triginta quum novem dies tantummodo sufficere debuissent,
duodecim sunt intercalati. Quod reprehensum Augustus reformavit, jussitque annos
duodecim sine intercalatione decurrere, ut tres illi dies, qui ultra novem
necessarios temere fuerant intercalati, hoc modo possent repensari. Ex qua
disciplina omnium postea temporum fundata ratio est.
Verum quum hoc, et
multa alia Augusti temporibus debeantur, qui pæne sine exemplo rerum potitus
est, tanta et tot in vita ejus inveniuntur adversa, ut non sit facile
discernere, calamitosior an beatior fuerit. Primum, quod apud avunculum in
petitione magisterii equitum prælatus est ei Lepidus tribunus, cum quadam
auspicantium cptorum nota; mox triumviratus collegium præ gravi potestate
Antonii; Philippensis inde proscriptionis invidia; abdicatio Postumi Agrippæ
post adoptionem; deinde desiderio ejus insignis pnitentia; naufragia Sicula;
turpis ibi in spelunca occultatio; seditiones militum plurimæ; Perusina cura;
detectum filiæ adulterium, et voluntas parricidalis; nec minore dedecore neptis
infamia; incusatæ mortes filiorum: et amissis liberis non solus orbitatis dolor;
Urbis pestilentia, fames Italiæ, bellum Illyricum, angustiæ rei militaris,
corpus morbidum, contumeliosa dissensio privigni Neronis, uxoris etiam et
Tiberii cogitationes parum fidæ, atque in hunc modum plura. Hujus tamen suprema
quasi lugeret seculum, penuria insequuta est frugum omnium; ac ne fortuitum,
quod acciderat, videretur, imminentia mala non dubiis signis apparuerunt: nam
Fausta quædam ex plebe, partu uno edidit quatuor geminos, mares duos, totidemque
feminas, monstruosa fecunditate portendens futura calamitatis indicium: quamvis
Trogus auctor affirmet in Ægypto septenos uno utero simul gigni: quod ibi minus
mirum, quum ftifero potu Nilus, non tantum terrarum, sed etiam hominum, materna
fecundet arva. Legimus Cnæum Pompeium Eutychidem feminam Asia exhibitam, quam
constabat tricies enixam, quum viginti ejus liberis in theatro suo publicasse.
Unde competens hoc loco duco super hominis generatione tractare.
Etenim
quum de animalibus, quæ digna dictu videbuntur, prout patria cujusque admonebit,
simus notaturi, jure ab eo potissimum ordiemur, quod rerum natura sensus
judicio, et rationis capacitate præposuit omnibus. Itaque, ut Democritus
physicus ostendit, mulier solum animal menstruale est, cujus profluvia non
parvis spectata documentis, inter monstrifica merito numerantur. Contactæ his
fruges non germinabunt, acescent musta, morientur herbæ, amittent arbores ftus,
ferrum rubigo corripiet, nigrescent æra. Si quid canes inde ederint, in rabiem
efferabuntur nocituri morsibus, quibus lymphaticos faciunt. Parva hæc sunt:
bitumen in Judæa Asphaltites gignit lacus, adeo lentum mollitie glutinosa, ut a
se nequeat separari: enimvero si abrumpere partem velis, universitas sequetur:
scindique non potest, quoniam in quantum ducatur, extenditur; sed ubi admota
fuerint cruore illo polluta fila, sponte dispergitur, et applicita tabe
diducitur paulo ante corpus unum, fitque de tenacitate connexa contagione
partitio repentina. Habet plane illud in se solum salutare, quod avertit sidus
Helenæ perniciosissimum navigantibus. Ceterum ipsæ feminæ, quibus munus est
necessitatis hujusmodi, quamdiu sunt in sua lege, non innocentibus oculis
contuentur; aspectu specula vitiant, ita ut hebetetur visu fulgor offensus, et
solitam æmulationem vultus exstinctu splendor amittat, faciesque obtusi nitoris
quadam caligine nubiletur.
Mulierum aliæ in æternum steriles sunt; aliæ
mutatis conjugiis exuunt sterilitatem. Nonnullæ tantum semel pariunt; quædam aut
feminas, aut mares semper. Post annum quinquagesimum fecunditas omnium
conquiescit; nam in annum octogesimum viri generant, sicuti Masinissa rex
Mathumannum filium octogesimum et sextum annum agens genuit. Cato octogesimo
exacto, ex filia Salonii clientis sui avum Uticensis Catonis procreavit.
Compertum et illud est, quod inter duos conceptus quum intercessit paululum
temporis, uterque residet, sicut in Hercule et Iphicle apparuit, fratre ejus,
qui gestati eodem onere, intervallis tamen, quibus concepti fuerant, nati
videntur. Et de Proconensi ancilla, quæ e duplici adulterio geminos edidit,
utrumque patri suo similem. Hic Iphicles Iolaum creat, qui Sardiniam ingressus,
palantes incolarum animos ad concordiam eblanditus, Olbiam, atque alia Græca
oppida exstruxit. Iolenses ab eo dicti, sepulcro ejus templum addiderunt, quod
imitatus virtutem patrui, malis plurimis Sardiniam liberasset.
Ante
omnia sobolem cogitantibus sternutatio post coitus cavenda, ne prius semen
excutiat impulsus repentinus, quam penetralibus se matris insinuet humor
paternus. Quod si naturalis materia hæserit, decimus a conceptu dies dolore
gravidas admonebit. Jam inde incipiet et capitis inquietudo, et caligine visus
hebetabitur. Ciborum quoque fastidiis stomachi claudetur cupido.
Convenit inter omnes, corda primum ex universa formari carne, eaque in
diem quintum et sexagesimum crescere, dein minui; ex ossibus spinas. Ea propter
capital est, si pars alterutra noceatur. Plane si corpusculum in marem
figuretur, melior est color gravidis, et pronior partitudo uteri; denique a
quadragesimo dic motus. Alter sexus nonagesimo primum die palpitat. Et concepta
femina gestantis vultum pallore inficit: crura quoque præpedit languida
tarditate. In utroque sexu quum capilli germinant, incommodum majus est: fitque
pleniluniis auctior agritudo, quod tempus etiam editis semper nocet. Quum
salsiores escas edit gravida, unguiculis caret partus. At quum prope ad uterum
liberandum venerint momenta maturitatis, enitenti spiritum retinere plurimum
congruit, quandoquidem letali mora oscitatio suspendit puerperia. Contra naturam
est, in pedes procedere nascentes: quapropter velut ægre parti appellantur
Agrippæ. Ita editi minus prospere vivunt, et de vita ævo brevi cedunt. Denique
in uno Marco Agrippa felicitatis exemplum est, nec tamen usque eo inoffensæ, ut
non plura adversa pertulerit, quam secunda: nam et misera pedum valetudine, et
aperto conjugis adulterio, et aliquot infelicitatis notis præposteri ortus omen
luit.
Feminis perinde est infausta nativitas, si concretum virginal
fuerit, quo pacto genitalia fuere Corneliæ, quæ editis Gracchis ostentum hoc
piavit sinistro exitu liberorum. Rursum, necatis matribus, natus est
auspicatior, sicut Scipio Africanus prior, qui defuncta parente, quod excisus
utero in diem venerat, primus Romanorum: Cæsar dictus est. E geminis, si
remanente altero, alter abortivo fluxu exciderit, alter, qui legitime natus est,
Vopiscus nominatur. Quidam et cum dentibus procreantur, ut Cnæus Papirius Carbo,
et M. Curius, Dentatus ob id cognominatus. Quidam vice dentium continui ossis
armantur soliditate, qualem filium Bithynorum rex Prusias habuit. Ipsum dentium
numerum discernit qualitas sexus, quum in viris plures sint, in feminis
pauciores. Quos kunñdontaw vocant, quibus gemini
procedunt ab dextera parte, fortunæ blandimenta promittunt: quibus ab læva,
versa vice.
Nascentium vox prima vagitus est: lætitiæ enim sensus
differtur in quadragesimum diem. Itaque unum novimus, eadem hora risisse, qua
erat natus, scilicet Zoroastrem, mox optimarum artium peritissimum. At Crassus
avus ejus, quem rapuerunt bella Parthica, quod nunquam riserit, Agelastus
cognominabatur. Inter alia Socratis magna, præclarum illud est, quod in eodem
vultus tenore etiam adversis interpellantibus perstitit. Heraclitus et Diogenes
Cynicus nihil unquam de rigore animi remiserunt, calcatisque turbinibus
fortuitorum, adversum omnem dolorem vel misericordiam uniformi duravere
proposito. Pomponium ptam consularem virum nunquam ructasse, habetur inter
exempla. Antoniam Drusi non spuisse, percelebre est. Nonnullos nasci accepimus
concretis ossibus, eosque neque sudare, neque consuesse sitire, qualis
Syracusanus Lygdamis fertur, qui tertia et tricesima olympiade primus ex
Olympico certamine pancratii coronam reportavit; cujusque ossa deprehensa sunt
medullam non habere.
Maximam virium substantiam nervos facere
certissimum est, quantoque fuerint densiores, tanta propensius angescere
firmitatem. Varro, in relatione prodigiosæ fortitudinis, annotavit Trittannum
gladiatorem natura Samnitem fuisse, qui, et rectis et transversis nervis, non
modo crate pectoris, sed et manibus cancellatis, et brachiis, omnes adversarios
levi tactu, pæne securis congressionibus vicerit. Ejus filium, militem Cnæi
Pompeii pari modo natum, ita sprevisse hostem provocantem, ut inermi eum dextra
et superaret, et captum digito uno in castra imperatoris sui reportaret. Milonem
quoque Crotoniensem egisse omnia, supra quam homo valet. Etiam hoc proditur,
quod ictu nudæ manus taurum fecit victimam: eumque solidum, qua mactaverat die,
absumpsit solus non gravatim. Super hoc nihil dubium: nam factum elogium exstat.
Victor ille omnium certaminum quæ obivit, alectoria usus traditur, qui
lapis specie crystallina, fabæ modo, in gallinaceorum ventriculis invenitur,
aptus, ut dicunt, prliantibus. Milon porro Tarquinii Prisci temporibus emicuit.
Jam vero qui deflexum animum referat ad similitudinum causas, quantum
artificis naturæ ingenium deprehendet! Interdum enim ad genus spectant, et per
sobolem in familias transitus faciunt: sicut plerumque parvuli modo nævos, modo
cicatrices, modo qualescumque originis suæ notas ferunt: ut in Lepidis, quorum
tres, intervulsa tamen serie, ex eadem domo, obducto membrana oculo, similes
geniti reperiuntur: vel in Byzantino nobili pugile, qui, quum matrem haberet
adulterio ex Æthiope conceptam, quæ nihil patri comparandum reddidisset, ipse
Æthiopem avum regeneravit. Sed hoc minus mirum, si respiciamus ad ea, quæ
spectata sunt inter externos. Regem Antiochum Artemon quidam e plebe Syriatica
sic facie æmula mentiebatur, ut postmodum Laodice uxor regia, objecto populari
isto, tamdiu dissimulaverit defunctum maritum, quoad ex arbitratu ejus regni
successor ordinaretur. Inter Cnæum Pompeium et Cn. Vibium, humili loco natum,
tantus error exstitit de paribus lineamentis, ut Romani Vibium Pompeii nomine,
Pompeium Vibii vocabulo cognominarent. Oratorem Lucium Plancum Rubrius histrio
sic implevit, ut et ipse Plancus a populo vocaretur. Armentarius myrmillo, et
Cassius Severus orator, ita se mutuo reddiderunt, ut, si quando pariter
viderentur, dignosci non possent, nisi discrepantiam habitus indicaret. Marcus
Messalla censorius et Menogenes, e face vulgari, hoc fuerunt uterque, quod
singuli, nec alium Messallam quam Menogenem, nec Menogenem alium quam Messallam
putaverunt. Piscator ex Sicilia, proconsuli Suræ præter alia etiam rictu oris
comparabatur: ita in eadem vocis impedimenta, et tardatæ sonum lingua
naturalibus offendiculis congruebant. Interdum non modo inter externos, sed
etiam inter conductos ex diversissima Parte orbis miraculo indiscreti vultus
fuere. Denique quum Antonio jam triumviro Thoranius quidam eximios forma pueros,
velut geminos, trecentis sestertiis vendidisset, quorum alterum de Transalpina
Gallia, alterum ex Asia comparaverat, adeoque una res viderentur, ut solus sermo
fidem panderet, atque ideo inrisum se Antonius gravaretur, non infacete
Thoranius, id vel præcipue, quod emptor criminabatur, pretiosius probavit: neque
enim mirum, si forent pares gemini: illud nullis posse taxationibus æstimari,
quod tantis spatiis diversitas separata, plus quam geminos atulisset. Quo
responso adeo Antonius mitigatus est, ut deinceps nihil se habere carius in
substantia jactitaret.
Nunc si de ipsis hominum formis requiramus,
liquido manifestabitur, nihil de se antiquitatem mendaciter prædicasse, sed
corruptam degeneri successione sobolem nostri temporis per nascentium detrimenta
decus veteris proceritudinis perdidisse. Licet ergo plerique definiant, nullum
posse excedere longitudinem pedum septem, quod intra mensuram istam Hercules
fuerit, deprehensum tamen est Romanis temporibus sub divo Augusto, Pusionem et
Secundillam denos pedes et amplius habuisse proceritatis, quorum reliquiæ adhuc
in conditorio Sallustianorum videntur: postmodum, divo Claudio principe.
Gabbaram nomine, ex Arabia advectum, novem pedum et totidem unciarum. Sed ante
Augustum annis mille ferme non apparuit forma hujusmodi, sicut nec post Claudium
visa est. Quis enim jam ævo isto non minor parentibus suis nascitur? Priscorum
autem testantur molem etiam Orestis suprema, cujus ossa olympiade quinquagesima
et octava Tegea inventa a Spartanis oraculo monitis, discimus implesse
longitudinem cubitorum septem. Scripta quoque, quæ ex antiquitate memorias
accersunt in fidem veri, hoc etiam receperunt, quod bello Cretico, quum elata
flumina plus quam vi amnica terras copissent, post discessum fluctuum inter
plurima humi discidia humanum corpus repertum sit cubitum trium atque triginta:
cujus inspectandi cupidine L. Flaccum legatum, Metellum etiam ipsam impendio
captos miraculo, quod auditu refutaverant, oculis potitos. Non omiserim Salamine
Euthymenis filium crevisse in triennio tria cubita sublimitatis, sed incessu
tardum, sensu hebetem, robusta voce, pubertate festina, statimque obsessum
morbis plurimis, immoderatis ægritudinum suppliciis compensasse præcipitem
incrementi celeritatem. Mensuræ ratio bifariam convenit: nam quantus manibus
expansis inter digitos longissimus modus est, tantum constat esse inter calces
et verticem, Ideoque physici hominem minorem mundum judicaverunt. Parti dextera
habilior adscribitur modus, lævæ firmitas major: unde altera gesticulationibus
promptior est, altera oneri ferendo accommodatior. Pudoris disciplinam etiam
inter defuncta corpora natura discrevit: ac si quando cadavera necatorum
fluctibus evehuntur, virorum supina, prona fluitant feminarum.
Verum ut
ad pernicitatis titulum transeamus, primam palmam velocitatis Ladas quidam
adeptus est, qui ita supra cavum pulverem cursitavit, ut in arenis pendentibus
nulla indicia relinqueret vestigiorum. Polymnestor Milesius puer, quum a matre
locatus esset ad caprarios pastus, ludicro leporem consequutus est, et ob id
statim productus a gregis domino, olympiade sexta et quadragesima, ut Bocchus
auctor est, victor in stadio meruit coronam. Philippides biduo mille ducenta
quadraginta stadia ab Athenis Lacedæmonem decucurrit. Anystis Lacon, et
Philonides, Alexandri Magni cursores, Elin ab usque Sicyone mille ducenta stadia
uno die transierunt. Fonteio Vipsanioque consulibus, in Italia novem annos puer
natus, quinque et septuaginta millia passuum a meridie transivit ad vesperum.
Visu deinde plurimum potuit Strabo nomine, quem perspexisse per centum
quinque et triginta millia passuum, Varro significat, solitumque exeunte e
Carthagine classe Punica numerum navium manifestissime ex Lilybetana specula
nolare. Cicero tradit Iliadum Homeri ita subtiliter in membranis scriptam, ut
testa nucis clauderetur. Callicrates formicas ex ebore sic scalpsit, ut portio
earum a ceteris secerni nequiverit. Apollonides perhibet, in Scythia feminas
nasci, quæ bityæ vocantur, eas in oculis pupillas geminas habere, et perimere
visu, si forte quem iratæ aspexerint.
Prævaluisse fortitudine apud
Romanos L. Sicinium Dentatum, titulorum numerus ostendit. Tribunus hic plebi
fuit non multo post exactos reges, Spurio Tarpeio, A. Haterio, consulibus. Idem
ex provocatione octies victor, quadraginta et quinque adversas habuit
cicatrices, in tergo nullam notam: et spolia ex hoste tricies et quater cepit.
In phaleris, hastis puris, armillis, coronis, trecenta duodecim dona meruit:
novem imperatores, qui opera ejus vicerant, triumphantes prosequutus. Post hunc
Marcus Sergius duobus stipendiis primis adverso corpore ter et vicies
vulneratus: secundo stipendio in prlio dextram perdidit. Qua de causa postea
sibi manum ferream fecit: et quum neutra pæne idonea ad prliandum valeret, una
die quater pugnavit, et vicit sinistra, duobus equis eo insidente confossis. Ab
Hannibale bis captus refugit, quum viginti mensibus, quibus captivitatis sortem
perferebat, nullo momento sine compedibus fuerit et catenis. Omnibus asperrimis
prliis, quæ tempestate illa Romani experti sunt, insignitus donis militaribus,
a Thrasymeno, Trebia, Ticinoque coronas civicas retulit: Cannensi quoque prlio,
de quo refugisse eximium opus virtutis fuit, solus accepit coronam. Beatus
profecto tot suffragiis gloriarum, nisi heres in posteritatis ejus successione
Catilina tantas adoreas odio damnati nominis obumbrasset! Quantum inter milites
Sicinius, aut Sergius, tantum inter duces, immo, ut verius dicam, inter omnes
homines, Cæsar dictator enituit. Hujus ductibus undecies centum triginta et duo
millia cæsa sunt hostium: nam quantum bellis civilibus fuderit, noluit annotari.
Signi, collatis quinquagies et bis dimicavit: M. Marcellum solus supergressus,
qui novies et tricies pari modo fuerat prliatus. Ad hæc nullus celerius
scripsit: nemo velocius legit. Quaternas etiam epistolas perhibetur simul
dictasse. Benignitate adeo præditus, ut quos armis subegerat, clementia magis
vicerit.
Cyrus memoriæ bono inclaruit, qui in exercitu, cui
numerosissimo præfuit, nominatim singulos alloquebatur. Fecit hoc idem in populo
Romano L. Scipio. Sed et Cyrum et Scipionem consuetudine credamus profecisse.
Cineas Pyrrhi legatus, postero die quam ingressus Romam fuerat, et equestrem
ordinem et senatum propriis nominibus salutavit. Rex Ponticus Mithridates duabus
et viginti gentibus, quibus imperitabat, sine interprete jura dixit. Memoriam et
arte fieri palam factum est, sicut Metrodorus philosophus, qui temporibus
Diogenis Cynici fuit, in tantum se meditatione assidua provexit, ut a multis
simul dicta, non modo sensuum, sed etiam verborum ordinibus detineret. Nihil
tamen in homine aut metu, aut casu, aut morbo facilius intercipi, sæpe
perspectum est. Qui lapide ictus fuerat, accepimus oblitum litterarum. Messallam
certe Corvinum post ægritudinem, quam pertulerat, percussum proprii nominis
oblivione, quamlibet alias ei sensus vigeret. Memoriam metus perimit: invicem
vocis interdum est incitamentum, quam non solum acuit, sed etiam, si nunquam
fuerit, extorquet. Denique cum olympiade octava et quinquagesima victor Cyrus
intrasset Sardis Asiæ oppidum, ubi tunc Cresus latebat, Atys filius regis, mutus
ad id locorum, in vocem erupit vi timoris: exclamasse enim dicitur: " Parce
patri meo, Cyre, et hominem te esse vel casibus disce nostris! "
Tractare de moribus superest, quorum excellentia maxime in duobus
enituit. Cato princeps Porciæ gentis, senator optimus, imperator optimus,
optimus orator, causam tamen quadragies et quater dixit, diversis odiorum
simultatibus appetitus, semper absolutus. Unde Scipionis Æmiliani laus
propensior, qui præter bona, quibus Cato clarus fuit, etiam publico amore
præcessit. Vir optimus Nasica Scipio judicatus est, non privato tantum
testimonio, sed totius senatus sacramento: quippe quod inventus dignior non
fuit, cui præcipuæ religionis crederetur ministerium, quum oraculum moneret
arcessi sacra deum Matris Pessinunte.
Plurimi inter Romanos eloquentia
floruerunt; sed hoc bonum hereditarium nunquam fuit, nisi in familia Curionum;
in qua tres serie continua oratores fuere. Magnum hoc habitum est sane eo
seculo, quo facundiam præcipue et humana et divina mirata sunt: quippe tunc
percussores Archilochi ptæ Apollo prodidit, et latronum facinus deo coarguente
detectum. Quumque Lysandcr Lacedæmonius Athenas obsideret, ubi Sophoclis tragici
inhumatum corpus jacebat, identidem Liber pater ducem monuit per quietem,
sepeliri delicias suas sineret: nec prius destitit, quam Lysander cognito qui
obisset diem, et quid a numine posceretur, inducias bello daret, usque dum
congruæ supremis talibus exsequiæ ducerentur. Pindarum lyricum e convivii loco,
cui imminebat ruina, ne cum ceteris interiret, forinsecus Castor et Pollux
vocarunt, inspectantibus universis: quo effectum, ut solus impendens periculum
evaderet.
Numerandus post deos Cn. Pompeius Magnus, intraturus Posidonii
domum, clarissimi tunc sapientiæ professoris, percuti ex more a lictore fores
vetuit, submissisque fascibus, quamlibet confecto Mithridatico bello, et
orientis victor, sententia propria cessit januæ litterarum. Africanus prior
Quinti Ennii statuam imponi sepulcro suo jussit. Uticensis Cato unum cx
tribunatu militum philosophum, alium ex Cypria legatione Romam advexit,
professus, plurimum se eo facto senatui et populo contulisse, quamlibet proavus
ejus sæpissime censuisset Græcos Urbe pellendos. Dionysius tyrannus vittatam
navem Platoni obviam misit; ipse, cum albis quadrigis egredientem in littore
occurrens honoratus est.
Perfectam prudentiam soli Socrati oraculum
Delphicum adjudicavit. Pietatis documentum nobilius quidem in Metellorum domo
refulsit, sed eminentissimum in plebeia puerpera reperitur. Humilis hæc, atque
ideo famæ obscurioris, quum ad patrem, qui supplicii causa claustris pnalibus
continebatur, ægre obtinuissct ingressus, exquisita sæpius a janitoribus, ne
forte parenti cibum subministraret, alere eum uberibus suis deprehensa est: quæ
res et locum et factum consecravit: nam qui morti destinabatur, donatus filiæ,
in memoriam tanti præconii, reservatus est: locus dicatus suo numini, Pietatis
sacellum est. Navis a Phrygia gerula sacrorum, dum sequitur vittas castitatis,
contulit Claudiæ principatum pudicitiæ. At Sulpitia Paterculi filia, M. Fulvii
Flacci uxor, censura omnium matronarum e centum probatissimis haud temere
dilecta est, quæ simulacrum Veneris, ut Sibyllini libri monebant, dedicaret.
Quod attinet ad titulum felicitatis, necdum repertus est, qui felix censeri jure
debuerit: namque Cornelius Sulla dictus potius est, quam fuit Felix. Solum certe
beatum cortina Aglaum judicavit, qui in angustissimo Arcadiæ angulo pauperis
soli dominus, nunquam egressus paterni cespitis terminos invenitur.
II. De Italia. In ea de boa angue, de lupis, de lyncibus, de
lyncurio alpide, de lapide curalio, de gemma sytite, de gejentana gemma, de
mutis cicadis, de Diomedis avibus.
De homine satis dictum habeo.
Nunc, ut ad destinatum revertamur, ad locorum commemorationem stilus dirigendus
est, atque adeo principaliter in Italiam,cujus decus jam in Urbe contigimus. Sed
Italia tanta cura omnibus dicta, præcipue M. Catoni, ut jam inveniri non possit,
quod non veterum auctorum præsumpserit diligentia, largiter in laudem
excellentis terra materia suppetente, dum scriptores præstantissimi reputant
locorum salubritatem, cli temperiem, ubertatem soli, aprica collium, opaca
nemorum, innoxios saltus, vitium olearumque proventus, nobilia pecuaria, tot
amnes, lacus tantos, bifera violaria, inter hæc Vesuvium flagrantis animæ
spiritu vaporantem, tepentes fontibus Baias, colonias tam frequentes, tam
assiduam novarum urbium gratiam, tam clarum decus veterum oppidorum, quæ primum
Aborigines, Aurunci, Pelasgi, Arcades, Siculi, totius postremo Græciæ advenæ, et
in summa, victores Romani condiderunt: ad hæc laterum portuosa, orasque
patentibus gremiis commercio orbis accommodatas.
Verum ne prorsus
intacta videatur, in ea, quæ minus trita sunt, animum intendere haud absurdum
videtur, et parcius depavita levibus vestigiis inviare: nam quis ignorat vel
dicta, vel condita, a Jano Janiculum, a Saturno Latium, atque Saturniam, a Danæ
Ardeam, a comitibus Herculis Polieon, ab ipso in Campania Pompeios, quia victor
ex Hispania pompam boum duxerat? In Liguria quoque Lapidarios campos, quod ibi
eo dimicante. creduntur pluisse saxa: regionem Ionicam ab Ione Naulochi filia,
quam procaciter, insidentem vias Hercules, ut ferunt, interemit: Archippen a
Marsya rege Lydorum, quod hiatu terræ haustum, dissolutum est in lacum Fucinum;
ab Iasone templum Junonis Argivæ; a Pelopidis Pisas; a Cleolao, Minois filio,
Daunios; Iapygas a Iapyge Dædali filio; Tyrrhenos a Tyrrheno Lydiæ rege; Coram a
Dardanis; Agyllam a Pelasgis, qui primi in Latium litteras intulerunt; ab Haleso
Argivo Phaliscam; a Phalerio Argivo Phalerios; Fescenninum quoque ab Argivis;
portum Parthenium a Phocensibus; Tibur, sicut Cato facit testimonium, a Catillo
Arcade præfecto classis Evandri; sicut Sextius ab Argiva juventute. Catillus
enim Amphiarai filius, post prodigialem patris apud Thebas interitum clei avi
jussu, cum omni ftu ver sacrum missus tres liberos in Italia procreavit,
Tiburtum, Coram, Catillum, qui depulsis ex oppido Siciliæ veteribus Sicanis, a
nomine Tiburti fratris natu maximi urbem vocaverunt. Mox in Bruttiis ab Ulyxe
exstructum templum Minervæ. Insula Ligea appellata ab ejecto ibi corpore sirenis
ita nominatæ; Parthenope a Parthenopæ sirenis sepulcro, quam Augustus postea
Neapolin esse maluit. Præneste, ut Zenodotus, a Præneste Ulyxis nepote Latini
filio; ut Prænestini sonant libri, a Cæculo, quem juxta ignes fortuitos
invenerunt, ut fama est, Digitorum sorores. Notum est, a Philocteta Petiliam
constitutam: Arpos et Beneventum a Diomede, Patavium ab Antenore, Metapontum a
Pyliis, Scyllaceum ab Atheniensibus, Sybarim a Trzeniis, et a Sagari Ajacis
Locri filio, Salentinos a Lyctiis, Anconam a Siculis, Gabios a Galato et Bio,
Siculis fratribus; ab Heraclidis Tarentum, insulam Tensam ab Ionibus, Pæstum a
Dorensibus: a Myscello Achæo Crotonam, Regium a Chalcidensibus, Cauloniam et
Terinam a Crotonirensibus, a Nariciis Locros, Heretum a Græcis in honorem Heræ
(sic enim Junonem Græci vocant); Ariciam ab Archilocho Siculo, unde et nomen, ut
Heminæ placet, tractum. Hoc in loco Orestes oraculo monitus simulacrum Scythicæ
Dianæ, quod de Taurica extulerat, prius quam Argos peteret, consecravit. A
Zanclensibus Metaurum locatum, a Locrensibus Metapontum, quod nunc Vibo dicitur.
Bocchus absolvit Gallorum veterem propaginem Umbros esse; Marcus
Antonius refert eosdem, quod tempore aquosæ cladis imbribus superfuerint,
Umbrios Græce nominatos. Liciniano placet, a Messapo Græco Messapiæ datam
originem, versam postmodum in nomen Calabriæ, quam in exordio notri frater
Peucetius Peucetiam nominarat. Par sententia est inter auctores, a gubernatore
Æneæ appellatum Palinurum, a tubicine Misenum, a consobrina Leucosiam insulam a
nutrice Caietam, ab uxore Lavinium, quod post Trojæ excidium, sicut Cosconius
perhibet, quarto anno exstructum est. Nec omissum sit, Æneam æstate ab Ilio
capto secunda, Italicis littoribus appulsum, ut Hemina tradit, sociis non
amplius sexcentis, in agro Laurenti posuisse castra: ubi dum simulacrum, quod
secum ex Sicilia advexerat, dedicat Veneri matri, quæ Frutis dicitur, a Diomede
Palladium suscipit, tribusque mox annis cum Latino regnat socia potestate,
quingentis jugeribus ab eo acceptis. Quo defuncto, summam biennio adeptus, apud
Numicum parere desivit anno septimo, Patrisque Indigetis ei nomen datum. Deinde
constituta ab Ascanio Longa Alba, Fidenæ, Antium, Nola a Tyriis, ab Eubensibus
Cumæ: ibidem Sibyllæ sacellum est, sed ejus, quæ rebus Romanis quinquagesima
olympiade interfuit, cujusque librum ad Cornelium usque Sullam pontifices nostri
consulebant. Tunc enim una cum Capitolio igni absumptus est: nam priores duo,
Tarquinio Superbo parcius pretium offerente quam postulabatur, ipsa exusserat.
Hujus sepulcrum in Sicilia adhuc manet. Delphicam autem Sibyllam ante Trojana
bella vaticinatam Bocchus autumat, cujus plurimos versus operi suo Homerum
inseruisse manifestat. Hanc Herophile Erythrea annis aliquot intercedentibus
consequuta est, Sibyllaque appellata est de scientiæ parilitate, quæ inter alia
magnifica Lesbios amissuros imperium maris multo ante præmonuit, quam id
accideret. Ita Cumanam tertio fuisse post has loco, ipsa ævi series probat. Ergo
Italia, in qua Latium antiquum antea a Tiberis ostiis ad usque Lirim amnem
pertinebat, universa consurgit a jugis Alpium, porrecta ad Reginum verticem, et
litora Bruttiorum, quo in maria meridiem versus protenditur. Inde procedens
paulatim, se Apennini montis dorso attollit, extenta inter Tuscum et Adriaticum,
id est inter Superum mare et Inferum, similis querneo folio, proceritate
amplior, quam latitudine. Ubi longius abiit, in cornua duo scinditur, quorum
alterum Ionium respectat æquor, alterum Siculum. Inter quas prominentias non uno
margine accessum insinuati freti recipit, sed linguis projectis sæpius, ac
procurrentibus, distinctum promontoriis pelagus accipit. Ibi, ut sparsim
notemus, arces Tarentinæ, Scyllacea regio cum Scylleo oppido, et Cratæide
flumine Scylæ matre, ut vetustas fabulata est, Regini saltus, Pæstanæ valles,
Sirenum saxa, amnissimus Campaniæ tractus, Phlegræi campi, Circæ domus,
Tarracina insula ante circumflua immenso mari, nunc ævo nectente addita
continenti, diversamque fortunam a Reginis experta, quos fretum medium a Siculis
vi abscidit: Formiæ etiam Læstrigonibus habitatæ, multa præterea pollentissimis
ingeniis edissertata, quæ præterire, quam inferius exsequi, tutius duximus.
Verum Italiæ longitudo, quæ ab Augusta Prætoria per Urbem Capuamque porrigitur
usque ad oppidum Regium, decies centena et viginti millia passuum colligit:
latitudo ubi plurimum quadringenta decem; ubi minimum, centum sex et triginta:
arctissima est ad portum, quem Hannibalis Castra dicunt: neque enim excedit
quadraginta millia. Umbilicum, ut Varro tradit, in agro Reatino habet. At in
solidum spatium circuitus universi vicies quadragies noviesque centena sunt. In
quo ambitu adversa Locrensium fronte ortus a Gadibus finitur Europæ sinus
primus: nam secundus a Lacinio auspicatus, in Acroceraunio metas habet.
Ad hæc Italia Pado clara est, quem mons Vesulus superantissimus inter
juga Alpium gremio suo fundit, visendo fonte in Ligurum finibus, unde se primum
Padus proruit, subversusque cuniculo rursus in agro Vibonensi extollitur, nulli
amnium inferior claritate, a Græcis dictus Eridanus. Intumescit exortu Canis
tabefactis nivibus, et liquentibus brumæ pruinis, auctusque aquarum accessione,
triginta flumina in Adriaticum defert mare.
E memorabilibus inclytum et
insigniter per omnium vulgatum ora, quod perpaucæ familiæ sunt in agro
Faliscorum, quos Hirpos vocant. Hi sacrificium annuum ad montem Soractis
Apollini faciunt: id operantes gesticulationibus religiosis, impune insultant
ardentibus lignorum struibus, in honorem divinæ rei flammis parcentibus. Cujus
devotionis mysterium munificentia senatus honorata, Hirpis perpetuo consulto
omnium munerum vacationem dedit. Gentem Marsorum serpentibus illæsam esse, nihil
mirum: a Circæ filio hi genus ducunt, et de avita potentia deberi sibi sciunt
servitium venenorum: ideo venena contemnunt. Clius Æetæ tres filias dicit,
Angitiam, Medeam, et Circen: Circen Circeios insedisse montes, carminum
maleficiis varias imaginum facies mentientem: Angitiam vicina Fucino
occupavisse, ibique salubri scientia adversus morbos resistentem, quum dedisset
hominem vivere, deam habitam: Medeam ab Jasone Buthroti sepultam, filiumque ejus
Marsis imperasse. Sed quamvis Italia habeat hoc præsidium familiare, a
serpentibus non penitus libera est. Denique Amunclas, quas Amyclas ante Græci
condiderant, serpentes fugavere. Illic frequens vipera insanabili morsu: brevior
hæc ceteris, quam in aliis advertimus orbis partibus, ac propterea, dum
despectui est, facilius nocet.
Calabria chelydris frequentissima, et
boam gignit, quem anguem ad immensam molem ferunt convalescere. Captat primo
greges bubulos, et quæ plurimo lacte rigua bos est, ejus se uberibus innectit,
suctuque continuo saginata longo in seculo, ita fellebri satietate ultimo
extuberatur, ut obsistere magnitudini ejus nulla vis queat; et postremo
depopulatis animantibus regiones, quas ohsederit, cogit ad vastitatem. Denique
divo Claudio principe, ubi Vaticanus ager est, in alvo occisæ boæ spectatus est
solidus infans.
Italia lupos habet, et quod cum ceteris simile non sit,
homo, quem prius viderint, conticescit, et anticipatus obtutu nocentis aspectus,
licet clamandi voluntatem habeat, non habet vocis ministerium. Sciens de lupis
multa prætereo. Spectatissimum illud est: caudæ animalis hujus villus amatorius
inest perexiguus, quem spontivo damno amittit, quum capi metuit: nec habet
potentiam, nisi viventi detrahatur. Cunt lupi toto anno non amplius dies
duodecim. Vescuntur in fame terram. At hi, quos cervarios dicimus, quamvis post
longa jejunia repertas ægre carnes mandere cperint, ubi quid casu respiciunt
obliviscuntur, et immemores præsentis copiæ eunt quæsitum quam reliquerant
satietatem. In hoc animalium genere nominantur et lynces, quarum urinas coire in
duritiem pretiosi calculi fatentur, qui naturas lapidum exquisitius sunt
persequuti. Istud etiam ipsas lynces persentiscere hoc documento probatur, quod
egestum liquorem illico arenarum tumulis, quantum valent, contegunt, invidæ
scilicet ne talis egeries transeat in nostrum usum, ut Theophrastus perhibet.
Lapidi isti ad succinum color est, pariter spiritu attrahit propinquantia,
dolores renum placat, medetur regio morbo; Græce lyngurium dicitur.
Cicadæ apud Reginos mutæ, nec usquam alibi: quod silentium miraculo est,
nec immerito, quum vicinæ quæ sunt Locrensium, ultra ceteras sonent. Causas
Granius tradit, quum obmurmurarent illic Herculi quiescenti, deum jussisse ne
streperent: itaque ex eo cptum silentium permanere.
Ligusticum mare
frutices procreat, qui quantisper fuerint in aquarum profundis fluxi sunt, tactu
prope carnulento; deinde, ubi in supera attolluntur, natalibus saxis derogati,
lapides fiunt. Nec qualitas illis tantum sed et color vertitur: nam puniceo
protinus rubescunt. Ramuli sunt, quales arboris visimus, ad semipedem
frequentius longi. Rarum est pedaneos deprehendi. Excuduntur ex illis multa
gestamina; habet enim, ut Zoroastres ait, materia hæc quamdam potestatem, ac
propterea, quidquid inde fit, ducitur inter salutaria; curalium alias dicunt;
nam Metrodorus gorgian nominat. Idem quod resistat typhonibus et fulminibus
affirmat.
Eruitur gemma in parte Lucanie, facie adeo jucunda, ut
languentes intrinsecus stellas, et subnubilo renidentes, croceo colore
perfundat. Ea quoniam in littore Syrtium inventa primum est, syrtites vocatur.
Est et veietana a loco dicta, cui nigricolor facies propria, quam ad gratiam
varietatis albi limites intersecant notis candicantibus.
Insula, quæ
Apuliæ oram videt, tumulo ac delubro Diomedis insignis est, et Diomedeas aves
sola nutrit: nam hoc genus alitis præterquam ibi nusquam gentium est, idque
solum poterat memorabile judicari, nisi accederent non omittenda. Forma illis
pæne quæ fulicis, color candidus, ignei oculi, ora dentata; congreges volitant,
nec sine ratione pergendi; duces duo sunt, qui regant cursum: alter agmen
anteit, alter insequitur; ille ut ductu certum iter dirigat, hic ut instantia
urgeat tarditatem, Hæc in meantibus disciplina est. Quum ftificum adest tempus,
rostro scrobes excavant; deinde surculis inversum superpositis, imitantur texta
cratium: sic contegunt subtercavata, et ne operimenta desint, si forte lignorum
cassa venti auferunt, hanc struicem comprimunt terra, quam egesserant, quum
puteos excitassent. Sic nidos moliuntur bifori accessu, nec fortuitu: adeo ut ad
plagas cli metentur exitus, vel ingressus. Aditus, qui mittiit ad pastus, in
ortum destinatur; qui excipit revertentes, versus occasui est: ut lux et
morantes excitet, et receptui non denegetur. Levaturæ alvum adversis flatibus
subvolant, quibus proluvies longius auferatur. Judicant inter advenas: qui
Græcus est, propius accedunt, et quantum intelligi datur, ut civem blandius
adulantur; si quis erit gentis alterius, involant et impugnant. Ædem sacram omni
die celebrant studio ejusmodi: aquis imbuunt plumas, alisque impendio madefactis
confluunt rorulentæ: ita ædem excusso humore purificant: tunc pinnulis
superplaudunt: inde disceditur quasi peracta religione. Ob hoc credunt Diomedis
socios aves factos. Sane ante adventum Ætoli ducis nomen Diomediæ non habebant,
inde sic dictæ.
Italicus excursus per Liburnos, quæ gens Asiatica est,
procedit in Dalmatiæ pedem, Dalmatia in limitem lllyricum, in quo sinu Dardani
sedes habent, homines ex Trojana prosapia in mores barbaros efferati. At ex
altera parte per Ligurum oram in Narbonensem provinciam pergit, in qua Phocenses
quondam fugati Persarum adventu, Massiliam urbem olympiade quadragesima quinta
condiderunt. Et C. Marius bello Cimbrico, factis manu fossis, invitavit mare,
perniciosamque ferventis Rhodani navigationem temperavit: qui amnis præcipitatus
Alpibus primo per Helvetios ruit, occursantium aquarum agmina secum trahens,
auctuque magno, ipso quod invadit freto turbulentior; nisi quod fretum ventis
excitatur, Rhodanus sævit et quum serenum est: atque ideo inter tres Europæ
maximos fluvios et hunc computant. Aquæ quoque Sextiliæ eo loco claruerunt,
quondam hiberna consulis, postea excultæ mnibus: quarum calor olim acrior,
exhalatus per tempora evaporavit, nec jam par est famæ priori. Si Græcias
cogitemus, præstat respicere litus Tarentinum: unde a promontorio, quod Acran
Iapygian vocant, Achaiam destinantibus, citissima navigatio est.
III. Corsica. In ea de catochite lapide.
Flectendus
hinc stilus est: terrarum vocant aliæ, et longum est, ut memoratim insularum
omnium oras legamus, quascumque promontoria Italica prospectant: quamvis sparsæ
recessibus amnissimis, et quodam naturæ quasi spectaculo expositæ, non erant
omittendæ; sed quantum residendum est, si dilatis, quæ præcipua sunt, per
quamdam desidiam, aut Pandatariam, aut Prochytam dicamus, aut Iluam ferri
feracem, aut Caprariaus, quam Græci Aàgilon dicunt,
aut Planasiam de facie supinitatis sic vocatam, vel Columbariam avium hoc
nominis matrem, vel Ithacesiam Ulyxis, ut proditur, speculam, vel Enariam,
Inarimen ab Homero nominatam, aliasque lætas non secus, inter quas Corsicam
plurimi in dicendo latius circumvecti, plenissima narrandi absolverant
diligentia, nihilque omissum, quod retractanti non sit supervacuum: ut exordium
incolis Ligures dederint, ut oppida structa sint, ut colonias ibi deduxerint
Marius et Sulla, ut ipsam Ligustici sinus æquor alluat. Sed hæc facessant.
Verum ager Corsicanus, quod in eo agro unicum est, solus edit, quem
katoxÛthn vocant, lapidem fatu dignissimum. Major est
ceteris, qui ad ornatum destinantur, nec tam gemma, quam cautes. Idem impositas
manus detinet ita se junctis corporibus annectens, ut cum ipso hæreant, quibus
tangitur: sic ei inest velut de glutino lentiore nescio quid, parque gummi.
Accipimus Democritum Abderiten ostentatione scrupuli hujus frequenter usum, ad
probandam occultam naturæ potentiam in certaminibus, quæ contra magos habuit.
IV. Sardinia. In ea de solifuga, et herba
Sardonia.
Sardinia quoque, quam apud Timæum SandaliÇtin legimus, 'Ixnoèsan
apud Crispum, in quo mari sita sit, quos incolarum auctores habeat, satis
celebre est. Nihil ergo attinet dicere, ut Sardus Hercule, Norax Mercurio,
procreati, quum alter a Libya, alter ab usque Tartesso Hispaniæ, in hosce fines
permeavissent, a Sardo terra, a Norace Noræ oppido nomen datum. Mox Aristæum
regnando his proximum in urbe Caralis, quam condiderat ipse, conjuncto populo
utriusque sanguinis, sejuges usque ad se gentes ad unum morem conjugasse,
imperium ex insolentia nihil aspernatas.
Sed ut hæc et Iolaum, qui ad id
locorum agros ibi insedit, præterea et Ilienses, et Locrenses transeamus,
Sardinia est quidem absque serpentibus, sed quod aliis locis serpens, hoc
solifuga Sardis agris. Animal perexiguum, qua aranei forma, solifuga dicta, quod
solem fugiat. In metallis argentariis plurima est: nam solum illud argenti dives
est. Occultim reptat, et per imprudentiam supersedentibus pestem facit. Huic
incommodo accedit et herba Sardonia, quæ in defluviis fontaneis provenit justo
largius. Ea si edulio fuerit nescientibus, nervos contrahit, rictu diducit ora,
ut, qui mortem oppetunt, facie ridentium intereant. Contra quidquid aquarum est,
varie commodis servit. Stagna pisculentissima, hibernæ pluviæ in æstivam
penuriam reservantur: nam homo Sardus opem plurimam de imbrido clo habet. Hoc
collectaneum depascitur, ut sufficiat usui, ubi defecerint scaturigines.
Fontes calidi et salubres aliquot locis effervescunt, qui medelas
afferunt, aut solidant ossa fracta, aut abolent a solifugis insertum venenum,
aut etiam ocularias dissipant ægritudines; sed qui oculis medentur, et
coarguendis valent furibus: nam quisquis sacramento raptum negat, lumina aquis
attrectat: ubi perjurium non est, cernit clarius; si perfidia abnuit, detegitur
facinus cæcitate, et captus oculis admissum tenebris fatetur.
V. Sicilia. In ea memorabilia soli et aquarum. Item de achate
lapide.
Si respiciamus ad ordinem temporum, vel locorum, post
Sardiniam res vocant Siculæ. Primo, quod utraque insula in Romanum arbitratum
redacta, iisdem temporibus facta est provincia: cum eodem anno Sardiniam M.
Valerius, alteram C. Flaminius prætor sortiti sunt. Adde, quod freto Siculo
excipitur nomen Sardi maris. Ergo Sicilia, quod cum primis assignandum est,
diffusis prominentibus triquetra specie figuratur. Pachynus adspectus in
Peloponnesum, et meridianam plagam dirigit; Pelorias adversa vespero Italiam
videt; Lilybæum in Africam extenditur. Inter quæ Pelorias præstat, laudata unico
soli temperamento, quod neque humido in lutum madefiat, neque fatiscat in
pulverem siccitate. Ea ubi introrsum recedit, et in latitudinem panditur, tres
lacus obtinet: quorum unus quod piscium copiosus est, non equidem ad miraculum
duxerim, sed quod ei proximans condensus arbustis inter virgultorum opaca feras
nutriat, et admissis venantibus per terrenos tramites, quibus pedestris accessus
excipit, duplicem piscandi venandique præbeat voluptatem, numeratur inter
eximia. Tertium ara sacrum approbat, qua in media sita, brevia dividit a
profundis. Qua ad eam pergitur, aqua crurum tenus pervenit: quod ultra est, nec
explorari licet, nec attingi; et si fiat, qui id ausus sit, malo plectitur,
quantamque sui partem gurgiti intimaverit, tantam it perditum. Ferunt quemdam in
hæc alta quam longissime jecisse lineam, eam ut recuperaret dum demerso brachio
nisum adjuvat, cadaver manum factam.
Peloritana ora habitatur colonia
Taurominia, quam prisci Naxum vocabant; oppido Messana; Regio Italiæ opposito,
quod Regium a dehiscendi argumento R®gion Græci
dictitabant. Pachyno multa thynnorum inest copia, echinis et omnibus mari
nantibus pisculentissimum, ac propterea semper captura larga. Lilybitano
Lilybæum oppidum decus est, et Sibyllæ sepulcrum. Sicaniæ diu ante Trojana bella
Sicanus rex nomen dedit, advectus cum amplissima Iberorum manu; post Siculus
Neptuni filius. In hanc plurimi Corinthiorum, Argivorum, Iliensium, Dorensium,
Cretensium confluxerunt. Inter quos et Dædalus fabræ artis magister. Principem
urbium Syracusas habet; in qua etiam cum hiberno conduntur serena, nullo non die
sol est. Adde quod Arethusa fons in hac urbe est. Eminet montibus Ætna et Eryce.
Vulcano Ætna sacer est, Eryx Veneri. In Ætnæ vertice hiatus duo sunt, crateres
nominati, per quos eructatus erumpit vapor, præmisso prius fremitu, qui per
æstuantes cavernarum latebras longo mugitu intra terræ viscera diu volvitur, nec
ante se flammarum globi attollunt, quam interni strepitus antecedant. Mirum hoc
est; nec illud minus, quod in illa ferventis naturæ pervicacia mixtas ignibus
nives præfert, et licet vastis exundet incendiis, apicis canitie perpetua
brumalem detinet faciem. Itaque, invicta in utroque violentia, nec calor frigore
mitigatur, nec frigus calore dissolvitur. Laudant alios montes duos, Nebroden et
Neptunium: e Neptunio specula est in pelagus Tuscum, et Adriaticum; Nebroden
damæ et hinnuli gregatim pervagantur: inde Nebrodes. Quidqquid Sicilia gignit
sive soli sive hominis ingenio, proximum est his, quæ optima judicantur, nisi
quod ftus terræ Centuripino croco vincitur. Hic primum inventa comdia. Hinc et
cavillatio mimica in scena stetit. Hinc domo Archimedes, qui juxta siderum
disciplinam machinarius commentator fuit. Hinc Lais illa, quæ eligere patriam
maluit, quam fateri. Gentem Cyclopum testantur vasti specus. Læstrigonum sedes
adhuc sic vocantur. Ceres inde magistra sationis frumentariæ. Hic ibidem campus
Ennensis in floribus semper, et in omni vernus die. Quem propter est demersum
foramen, quo Ditem patrem ad raptus Liberæ exeuntem fama est lucem hausum.
Inter Catinam et Syracusas certamen est de illustrium fratrum memoria,
quorum nomina sibi diversæ partes adoptant. Si Catinenses audiamus, Anapis fuit,
et Amphinomus; si quod malunt Syracusæ, Emantiam putabimus, et Critonem.
Catinensis tamen regio causam dedit facto, in quam se quum Ætnæ incendia
protulissent, juvenes duo sublatos parentes evexerunt in flammas illæsi ignibus.
Horum memoriam ita posteritas munerata est, ut sepulcri locus nominaretur Campus
piorum.
De Arethusa, et Alpheo verum est hactenus, quod conveniunt fons
et amnis. Fluminum miracula abunde varia sunt. Dianam, qui ad Camerinam fluit,
si habitus impudice hauserit, non coibunt in corpus unum latex vineus et latex
aquæ. Apud Segestanos Helbesius in medio flumine subita exæstuatione fervet.
Acidem, quamvis demissum Ætna, nullus frigore antevertit. Himeræum clestes
mutant plagæ: amarus denique est, dum in aquilonem fluit, dulcis ubi ad meridiem
flectitur. Quanta in aquis, tanta novitas in salinis. Salem Agrigentinum si igni
junxeris, dissolvitur ustione; cui si liquor aquæ proximaverit, crepitat, veluti
torreatur. Purpureum Enna mittit: in Pachyno translucidus invenitur. Cetera
salinarum metalla, quæ sunt aut Agrigento, aut Centuripiis proximantia,
funguntur cautium ministerio: nam illinc excuduntur signa ad facies hominum, vel
deorum. Thermitanis locis insula est arundinum ferax, quæ accommodatissimæ sunt
in omnem sonum tibiarum; seu præcentorias facias, quarum locus est ad pulvinaria
præcinendi; seu vascas, quæ foraminum numeris præcentorias antecedunt; seu
puellatorias, quibus a sono clariore vocamen datur; sive gingrinas, quæ
breviores licet, subtilioribus tamen modis insonant; aut milvinas, qua in
accentus exeunt acutissimos; aut Lydias, quas et turarias dicunt; vel
Corinthias, vel Ægyptias, aliasve a musicis per diversas officiorum et nominum
species separatas. In Halesina regione fons alias quietus et tranquillus quum
siletur, si insonent tibiæ exsultabundus ad cantus elevatur, et quasi miretur
vocis dulcedinem, ultra margines intumescit. Gelonium stagnum tetro odore abigit
proximantes. Ibi et fontes duo: alter, de quo si sterilis sumpserit, fecunda
fiet; alter, quem si fecunda hauserit, vertitur in sterilitatem. Stagnum
Petrensium serpentibus noxium est, homini salutare. In lacu Agrigentino oleum
supernatat: hoc pingue hæret arundinum comis de assiduo volutabro, e quarum
capillamentis legitur unguentum medicum contra armentarios morbos. Nec longe
inde collis Vulcanius, in quo, qui divinæ rei operantur, ligna vitea super aras
struunt, nec ignis apponitur in hanc congeriem: quum prosicias intulerunt, si
adest deus, si sacrum probatur, sarmenta licet viridia sponte concipiunt, et
nullo inflagrante habitu, ab ipso numine fit accendium. Ibi epulantes alludit
flamma, quæ flexuosis excessibus vagabunda, quem contigerit, non adurit: nec
aliud est quam imago nuntia perfecti rite voti. Idem ager Agrigentinus eructat
limosas scaturigines, et ut venæ fontium sufficiunt ripis subministrandis, ita
in hac Siciliæ parte, solo nunquam deficiente, æterna rejectatione terram terra
evomit.
Achatem lapidem Sicilia primum dedit in Achatæ fluminis ripis
repertum, non vilem, quum ibi tantum inveniretur: quippe interscribentes eum
venæ naturalibus sic notant formis, ut, quum optimus est, varias præferat rerum
imagines. Unde annulus Pyrrhi regis, qui adversus Romanos bella gessit, non
ignobilis famæ fuit, cujus gemma achates erat, in quo novem Musæ cum insignibus
suis singulæ, et Apollo tenens citharam videbatur, non impressis figuris, sed
ingenitis. Nunc diversis locis apparet. Dat Creta, quem curaliachatem vocant,
curalio similem, sed illitum guttis auro micantibus, et scorpionum ictibus
resistentem. Dat India reddentem nunc nemorum, nunc animalium facies, quem
vidisse oculis favet, quique intra os receptus sedat sitim. Sunt et qui usti
redolent myrrhæ odorem, hæmachates sanguineis maculis irrubescit; sed qui maxime
probantur, vitream habent perspicuitatem, ut Cyprius: nam, qui sunt facie cerea,
abundantes trivialiter, negliguntur. Omnis ambitus hujus insulæ clauditur
stadiorum tribus millibus.
VI. Volcaniæ insulæ.
In freto Siculo Hephestiæ insulæ quinque et viginti millibus passuum ab
Italia absunt. Itali Vulcanias vocant: nam et ipsæ natura soli ignea per occulta
commercia, aut mutuantur Ætnæ incendia, aut subministrant. Hic dicta sedes deo
ignium. Numero sunt septem. Liparæ nomen rex dedit Liparus, qui eam ante Æolum
rexit. Alteram Hieram vocaverunt: ea præcipue Vulcano sacrata est, et plurimum
colle eminentissimo nocte ardet. Strongyle tertia, Æoli domus, vergitur ad
exortus solis, minime angulosa, quæ flammis liquidioribus differt a ceteris. Hæc
causa efficit, quod ex ejus fumo potissimum incolæ præsentiscunt, quinam flatus
in triduo pertendant. Quo factum, ut Æolus rex ventorum crederetur. Ceteras
Didymen, Ericusam, Phnicusam, Euonymon, quoniam similes sunt, dictas habe.
VII. Europæ sinus tertius. In eo de
locorum Græciæ admirabilibus; de fluminibus, de fontibus; de merulis, de
perdicibus; de lapide galactite, de lapide asbesto; de Arione.
Tertius Europæ sinus incipit a Cerauniis montibus, desinit in
Hellespontum. In eo apud Molossos, ubi Dodonæi Jovis templum, Tomarus mons est,
circa radices nobilis centum fontibus, ut Theopompo placet. In Epiro fons est
sacer, frigidus ultra omnes aquas, et spectatæ diversitatis: nam si ardentem in
eum mergas facem, exstinguit; si procul ac sine igne admoveas, suopte ingenio
inflamat. Dodone Tomaro celsa est. Delphi Cephiso flumine, Castalio fonte,
Parnassi jugis celebres. Acarnania Aracyntho eminet. Hanc ab Ætolia Pindus
dividit, qui Acheloum parit, cum primis Græciæ amnibus præditum veteri
claritate. Nec injuria, quum inter calculos, quibus ripæ ejus micant, inveniatur
galactites, qui scrupulus ipse ater si teratur, reddit succum album ad lactis
saporem. Feminis nutrientibus illigatus fecundat ubera, subnexus parvulis
largiusculos haustus facit salivarum. Intra os receptus liquescit; quum solvitur
tamen, memoriæ bonum perimit. Quem post Nilum Achelous dat, nec alter alius.
Propter oppidum Patras Scioessa locus novem collium opacitate umbrosus,
et radiis solis ferme invisus, nec aliam ob causam memorabilis. In Laconica
spiraculum est Tænaron. Est et Tænaron promontorium adversum Africæ, in quo
fanum est Methymnæi Arionis, quem delphine eo advectum imago testis est, ad
effigiem casus et veri operis expressa ære: præterea tempus signatum: olympiade
enim undetrigesima, qua in certamine Siculo idem Arion victor scribitur, id
ipsum gestum probatur. Est et oppidum Tænaron nobili vetustate: præterea aliquot
urbes, inter quas Leuctræ, non obscuræ jam pridem Lacedæmoniorum fdo exitu.
Amiclæ silentio suo quondam pessundatæ. Sparta insignis cum Pollucis et Castoris
templo, tum etiam Othryadis illustris viri titulis. Therapnæ, unde primum cultus
Dianæ. Pitane, quam Archesilas stoicus inde ortus prudentiæ suæ merito in lucem
extulit. Anthia et Cardamyle, ubi quondam fuere Thyræ, nunc locus dicitur, in
quo anno septimo decimo regni Romuli inter Laconas et Argivos memorabile bellum
fuit. Jam Taygeta mons, et flumen Eurotas notiora sunt, quam ut stilo egeant.
Inachus Achaiæ amnis Argolicum secat tractum, quem rex Inachus a se
nominavit, qui exordium Argivæ nobilitati primus dedit. Epidauro decus est
Æsculapii sacellum, cui incubantes ægritudinem remedia capessunt de monitis
somniorum. Pallanteum Arcadiæ, quod Palatio nostro per Evandrum Arcada
appellationem dederit, sat est admonere: in qua montes Cyllene et Lycæus Mænalus
etiam diis alumnis inclaruerunt; inter quos nec Erymanthus in obscuro est. Inter
flumina, Erymanthus Erymantho monte demissus, et Ladon, ille Herculis pugna, hic
Pane clara sunt. Varro perhibet fontem in Arcadia esse, cujus interimat haustus.
In eadem parte de avibus hoc solum non indignum relatu, quod cum aliis locis
merula furva sit, circa Cyllenem candidissima est.
Nec lapidem
spreverimus, quem Arcadia mittit: asbesto nomen est, ferri colore; qui, accensus
semel, exstingui nequitur.
In Megarensium sinum Isthmos exit, ludis
quinquennalibus et delubro Neptuni inclytus: quos ludos eapropter institutos
ferunt, quod sinibus quinque Peloponnesi oræ alluuntur: a septentrione, Ionio;
ab occidente,Siculo; a brumali oriente, Ægæo; a solstitiali oriente, Myrtoo; a
meridie, Cretico. Hoc spectaculum per Cypselum tyrannum intermissum, Corinthii,
olympiade quadragesima nona solemnitati pristinæ reddiderunt.
Ceterum
Peloponneson Pelopi regnatam, nomen indicio est. Ea ut platani folium recessibus
et prominentibus figurata, divortium facit inter Ionium et Ægæum mare, quatuor
non amplius millibus dispescens utrumque litus, excursu tenui, quem Isthmon
dicunt, ob angustias. Hinc Hellas incipit, quam proprie veram habent Græciam.
Quæ nunc Attice, Acte prius dicta. Ibi Athenæ, cui urbi saxa Scironia
propinqua sunt, porrecta sex millibus passuum, ob honorem ultoris Thesei, et
memoriam nobilis pnæ, sic nominata. Ex istis rupibus Ino se cum Palæmone filio
in profunda præcipitem jaculata auxit maris numina. Nec Atticos montes in partem
tacebimus. Est Icarius, est Brilessus, est Lycabethus et Ægialus; sed Hymetto
meritissime ac jure attribuitur principatus, quod apprime florulentus, eximio
mellis sapore et externos omnes et suos vincit. Callirhoen stupent fontem, nec
ideo Cruneson fontem alterum nullæ rei numerant. Atheniensibus judicii locus
Arios pagos. Marathon campus factus memorabilis opinione prlii cruentissimi.
Multæ quidem insulæ objacent Atticæ continenti, sed suburbanæ ferme sunt,
Salamis, Sunium, Ceos, Coos, quæ, ut Varro testis est, subtilioris vestis
amicula arte lanificæ scientiæ prima in ornatum feminarum dedit.
Botia
Thebis enitet. Thebas condidit Amphion, non quod lyra saxa duxerit, neque enim
par est ita gestum videri, sed quod affatus suavitate homines rupium incolas, et
incultis moribus rudes, ad obsequii civilis pellexerit disciplinam. Urbs ista
numinibus apud se ortis gloriatur, ut perhibent qui sacris carminibus Herculem
et Liberum celebrant. Apud Thebas Helicon lucus est, Cithæron saltus, amnis
Ismenus; fontes Arethusa, dipodia, Psamate, Dirce; sed ante alios Aganippe et
Hipocrene, quos Cadmus, litterarum primus repertor, quoniam equestri
exploratione deprehendisset, dum rimatur, quænam insideret loca; incensa est
licentia ptarum, ut utrumque pariter disseminaretur, et quod aperta foret
alitis equi ungula, et quod poti inspirationem facerent litterariam.
Euba insula laterum objectu efficit Aulidis portum, seculis traditum
Graiæ conjurationis memoria. Boti idem sunt, qui Leleges fuerunt, per quos
defluens Cephisos amnis in maria conditur. In hac continentia Opuntius sinus,
Larissa oppidum, Delphi, Rhamne quoque, in qua Amphiarai fanum, et Phidiacæ
signum Dianæ. Varro opinatur duo in Botia esse flumina, natura licet separi,
miraculo tamen non discrepante: quorum alterum, si ovillum pecus debibat, pullum
fieri coloris quod induerit; alterius haustu, quæcumque vellerum fusca sunt, in
candidum verti. Addit videri ibi puteum pestilentem, cujus liquor mors est
haurientibus.
Perdices sane, quum ubique liberæ sint, ut aves universæ,
in Botia non sunt, nec quum volant sui juris, sed in ipso ære, quas transire
non audeant, metas habent; inde ultra notatos jam terminos nunquam exeunt, nec
in Atticum solum transmeant. Hoc Botiis proprium: nam quæ communia sunt
omnibus, generatim persequemur.
Concionantur a perdicibus nidi munitione
solerti: spineis enim fruticibus ac surculis receptus suos vestiunt, ut
animalia, quæ infestant, arceantur asperis surculorum. Ovis stragulum pulvis
est, ad quæ clanculo revertuntur, ne indicium loci conversatio frequens faciat.
Plerumque feminæ transvehunt partus, ut mares fallant, qui eos affligunt
impatientius sæpissime adulantes. Dimicatur circa connubium, victosque credunt
feminarum vice venerem sustinere: ipsas libido sic agitat, ut si ventus a
masculis flaverit, fiant prægnantes odore. Tunc si quis hominum, ubi incubant,
propinquabit, egressæ matres venientibus sese sponte offerunt, et simulata
debilitate vel pedum, vel alarum, quasi statim capi possint, gressus fingunt
tardiores. Hoc mendacio sollicitant obvios, et eludunt, quoad profecti longius a
nidis avocentur. Nec in pullis studium segnius ad cavendum: quum enim visos se
persentiscunt, resupinati glebulas pedibus attollunt, quarum obtentu tam callide
proteguntur, ut lateant etiam deprehensi.
VIII.
[De Thessalia et Magnesia. Philippus oculum damnatus]
Thessalia eadem
est et Hæmonia, quam Homerus Argos Pelasgicon nominat; ubi genitus Hellen, a quo
rege Hellenes nominati. Hujus a tergo Pieria ad Macedoniam protenditur, quæ
devicta sub Macedonum venit jugum. Multa ibi oppida, multa flumina. De oppidis
egregia sunt Phthia, Larissa Thessala, et Thebæ. De amnibus Peneus, qui præter
Ossam Olympumque decurrens colle dextra lævaque molliter curvo, nemorosis
convallibus Thessalica facit Tempe, undisque apertior Macedoniam ac Magnesiam
interluens, in Thermæum sinum decidit. Thessaliæ sunt Pharsalici campi, in
quibus civilium bellorum detonuerunt procellæ. Ac ne in montes notos eamus,
Pindum et Othryn agitent, qui Lapitharum originem prosequuntur; Ossam, quos
Centaurorum stabulis immorari juvat. Pelion autem nuptiale convivium Thetidis
atque Pelei in tantum notitiæ obtulit, ut taceri de eo magis mirum sit.
In regione Magnesia Mothona oppidum situm est, quod quum obsideret
Philippus Macedonis Magni pater, damnatus est oculum jactu sagittæ, quam jecerat
Aster oppidanus inscriptam suo nomine, loco vulneris, nomine quem petebat.
Populum istum callere arte sagittaria credere possumus vel de Philocteta,
quoniam Meliba in hoc pede computatur. Sed ne transeamus præsidium ptarum,
fons Libethrius et ipse Magnesiæ est.
IX. Macedonia
cum regibus, de natura Olympi montis, et lapide pæanite.
Qui Edonii
olim populi, quæque Mygdonia erat terra, aut Pierium solum, vel Emathium, nunc
omne uniformi vocabulo Macedonica res est; et partitiones, quæ specialiter antea
sejugabantur, Macedonum nomini contributæ, factæ sunt corpus unum. Igitur
Macedoniam præcingit Thracius limes; meridiana Thessali et Epirotæ tenent; a
vesperali plaga Dardani sunt et Illyrii; qua septentrione tunditur, Ponia ac
Pelagonia protegitur; a Triballis, montanis excessibus aquilonio frigori
objecta. Inter ipsam et Thraciam Strymon amnis facit terminum, qui ab Hæmi jugis
irrigat.
Verum ut sileam aut Rhodopen Mygdonium montem, aut Athon
classibus Persicis navigatum, continentique abscissum mille quingentorum passuum
longitudine, simul de auri venis et argenti, quæ optimæ in agris Macedonum et
plurimæ eruuntur, Orestidem dicam. Populi sunt, qui ut Orestæ dicerentur, inde
cptum. A Mycenis profugus matricida, quum abscessus longius destinasset, natum
sibi in Emathia parvulum de Hermiona, quam in omnes casus sociam adsciverat, hic
mandaverat occulendum. Adolevit puer in spiritum regii sanguinis, nomen patris
sui referens; occupatoque quidquid esset, quod procedit in Macedonicum sinum, et
Adriaticum salum, terram, cui imperitaverat, Orestidem dixit.
Admonet
Phlegra, ubi, antequam oppidum fieret, rumor est, militia mundi dimicatum cum
gigantibus,ut penitus persequamur, quantis probationibus ibidem imperii indicia
divinæ expeditionis in hoc seculo perseveraverint. Illic si quando, ut accidit,
nimbis torrentes excitantur, et aucta aquarum pondera ruptis obicibus valentius
se in campos ruunt, eluvione ossa etiam nunc ferunt detegi, ad instar quæ sunt e
corporibus humanis, sed modo grandiora, quæ ob enormem magnitudinem monstrosi
exercitus jactitant exstitisse, idque adjuvatur argumento saxorum immanium,
quibus oppugnandamimpetitum clum crediderunt.
Pergam ad residua, quæ in
Thessaliam et Athamaniam contendunt. Sunt enim arrectiora, quam usquam
proceritas montana attolli valet; nec est in terris omnibus, quod merito ad
istas eminentias comparetur: quippe quas solas diluvialis irruptio, quum
universa obduceret humido situ, inaccessas reliquit. Durant vestigia non
languidæ fidei, quibus apparet, hos locos superstites undosæ tempestati fuisse:
nam in latebrosis rupium cavaminibus, quæ fluctuum confligiis tunc adesa sunt,
reduviæ conchyliorum residerunt, et alia multa, quæ affatim mari incito
exspuuntur: ita ut, sint licet facie mediterranea, appareant tamen specie
litorali. Nam Olympum ab Homero non per audaciam celebratum docent quæ in eo
visitantur. Primum excellenti vertice tantus attollitur, ut summa ejus clum
accolæ vocent. Ara est in cacumine, Jovi dicata, cujus altaribus si qua de extis
inferuntur, nec difflantur ventosis spiritibus, nec humentibus pluviis
diluuntur: sed volvente anno cujusmodi relicta fuerint, ejusmodi reperiuntur; et
omnibus tempestatibus a corruptelis aurarum vindicatur, quidquid ibi semel est
deo consecratum. Litteræ in cinere scriptæ ad usque alteram anni cærimoniam
permanent.
Nunc de incolis reddam. Emathius, qui primus in Emathia
accepit principatum, seu quia indago originis ejus ævo disperiit, seu quia ita
res est, genuinus terræ habetur. Post hunc in Macedonis exortum Emathiæ nomen
perstitit: sed Macedo Deucalionis maternus nepos, qui solus quum domus suæ
familia morti publicæ superfuerat, vertit vocamen, Macedoniamque a se dixit.
Macedonem Caranus insequitur dux Peloponnesiæ multitudinis, qui juxta responsum
dictum deo, ubi caprarium pecus resedisse adverterat, urbem condidit, quam dixit
Ægeas, in qua sepeliri reges mos erat: nec alter excellentium virorum bustis
apud Macedones priscos dabatur locus. Succedit Carano Perdicca, vigesima secunda
olympiade, primus in Macedonia rex nominatus, cui Alexander Amyntæ filius Dives
habitus, nec immerito: ita enim affluenter successus ejus ampliandis opibus
proficiebant, ut ante omnes Apollini Delphos, Jovi Eliden statuas aureas dono
miserit. Voluptati aurium indulgentissime deditus: sicut plurimos qui fidibus
sciebant, dum vivit, in usum oblectamenti donis tenuit liberalibus, inter quos
et Pindarum lyricum. Ab hoc Archelaus regnum excepit, prudens rei bellicæ,
navalium etiam commentor prliorum. IIic Archelaus in tantum litterarum mire
amator fuit, ut Euripidi tragico consiliorum summam concrederet: cujus suprema
non contentus prosequi sumptu funeris, crines tonsus est, et mrorem, quem animo
conceperat, vultu publicavit. Idem Archelaus Pythias et Olympicas palmas
quadrigis adeptus, Græco potius animo, quam regali, gloriam illam præ se tulit.
Post Archelaum Macedonica res dissensione jactata in Amyntæ regno
stetit, cui tres filii; sed Alexander patri succedit. Quo exempto, Perdiccæ
primum data copia amplissimæ potestatis indipiscundæ: qui obiens hereditarium
regnum fratri Philippo reliquit, quem captum oculo dextro apud Mothonam supra
diximus; cujusque debilitatis omen præcesserat: nam quum nuptias ageret, acciti
tibicines carmen Cyclopium quasi de colludio concinuisse traduntur. Philippus
Magnum procreat, quamlibet Olympias, Alexandri mater, nobiliorem ei patrem
acquirere affectaverit, quum se coitu draconis consatam affirmaret. Ita tamen
ipse egit, ut deo genitus crederetur. Peragravit orbem, rectoribus Aristotele et
Callisthene usus; subegit Asiam, Armeniam, Iberiam, Albaniam, Cappadociam,
Syriam, Ægyptum; Taurum Caucasumque transgressus est; Bactros domuit; Medis et
Persis imperavit; cepit Indiam, emensus omnia. Liber et Hercules accesserant.
Forma supra hominem augustiore, cervice celsa, lætis oculis et illustribus,
malis ad gratiam rubescentibus, reliquis corporis non sine majestate quadam
decoris. Victor omnium, vino et ira victus: sicut morbo vinolentiæ apud
Babylonem humiliore, quam vixerat, fortuna exemptus est. Post quem qui fuerunt,
magis segetem Romanæ gloriæ, quam ad hereditatem tanti hominis, ortos invenimus.
Macedonia lapidem gignit, quem pæanitem vocant. Hunc eumdem et concipere
et parere et parturientibus opitulari, fama prodiga est. Circa Tiresiæ sepulcrum
plurimus invenitur.
X. Thracia cum moribus gentium. In
ea de gruibus, de hirundinibus, de isthmo.
Nunc in Thraciam locus
pergere, et ad validissimas Europæ gentes vela vertere: quas qui sedulo experiri
velint, non difficulter deprehendent, Thracibus barbaris inesse contemptum vitæ
ex quadam naturalis sapientiæ disciplina. Concordant omnes ad interitum
voluntarium, dum nonnulli eorum putant, obeuntium animas reverti; alii non
exstingui, sed beatas magis fieri. Apud plurimos luctuosa sunt puerperia;
denique recens natum fletu parens excipit; contraversum læta sunt funera, adeo
ut exemptos gaudi prosequantur. Uxorum numero se viri jactitant, et honoris loco
judicatur multiplex matrimonium. Quæ feminæ tenaces sunt pudicitiæ, insiliunt
defunctorum rogos conjugum, et, quod maximum insigne ducunt castitatis,
præcipites in flammas eunt. Nupturæ non parentum arbitrio transeunt ad maritos,
sed quæ præ aliis specie valent, subhastari volunt, et licentia taxationis
admissa, non moribus nubunt, sed præmiis; quas formæ premit dedecus, dotibus
emunt quibus conjungantur. Uterque sexus epulantes focos ambiunt, herbarum, quas
habent, semine ignibus superjacto; cujus nidore perculsi, pro lætitia habent
imitari ebrietatem sensibus sauciatis. De ritu ista sunt; de locis et populis,
quæ sequuntur.
Strymonem accolunt dextro latere Denselatæ; Bessorum
quoque multa nomina ad usque Nestum amnem, qui radices Pangæi circumfluit.
Hebrum Odrysarum solum fundit, qui fluvius excurrit inter Priantas, Doloncos,
Thynos, Corpilos, aliosque barbaros tangit, et Ciconas. Deinde Hæmus sex
millibus passuum arduus, cujus aversa Msi, Getæ, Sarmatæ, Scythæ, et plurimæ
insidunt nationes. Ponticum litus Sithonia gens obtinet, quæ nato ibi Orpheo
vate inter principes judicatur: quem sive sacrorum, sive cantuum, secreta in
Sperchivo promontorio agitasse tradunt. Deinde stagnum Bistonium. Nec longe
regio Maronea, in qua Tirida oppidum fuit, equorum Diomedis stabulum; sed cessit
ævo, solumque turris vestigium adhuc durat. Inde non procul urbs Abdera, quam
Diomedis soror et condidit, et a se sic vocavit. Mox Democriti domus physici;
ac, si verum rimere, ideo nobilior. Hanc Abderam, olympiade prima et tricesima
senio collapsam, Clazomenii ex Asia ad majorem faciem restitutam, oblitteratis
quæ præcesserant, nomini suo vindicaverunt. Locum Doriscon illustrem reddidit
Xerxis adventus, quod ibi recoluit militis sui numerum. Polydori tumulum
ostendit Aenus in parte, quam aratores Scythæ celebrant.
Quondam urbem
Geraniam, Cathizon barbari vocant: unde a gruibus Pygmæos ferunt pulsos.
Manifestum sane est, in septentrionalem plagam hieme grues frequentissimas
convolare. Nec piguerit meminisse, quatenus expeditiones suas dirigant. Sub
quodam militiæ eunt signo, et ne pergentibus ad destinata vis flatuum renitatur,
arenas devorant, sublatisque lapillulis ad moderatam gravitatem saburrantur.
Tunc contendunt in altissima, ut de excelsiori specula metentur quas petant
terras. Fidens meatu præit catervas; volatus desidiam castigat voce, quæ cogit
agmen; ea ubi obraucata est, succedit alia. Pontum transituræ angustias captant;
et quidem eas, nam promptum est oculis deprehendere, quæ inter Tauricam sunt et
Paphlagoniam, id est inter Carambim, et Krioè
m¡tvpon. Quum contra medium alveum adventasse se sciunt, scrupulorum
sarcina pedes liberant: ita nautæ prodiderunt, compluti sæpe ex illo casu imbre
saxatili. Arenas non prius revomunt, quam securæ sedis suæ fuerint. Concors cura
omnium pro fatigatis adeo, ut si quæ defecerint, congruant universæ, lassatasque
sustollant, usque dum vires otio reciperentur. Nec in terra cura segnior.
Excubias nocte dividunt, ut exsomnis sit decima quæque. Vigiles ponduscula
digitis amplectuntur, quæ, si forte exciderint, somnum coarguant. Quod cavendum
erit, clangore indicant. Ætatem in illis prodit color: nigrescunt senectute.
Veniamus ad promontorium Ceras Chryseon Byzantio oppido nobile, antea
Lygos dictum: quod a Dyrrachio abest septingentis undecim millibus passuum:
tantum enim patet inter Adriaticum mare et Propontidem.
In Ceniensi
regione non longe a Flaviopoli colonia Bizye oppidum, quondam arx Terei regis,
invisum hirundinibus, et deinceps alitibus illis inaccessum: quanquam et Thebas,
quod illa mnia sæpius capta sint, negentur subire. Nam inter cetera habere
illas quiddam præscium, inde noscitur quod lapsura non petunt culmina, et
aspernantur peritura quoquo modo tecta. Minime certe a diris avibus impetuntur,
nec unquam præda sunt, ut sacræ. Cibos non sumunt resistentes, sed in ære
capiunt escas, et hauriunt.
Alter Isthmos in Thracia est similibus
angustiis, et pari latitudine arcti maris, cujus litora urbes utrinque secus
ostentant. Propontidis oram insignit Pactye, Melanem sinum Cardia: quod in
cordis faciem sita sit, dicta Cardia est. Omnis Hellespontus stringitur in
stadia septem, quibus ab Europa Asiaticam plagam vindicat. Hic quoque urbes duæ,
Abydos Asiæ est, Sestos Europæ. Deinde contraria inter se promontoria: Mastusia
Cherronesi, ubi finitur Europee sinus tertius, Sigeum Asiæ, in quo tumulus est
Cynossema dictus, Hecubæ sepulcrum, et turris Protesilai delubro data. Finibus
Thraciæ a septentrione Ister obtenditur, ab oriente Pontus ac Propontis, a
meridie Ægæum mare.
XI. Claræ insulæ, et in insulis
clara. In Creta herba alimos, animal phalangium, lapis Idæus dactylus. In
Carysto aves Carystiæ, item carbasum. In Delo tempora diluviorum, et aves
coturnices.
Inter Tenedum et Chium, qua Ægæus sinus panditur, ab
dextera Antandrum navigantibus saxum est: hoc enim verius quam insula meruit
cognominari. ld quoniam visentibus procul capræ simile creditur, quam Græce
aäga nuncupant, Ægæus sinus dictus est. A Phalario
Corcyræ promontorio ad navis effigiem scopulus eminet, in quem transfiguratam
Ulyxis navem crediderunt. Cytheræ, quæ a Malea abest quinque millibus passuum,
Porphyris antea nomen fuit.
Pronius est Cretam dicere, quam absolvere in
quo mari jaceat. Ita enim circumflui illius nomina Græci permiscuerunt, ut dum
aliis alia inferunt, pæne oblimaverint universa. Quantam potest tamen in
designando operam locabimus, ne quid hæreat sub ancipiti. Inter ortum porrigitur
et occasum tractu longissimo, hinc Græcia, inde Cyrenis objacentibus: a
septentrione Ægæis et suis, id est Creticis æstibus verberatur: ab austro
Libycis undis perfunditur et Ægyptiis, non stipata centum urbibus, sicut
perhibent qui prodige lingua largiti sunt, sed magnis et ambitiosis oppidis:
quorum principatus est penes Gortynam, Cydoneam, Gnoson, Therapnas, Cylisson.
Dosiades eam a Crete nympha Hesperidos filia, Anaximander a Crete rege Curetum,
Crates Aeriam prius dictam, mox Curetin, nonnulli etiam a temperie cli Makrvn n°son appellatam prodiderunt. Prima mari potuit
remis et sagittis. Prima litteris jura junxit. Pyrrho repertore equestres turmas
prima docuit lascivas vertigines implicare: ex qua disciplina bellicæ rei ratio
convaluit. Studium musicum inde cptum, quum Idæi Dactyli modulos crepitu ac
tinnitu æris deprehensos in versificum ordinem transtulissent. Albet jugis
montium Dictynnæi et Cadisti, qui ita excandescunt, ut eminus navigantes magis
putent nubila. Præter ceteros Ida est, qui ante solis ortum solem videt. Varro,
in opere quod de litoralibus est, etiam suis temporibus affirmat sepulcrum Jovis
ibi visitatum. Cretes Dianam religiosissime venerantur, Britomarten gentiliter
nominantes, quod sermone nostro sonat virginem dulcem. Ædem numinis præterquam
nudus vestigia nullus licito ingreditur. Ea ædes ostentat manus Dædali. Gortynam
amnis Lethæus præterfluit, quo Europam tauri dorso Gortyni ferunt vectitatam.
Idem Gortyni et Atymnum colunt, Europæ fratrem: ita enim memorant. Videtur hic,
et occurrit, sed die jam vesperato augustiori se facie visendum offerens. Gnosii
Minervam civem deam numerant, primumque apud se fruges satas audacter cum
Atticis contendunt. Ager Creticus silvestrium caprarum copiosus est, cervo eget.
Lupos, vulpes, aliaque quadrupedum noxia nusquam educat. Serpens nulla, larga
vitis, mira soli indulgentia, arborarii proventus abundantes: nam in hujus
tantum insula: parte repullulant cæsæ cupressi.
Herba Ílimow dicitur; ea admorsa diurnam fament prohibet; proinde
et hæc Cretica est. Sphalangion, aranei genus est; si nisum quæras, nulla vis
est; si potestatem, ictum hominem veneno interficit. Lapis quoque Idæus dactylus
dicitur insulæ isti familiaris, coloris ferrei, humano pollici similis. Avem
noctuam Creta non habet; et si invehatur, emoritur.
Carystos aquas
calentes habet, Hellopias vocant; et Carystias aves, quæ flammas impune
involant; carbasa etiam, quæ inter ignes valent. Calchis eadem habita est apud
priscos, ut Callidemus auctor est, ære ibi primum reperto. Titanas in ea
antiquissime regnasse ostendunt ritus religionum. Briareo enim rem divinam
Carystii faciunt, sicut Ægæoni Calchidenses: nam omnis ferme Euba Titanum fuit
regnum.
Cycladas autumant inde dictas, quod licet spatiis longioribus a
Delo projectæ, in orbem tamen circa Delum sitæ sunt (et orbem kæklon Graii loquuntur). Ios Homeri tumulo ceteras
antecedit.
Meminisse hoc loco par est, post primum diluvium Ogygi
temporibus notatum, quun novem et amplius mensibus diem continua nox
inumbrasset, Delon ante omnes terras radiis solis illuminatam, sortitamque ex eo
nomen, quod prima reddita foret visibus. Inter Ogygum sane et Deucalionem medium
ævum sexcentis annis datur. Eadem est Ortygia, quæ clarissima in Cycladum numero
multifarie traditur; nunc Asteria a cultura Apollinis; nunc a venatibus Lagia,
vel Cynetho; Pyrpile etiam, quoniam et ignitabula ibi et ignis inventa sunt. In
hac primum visæ coturnices aves, quas ortygas Græci vocant. Has easdem in Latonæ
tutela æstimant constitutas. Nec semper apparent. Adveniendi habent tempora,
æstate depulsa, Quum maria tranant, impetus differunt, et metu spatii longioris,
vires suas nutriunt tarditate. Ubi terram persentiscunt, cunt catervatim,
deinde globatæ vehementius properant; quæ festinatio plerumque exitium portat
navigantibus: accidit enim in noctibus, ut vela incidant, et præponderatis
sinibus alveos vertant. Austro nunquam exeunt: nam metuunt vim flatus
tumidioris. Plurimum se aquilonibus credunt, ut corpora pinguiuscula atque eo
tarda, facilius provehat siccior et vehementior spiritus. Ortygometra dicitur,
quæ gregem ductitat; eam terræ proximantem accipiter speculatus rapit, ac
propterea opera est universis ut sollicitent ducem generis externi, per quem
frustrentur prima discrimina. Cibos gratissimos habent semina venenorum: quam ob
causam eam damnavere prudentium mensæ. Solum hoc animal præter hominem morbum
patitur comitialem.
XII. Euba. Paros, lapis Sarda.
Naxos, Icaros, Melos, Carpathus, Rhodos, Lemnos.
Euba tam modico
æstu dividua est a Botiæ continente, ut dubitandum sit, an numerari inter
insulas debeat: nam latæ quam vocant terræ ponte jungitur, et per fabricam
brevissimæ machinæ aditur pede. Cenæo promontorio vadit in septentrionem, duobus
aliis in meridiem extenditur; quorum Geræstos spectat Atticam, Caphereus
prominet in Hellespontum, ubi post Ilii excidium Argivam classem vel Minervæ
ira, vel quod certior prodit memoria, sidus Arcturi gravibus affecit casibus.
Marmore Paros nobilis, Abdelo oppido frequentissima; prius tamen Minoia,
quam Paros dicta: nam subacta a Minoe, quoad in Creticis mansit legibus, Minoiam
loquebantur. Præter marmor dat et Sardam lapidem, qui marmore quidem præstat,
inter gemmas vero vilissimus ducitur.
Naxon a Delo duodeviginti millia
passuum separant, in qua Strongyle oppidum; sed Naxos Dionysia prius, quam Naxos
dicta, vel quod hospita Libero patri, vel quod fertilitate vitium vincat
ceteras. Sunt præterea Cyclades plurimæ, sed in supra dictis præcipuum est, quod
memoriæ debentur.
De Sporadibus est Icaros, quæ Icario mari nomen dedit.
Hæc inter Samum et Myconum procurrentibus saxis inhospita, ac nullis sinibus
portuosa, ob inhumana litorum infamis est. Vult ergo Varro, Icarum Cretem ibi
naufragio interiisse, et de exitu hominis impositum nomen loco. Nam in Samo
nobilius nihil quam Pythagoras civis, qui mox offensus fastu tyrannico, relicta
domo patria Bruto consule, qui reges Urbe exegit, Italiam advectus est.
Melos, quam Callimachus Memallidam dixit, omnium insularum rotundissima
est, juxta Æoliam. Nam Carpathus, a qua Carpathium sinum dicimus. Nunquam ita
clum nubilum est, ut in sole Rhodos non sit.
Lemnii Vulcanum colunt,
ideo in Lemno metropolis Hephæstia. Præterea oppidum Myrina, in cujus forum mons
Athos et Macedonia umbram jacit. Quod non frustra inter miracula notaverunt,
quum Athos a Lemno sex et octoginta millibus passuum separetur. Est sane Athos
sublimis adeo, ut æstimetur altior, quam unde imbres cadunt. Quæ opinio eo fidem
concepit, quod in aris, quas cacumine sustinet, nunquam cineres eluantur, nec
quidquam ex aggeribus suis perdant, sed in quo relicti cumulo permaneant. In
summo eo oppidum Acrothon fuit, in quo dimidio longior, quam in aliis terris
incolentium ætas prorogabatur: ideo inde homines, MakrobÛouw Græci, nostri appellavere Longævos.
XIII. Hellespontus, Propontis, Bosphoros. In his de delphinis,
de thunnis.
Quartus Europæ sinus Hellesponto incipit, Mæotidis ostio
terminatur. Atque omnis hæc latitudo, quæ Europam Asiamque dividit, in septem
stadiorum angustias stringitur. Hic est Hellespontus: hac Xerxes ponte navibus
facto permeavit. Tenuis deinde Euripus porrigitur ad Asiæ urbem Priapum, qua
Magnus Alexander potiundi orbis amore transcendit, et potitus est. Inde diffusus
æquore patentissimo rursus stringitur in Propontidem: mox in quingentos passus
coarctatur, fitque Bosporus Thracius, qua Darius copias transportavit.
Hæc profunda delphinas plurimos habent, in quibus causæ miraculi
multiformes. Ante omnia nihil velocius habent maria, sic ut plerumque salientes
transvolent vela navium. Quoquo eant, conjuges evagantur. Catulos edunt. Decimus
mensis maturum facit partum: Lucinam æstivus dies solvit. Uberibus ftus alunt.
Teneros in faucibus receptant. Invalidos aliquantisper prosequuntur. In
tricesimum annum vivunt, quod exploratum est in experimentum caudis amputatis.
Ora non quo ceteræ belluæ loco habent, sed ferme in ventribus. Contra naturam
aquatilium soli linguas movent. Aculeatæ sunt pinnæ dorsuales: quum ira
subjacet, inhorrescunt; quum animi conquieverunt, quibusdam receptaculis
operiuntur. Spirare eos in aquis negant, et vitales auras, non nisi in ære
supero, reciperare. Pro voce gemitus est similis humano. Certum habent
vocabulum, quo accepto vocantes sequuntur: nam proprie Simones nominantur. Voces
hominum aquilonis flatu celerius hauriunt; contra austro spirante auditus
obstruuntur. Mulcentur musica; gaudent cantibus tibiarum; ubicumque symphonia
est, gregibus adventant. Divo Augusto principe in Campania delphinem puer
fragmentis panis primo illexit, et in tantum consuetudo valuit, ut alendum se
etiam manui ipsius Crederet. Mox, quum prolusisset puerilis audacia, intra
spatia eum Lucrini lacus vectitavit: unde effectum, ut a Baiano litore
equitantem puerum Puteolos usque veheret. Hoc per annos plurimos tamdiu gestum,
donec assiduo spectaculo desineret miraculum esse, quod gerebatur. Sed ubi obiit
puer, sub oculis publicis desiderio ejus et mrore delphin interiit. Pigeret hoc
asseverare, ni Mæcenatis et Fabiani, multorumque præterea esset litteris
comprehensum. In Africano mox litore apud Hipponem Diarrhyton delphin ab
Hipponensibus pastus est, tractandumque se præbuit, impositos quoque frequenter
gestitavit. Nec populi tantum manibus acta res est, nam et proconsul Africæ
Flavianus ipse eum contigit, unguentis etiam delibuit; qua odoris novitate
obsopitus, aliquantisper pro exanimi jactitatus est, multisque mensibus descivit
a solita conversatione. Apud Jasum urbem Babylonem puerum delphinus adamavit,
quem dum post assueta colludia recedentem impatientius sequitur, arenis invectus
hæsit. Alexander Magnus amorem illum numinis fuisse interpretatus, præfecit
puerum Neptuni sacerdotio. Juxta eamdem urbem, ut Hiegesidemus auctor est, alium
puerum Hermian nomine, per maria similiter insidentem, quum undosior fluctus
necavisset, delphin ad terram revexit; et, velut fateretur reatum, pnitentiam
suam morte multavit, nec reverti voluit amplius in profunda. Suppetunt et alia
exempla, ut Arionem transeamus, cujus exitum annalium comprobavit fides. Ad hæc
si quando lasciviunt novi ftus, a majoribus datur adultior gregi custos, quo
magistro discant eludere impetus incursantium belluarum: quanquam ibi præter
phocas rara bellua est.
Plurimus thynnus in Ponto, nec alibi pæne
ftificant:nusquam enim citius adolescunt, scilicet ob aquas dulciores.
Ingrediuntur veris tempore; intrant dextero, lævo exeunt. Hoc inde accidere
credunt, quod dexteris oculis acutius cernant, quam sinistris.
XIV. Flumen Istrum. Fiber Ponticus. Gemma Pontica.
Ister Germanicis jugis oritur, effusus monte, qui Rauracos Galliæ
adspectat. Sexaginta amnes in se recipit, ferme omnes navigabiles. Septem ostiis
Pontum influit: quorum primum Peuce, secundum Naracustoma, tertium Calonstoma,
quartum Pseudostoma: nam Borionstoma, ac deinde Stenonstoma, languidiora sunt
ceteris. Septimum vero pigrum, ac palustri specie, non habet quod amni
comparetur. Priora quatuor ita magna sunt, ut per longitudinem quadraginta
millium passuum non misceantur æquori, dulcemque haustum incorrupto detineant
sapore.
Per universum Pontum fiber plurimus, quem alio vocabulo dicunt
castorem. Lytris similis est, animal morsu potentissimum, adeo ut quum hominem
invadit, conventum dentium non prius laxet, quam concrepuisse persenserit fracta
ossa. Testiculi ejus appetuntur in usum medelarum: idcirco quum urgeri se
intelligit, ne captus prosit, ipse geminos suos devorat.
Mittit Pontus
et gemmas, quas a patria Ponticas dicimus, genere diverso: quippe aliæ aureas,
aliæ sanguineas habent stellas, et eæ quidem inter sacras habentur: nam quæ
ostentationi potius, quam usui deliguntur, non guttis aspersæ sunt, sed longis
colorum ductibus liniantur.
XV. Amnis Hypanis, et fons
Exampeus.
Hypanis oritur inter Auchetas, Scythicorum amnium
princeps, purus et haustu saluberrimus, usque dum Callipidum terminis inferatur,
ubi fons Exampeus infamis est amara scaturigine: qui Exampeus liquido admixtus
fluori, amnem vitio suo vertit, adeo ut dissimilis sibi in maria condatur. Ita
inter gentium opiniones fama de Hypane discordat: qui in principiis eum norunt,
prædicant; qui in fine experti sunt, non injuria execrantur.
XVI. Scythicarum gentium varia miracula. In his de natura canum,
de smaragdo lapide, de cyaneo lapide, de crystallo.
Apud Neuros
nascitur Borysthenes flumen, in quo pisces egregii saporis, et quibus ossa nulla
sunt, nec aliud quam cartilagines tenerrimæ. Verum Neuri, ut accepimus, statis
temporibus, in lupos transfigurantur; deinde exacto spatio, quod huic sorti
attributum est, in pristinam faciem revertuntur. Populis istis deus Mars est:
pro simulacris enses colunt. Homines victimas habent. Ossibus adolent ignes
focorum.
Geloni ad hos proximant. De hostium cutibus et sibi indumenta
faciunt, et equis suis tegmina. Gelonis Agathyrsi colliminantur, cærulo picti
colore, fucatis in cærulum crinibus. Nec hoc sine differentia: nam quanto quis
anteit, tanto propensiore nota tingitur, ut sit indicium humilitatis minus
pingi.
Post Anthropophagi, quibus execrandi cibi sunt humana viscera.
Quem morem impiæ gentis adjacentium terrarum prodit tristissima solitudo, quas
ob nefarium ritum finitimæ nationes metu profugæ reliquerunt. Et ea causa est,
ut usque ad mare; quod Tabin vocant, per longitudinem ejus oræ, quæ æstivo
orienti objacet, sine homine terra sit, et immensa deserta, quoad perveniatur ad
Seras. Chalybes et Dahæ in parte Asiaticæ Scythiæ crudelitate ab immanissimis
nihil discrepant.
At Albani in ora agentes, qui posteros se Jasonis
credi volunt, albo crine nascuntur, canitiem habent auspicium capillorum: ergo
capitis color genti nomen dedit. Glauca oculis inest pupula: ideo nocte plus,
quam die cernunt. Apud hos populos nati canes feris anteponuntur, frangunt
tauros, leones premunt, detinent quidquid objectum est: ex quibus causis
meruerunt etiam annalibus tradi. Legimus petenti Indiam Alexandro, a rege
Albaniæ dono duos missos, quorum alter sues sibi et ursos oblatos usque eo
sprevit, ut offensus degeneri præda, ignavo similis diu accubaret: quem per
ignorantiam velut inertem Alexander exstingui imperavit. Alter vero monitu
eorum, qui donum prosequuti fuerant, leonem missum necavit; mox, viso elephanto,
notabiliter exsultans, belluam primum astu fatigavit, deinde cum summo
spectantium horrore terræ afflixit. Hoc genus canes crescunt ad formam
amplissimam, terrificis latratibus ultra rugitus insonantes. Hæc sunt de canibus
Albanis: reliqua communia universis. Dominos æqualiter omnes canes diligunt,
sicut exemplis patet. In Epiro denique domini percussorem in ctu agnitum
latratu canis prodidit. Jaso Lycio interfecto, canis ipsius aspernatus cibum
inedia obiit. Lysimachi regis canis flammis se injecit, accenso rogo domini, et
pariter ibi absumptus est. Garamantum regem ducenti canes ab exsilio reduxerunt
prliati adversum resistentes. Colophonii et Castabalenses, canibus in bella
productis, primas acies instruebant. Appio Junio, P. Sicinio consulibus,
damnatum dominum canis, quum abigi non posset, comitatus in carcerem, mox
percussum ululatu prosequutus est: quumque ex miseratione populi Romani potestas
ei cibi fieret, ad os defuncti escam tulit: ultimo dejectum in Tiberim cadaver
adnatans sustentare conatus est. Canes soli nomina sua recognoscunt; itinerum
meminerunt. Indi coitus tempore in saltibus religant canes feminas, ut cum his
tigrides cant, quarum ex primis conceptibus ob nimiam feritatem inutiles partus
judicant, itidem secundos, tertios educant. Aegyptii canes e Nilo nunquam nisi
currentes lambitant, dum a crocodilis insidias cavent.
Inter
Anthropophagos in Asiatica parte numerantur Essedones, qui et ipsi nefandis
funestantur inter se cibis. Essedonum mos est, parentum funera prosequi
cantibus, et proximorum corrogatis ctibus, cadavera ipsa dentibus lancinare, ac
pecudum mixta carnibus dapes facere: capitum etiam ossa auro incincta in
poculorum tradere ministerium. Scythotauri pro hostiis cædunt advenas. Nomades
pabula sequuntur. Georgi in Europa siti, agros exercent. Axiacæ perinde in
Europa siti, neque mirantar aliena, neque sua diligunt. Satarchæ usu auri
argentique damnato, in æternum se a publica avaritia vindicarunt. Scytharum
interius habitantium asperior ritus est: specus incolunt; pocula non ut
Essedones, sed de inimicorum capitibus moliuntur; amant prlia; interemptorum
cruorem e vulneribus ipsis bibunt. Numero cædium honor crescit, quarum expertem
esse apud eos probrum est. Haustu mutui sanguinis fdus sanciunt, non suo tantum
more, sed Medorum quoque usurpata disciplina. Bello denique, quod gestum est
olympiade nona et quadragesima, anno post Ilium captum sexcentesimo quarto,
inter Alyattem Lydum et Astyagem Mediæ regem, hoc pacto firmata sunt jura pacis.
Colchorum urbem Dioscoriadem Amphitus et Cercius aurigæ Castoris et
Pollucis condiderunt, a quibus Heniochorum gens exorta est. Ultra Sauromatas in
Asia sitos, qui Mithridati latebram, et quibus originem Medi dederunt, confines
sunt Thalli, his nationibus quas ab oriente contingunt. Caspii maris fauces: quæ
fauces mirum in modum maciantur imbribus, crescunt æstibus. Heniochorum montes
Araxem; Moschorum, Phasidem fundunt. Sed Araxes brevibus intervallis ab
Euphratis ortu caput tollit, ac deinde in Caspium fertur mare. Arimaspi circa
Gesclithron positi, unocula gens est. Ultra Hos et Riphæum jugum regio est
assiduis obsessa nivibus: Pterophoron dicunt, quippe casus continuantium
pruinarum quiddam ibi exprimit simile pinnarum. Damnata pars mundi, et a rerum
natura in nubem æternæ caliginis mersa, ipsisque prorsus aquilonis conceptaculis
rigentissima. Sola terrarum non novit vices temporum, nec de clo aliud accipit,
quam hiemem sempiternam. In Asiatica Scythia terræ sunt locupletes,
inhabitabiles tamen: nam quum auro et gemmis affluant, grypes tenent universa,
alites ferocissimæ, et ultra omnem rabiem sævientes: quarum immanitate
obsistente ad venas divites accessus difficilis ac rarus est: quippe visos
discerpunt, velut geniti ad plectendam avaritiæ temeritatem. Arimaspi cum hi,
dimicant, ut intercipiant lapides, quorum non aspernabimur persequi qualitatem.
Smaragdis hic locus patria est, quibus tertiam inter lapides dignitatem
Theophrastus dedit: nam licet sint et Aegyptii, et Chalcedonii, et Medici, et
Laconici, præcipuus est honor Scythicis. Nihil his jucundius, nihil utilius
vident oculi. In primis virent ultra aquaticum gramen, ultra amnicas herbas;
deinde obtutus fatigatos coloris reficiunt lenitate: nam visus, quos alterius
gemmæ fulgor retuderit, smaragdi recreant, et exacuunt. Nec aliam ob causam
placuit, ut non sculperentur, ne offensum decus, imaginum lacunis corrumperetur:
quanquam qui verus est, difficulter vulneretur. Probantur hoc pacto. si
adspectus transmittant; si quum globosi sunt, proxima sibi inficiant ære
repercusso; aut quum concavi sunt, inspectantium facies æmulentur; si neque
umbra, neque lucernis, neque sole mutentur. Optimos tamen sortiuntur situs,
quibus planities resupina est et extenta; inveniuntur etesiis flantibus: tunc
enim detecto solo facillime internitent: nam etesiæ plurimum arenas movent. Alii
minus nobiles in commissuris saxorum, vel in metallis ærariis apparent, quos
chalcosmaragdos nuncupant. Vitiosi eorum intrinsecus quasdam sordes habent, vel
plumbo, vel capillamentis, vel etiam sali similes. Laudantur austeri. Mero et
viridi proficiunt oleo, quamvis natura imbuuntur.
Et cyaneus e Scythia
est optimus, si cærulo coruscabit: cujus gnari in marem et feminam genus
dividunt. Feminis nitor purus est; mares punctillis ad gratiam interlucentibus
auratilis pulviculus variat.
Istic et crystallus, quem licet pars major
Europæ et particula Asiæ subministret, pretiosissimum tamen Scythia edit. Multus
ad pocula destinatur, quamlibet nihil aliud quam frigidum pati possit.
Sexangulus invenitur. Qui eligunt, purissimum captant, ne quid rufum, ne
nubilum, vel spumis obsitum arceat perspicuitatem: tum ne duritia justo
propensior obnoxium fragilitati magis faciat. Putant glaciem coire, et in
crystallum corporari; sed frustra: nam si ita foret, nec Alabanda Asiæ, nec
Cypros insula hanc materiam procrearent, quibus regionibus incitatissimus calor.
Livia Augusti ad magnitudinem centum et quinquaginta librarum inter Capitolina
donaria crystallum dicavit.
XVII. De Hyperboreis, et
Hyperboreæ regionibus.
Fabula erat de Hyperboreis, et rumor irritus,
si quæ illinc ad nos usque fluxerunt, temere forent credita. Sed quum probissimi
auctores, et satis vero idonei sententias pares faciant, nullus falsum
reformidet. De Hyperboreis rem loquemur. Incolunt pone Pterophoron, quam ultra
aquilonem accipimus jacere. Gens beatissima. Eam Asiæ quidam magis, quam Europæ
dederunt. Alii statuunt mediam inter utrumque solem, antipodum occidentem, et
nostrum renascentem; quod aspernatur ratio, tam vasto mari duos orbes
interfluente. Sunt igitur in Europa, apud quos mundi cardines esse credunt, et
extimos siderum ambitus, semestrem lucem, aversum uno tantum die solent;
quanquam exsistant, qui putant non quotidie ibi solem, ut nobis, sed vernali
æquinoctio exoriri, autumnali occidere: ita sex mensibus infinitum diem, sex
aliis continuam esse noctem. De clo magna clementia; auræ spirant salubriter:
nihil noxii flatus habent. Domus sunt nemora, vel luci. In diem victum arbores
subministrant. Discordiam nesciunt. Ægritudine non inquietantur. Ad innocentiam
omnibus æquale votum. Mortem accersunt, et voluntario interitu castigant obeundi
tarditatem: quos satietas tenet vitæ, epulati delibutique, de rupe nota
præcipitem casum in maria destinant. Hoc sepulturæ genus optimum arbitrantur.
Aiunt etiam solitos per virgines probatissimas primitiva frugum Apollini Delio
missitare. Verum hæ quoniam perfidia hospitum non illibatæ revenissent,
devotionis, quam peregre prosequebantur, pontificium mox intra fines suos
receperunt.
XVIII. De Arimphæis, et aliis Scytharum
gentibus, de tigridibus, de pantberis, de pardis.
Altera in Asia
gens ad initium orientis æstivi, ubi deficiunt Riphæorum montium juga.
Hyperboreis similes dicunt Arimphæos. Et ipsi frondibus arbustorum gaudent;
baccas edunt. Juxta viros ac feminas tædet crinium. Ita uterque sexus comas
tondet. Amant quietem, non amant lædere. Sacri habentur, attrectarique eos,
etiam a ferocissimis nationibus nefas ducitur. Quicumque periculum a suis
metuit, si ad Arimphæos transfugerit, tutus est, velut asylo tegatur.
Ultra hos Cimmerii, et gens Amazonum porrecta ad Caspium mare, quod
delapsum per Asiaticæ plagæ terga Scythicum irrumpit oceanum.
Sed magnis
deinde spatiis intercedentibus, ostia Oxi fluminis Hyrcani habent, gens silvis
aspera, copiosa immanibus feris, fta tigribus: quod bestiarum genus insignes
maculis notæ, et pernicitas memorabile reddiderunt. Fulvo nitent: hoc fulvum
nigrantibus segmentis interundatum, varietate apprime decet. Pedum motum nescio
velocitas, an pervicacia magis adjuvet. Nihil tam longum est, quod non brevi
penetrent; nihil adeo antecedit, ut non illico assequantur. Ac maxime potentia
earum probatur, quum maternis curis incitantur. Quum catulorum insistunt
raptoribus, succedant sibi equites licet, et fuga quantalibet, astu quantolibet,
amoliri prædam velint, ni in præsidio maria fuerint, frustra est ausum omne.
Notantur frequentissime, si quando latrones suos asportatis catulis renavigantes
vident, in litore irrita rabie cernuari, velut propriam tarditatem voluntaria
castigantes ruina: quanquam de ftu universo vix unus queat subtrahi.
Pantheræ quoque numerosæ sunt in Hyrcania, minutis orbiculis superpictæ,
ita ut oculatis ex fulvo circulis; vel cærula, vel alba distingatur tergi
supellex. Tradunt odore earum et contemplatione armenta mire affici, atque ubi
eas persentiscant, properato convenire, nec terreri nisi sola oris torvitate:
quam ob causam pantheræ absconditis capitibus, quæ corporis reliqua sunt,
spectanda præbent, ut pecuarios greges stupidos in obtutum populentur secura
vastatione. Sed Hyrcani, ut hominibus intentatum nihil est, frequentius eas
veneno, quam ferro, necant. Aconito carnes illinunt, atque ita per compita
spargunt semitarum: quas ubi esæ sunt, fauces earum angina obsidentur. Ideo
gramen pardalianchen appellaverunt. Sed pantheræ adversus hoc virus excrementa
humana devorant, et suopte ingenio pesti resistunt. Lenta illis vivacitas, adeo
ut ejectis interaneis mortem diu differant. In his silvestribus et pardi sunt,
secundum a pantheris genus, noti satis, nec latius exsequendi. Quorum
adulterinis coitibus degenerantur partus leænarum, et leones quidem procreantur,
sed ignobiles.
XIX. Unde mediterranea maria
oriantur.
Quoniam in Ponticis rebus sumus, non erit omittendum, unde
mcditerranea maria caput attollant. Existimant enim quidam sinus istos a
Gaditano freto nasci, nec aliam esse originem, quam eliquia irrumpentis Oceani:
cujus spiritu pervadente apud aliquot mediterranea litora, sicut in Italiæ
parte, fieri accessus, vel recessus. Qui contrarium sentiunt, omnem illum
fluorem aiunt a Ponticis faucibus inundare, idque fulciunt argumento non inani,
quod æstus e Ponto profluus nunquam reciprocetur.
XX.
De insulis Scythicis, de oceano Septentrionali, de spatiis inter Scythas et
lndos, de formis hominum, de cervis, de tragelaphis.
Insula
Apollinitarum octogintis millibus passuum abest a Bosphoro Thracio citra Istrum
sita, ex qua Marcus Lucullus Apollinem Capitolinum nobis extulit. Ante
Borusthenem Achillis insula est, cum æde sacra, quam ædem nulla ingreditur ales;
et quæ forte advolaverit, raptim fugam properat.
Oceanum Septentrionalem
ex parte, qua a Paropamiso amne Scythiæ alluitur, Hecatæus Amalchium appellat,
quod gentis illius lingua significat congelatum. Philemon a Cimbris ad
promontorium Rubeas Morimarusam dicit vocari, hoc est Mortuum mare.
Ultra Rubeas id quidquid est, Cronium nominant. Mare autem Caspium ex
altero Ponti latere ultra Massagetas et Apalæos Scythas, esse in Asiatica plaga
dulce haustu Alexandro Magno probatum est, mox Pompeio Magno, qui bello
Mithridatico, sicut commilito ejus Varro tradit, ipsis haustibus periclitari
fidem voluit. Id evenire produnt e numero fluminum, quorum tanta copia ibi
confluit, ut naturam maris vertant.
Non omiserim, quod per idem tempus
eidem Magno licuit ex India diebus octo ad Bactros usque Dalerum flumen, quod
influit Oxum amnem, pervenire; deinde in mare Caspium; inde per Caspium ad Cyri
amnis penetrare fluentum, qui et Iberiæ Armeniæ fines interluit. Itaque a Cyro,
diebus non amplius quinque itinere terreno subvectis navibus, ad alveum Phasidis
pertendit: per cujus excursus in Pontum usque Indos advehi liquido probatum est.
Auctor est Xenophon Lampsacenus, a litore Scytharum in insulam Abalciam
triduo navigari: ejus magnitudinem immensam, et pæne similem continenti: nec
longe Oæones separari; quas qui habitent, vivant ovis avium marinarum, et avenis
vulgo nascentibus; perinde alias propter constitutas æque insulas, quarum
Hippopodes indigenæ humana usque ad vestigium forma in equinos pedes desinunt;
esse et Phannesiorum, quorum aures adeo in effusam magnitudinem dilatentur, ut
viscerum reliqua illis contegant, nec amiculum aliud sit, quam ut membra
membranis aurium vestiant. Antequam digredimur ab Scythia, religio est
præterire, quænam ibi sint feræ peculiares.
Cervi plurimi in hac terra.
Igitur cervos persequamur. Mares generis hujusce quum statum tempus venerem
incitavit, sæviunt rabie libidinis efferati. Feminæ, licet prius conserantur,
non concipiunt ante Arcturi sidus. Nec qualibet partus suos educant. Teneros
studiose occulunt, et absconditos inter profunda fruticum, vel herbarum, pedum
verbere castigant ad latendum. Quum maturuit ad fugam robur, exercitio docent
cursus, et assuescunt salire per abrupta. Acceptis canum latratibus, secundo
vento vias dirigunt, ut odor cum ipsis recedat. Mirantur sibilum fistularum.
Rectis auribus acutissime audiunt, submissis nihil. Stupent omnia: propterea
facilius obvios se præbent sagittantibus. Si maria tranant, non aspectu petunt
litora, sed olfactu: infirmos ponunt in ultimo, et lassorum capita clunibus per
vices sustinent. E cornibus quod dextrum fuerit efficacius est ad medelam; si
fugare angues gestias, utrum velis, uras; quæ ustrina præterea nidore vitium
aperit ac detegit, si cui inest morbus comitialis. Pro ætate ramulos augent. Id
incrementum in sexennes perseverat; deinceps numerosiora non possunt fieri
cornua, possunt crassiora. Quæ quidem castratis nunquam crescunt, nec tamen
decidunt. Dentes monstrant senectutem, quum aut pauci inveniuntur, aut nulli.
Serpentes hauriunt, et spiritu narium extrahunt de latebris cavernarum.
Dictamnum ipsi prodiderunt, dum ex eo pasti excutiunt accepta tela. Herbam
quoque, quam cynaren vocant, contra noxia edunt gramina. Adversum venena
mirificum est hinnulei coagulum, occisi in matris utero. Patuit nunquam eos
febrescere: quam ob causam confecta ex medullis eorum unguina sedant calores
hominum languentium. Legimus plurimos matutinis diebus cervinam carnem degustare
solitos, sine febribus longævos fuisse: quod demum proderit, si uno vulnere
fuerint interfecti. Ad dignoscendam vivacitatem Alexander Magnus torques
plurimis cervis innexuit, qui post annum centesimum capti, necdum senii judicium
præferebant.
Eadem pæne specie sunt, quos tragelaphos dicunt, sed non
alibi, quam circa Phasidem apparent: tantum quod illi villosos habent armos, et
menta promissis hirta barbis.
XXI. Germania. In ea de
avibus Hercyniis, de bisontibus, de uris, de alce. Item de alce Gangaviæ insulæ,
de succino, de callaico lapide, de ceraunio albo.
Mons Sevo ipse
ingens, nec Riphæis minor collibus, initium Germaniæ facit. Ingævones tenent, a
quibus primis post Scythas nomen Germanicum consurgit. Dives virorum terra,
frequens populis numerosis, et immanibus. Extenditur inter Hercynium saltum et
rupes Sarmatarum. Ubi incipit, Danubio; ubi desinit, Rheno perfunditur. De
internis ejus partibus, Albis, Guthalus, Vistula, amnes latissimi præcipitant in
Oceanum.
Saltus Hercynius aves gignit quarum pinnæ per obscurum emicant
et interlucent, quamvis densa nox denset tenebras. Inde homines plerumque
nocturnos excursus sic destinant, ut illis utantur ad præsidium itineris
dirigendi, præjactisque per opaca callium rationem viæ moderentur indicio
plumarum refulgentium.
In hoc tractu sane, et in omni septentrionali
plaga bisontes frequentissimi, qui bovis feri similes, setosi colla, jubas
horridi, ultra tauros pernicitate, capti assuescere manu nesciunt.
Sunt
et uri, quos imperitum vulgus vocat bubalos: quum bubali pæne ad cervinam faciem
in Africa procreentur. Istis porro, quos uros dicimus, taurina cornua in tantum
modum protenduntur, ut dempta ob insignem capacitatem inter regias mensas potuum
gerula fiant.
Est et alces mulis comparanda, adeo propenso labro
superiore, ut nisi recedens in posteriora vestigia pasci non queat.
Gangavia insula a regione Germaniæ emittit animal, quale alces, sed
cujus suffragines, ut elephantis, flecti nequeunt: propterea non cubat, quum
dormiendum est, tamen somnulentam arbor sustinet, quæ ad prope casuram secatur,
ut fera, dum assuetis fulmentis innititur, faciat ruinam. Ita capitur; alioqui
difficile est eam mancipari: nam in illo rigore poplitum incomprehensibili fuga
pollet. De Germanicis insulis Cangavia maxima est, sed nihil in ea magnum,
præter ipsam.
Nam Glesaria dat crystallum, dat et succinum, quod
succinum Germani gentiliter vocant glæsum. Qualitas materiæ istius summatim
antea, Germanico autem Cæsare, omnes Germaniæ oras scrutante, comperta arbor est
pinei generis, cujus mediale autumni tempore succino lacrymat. Succum esse
arboris, de nominis significatione capessas: verum unde profluit, si usseris,
odor indicabit. Pretium operæ est ire longius, ne Padanæ silvæ credantur lapidem
flevisse. Hanc speciem in Illyricum barbari intulerunt: quæ quum per Pannonica
commercia usu ad Transpadanos homines foret devoluta, quod ibi primum nostri
viderant, ibi etiam natam putaverunt. Munere Neronis principis apparatus omnis
succino inornatus est: nec difficulter, quum per idem tempus tredecim millia
librarum rex Germaniæ donum ei miserit. Rude primum nascitur et corticosum,
deinde incoctum adipe lactentis suis expolitur ad quem videmus nitorem. Pro
facie habet nomina: melleum dicitur et Falernum: utrumque de similitudine aut
vini, aut utique mellis. In aperto est, quod rapiat folia, quod trahat paleas:
quod vero medeatur multis vitalium incommodis, medentium docuit disciplina. Et
India habet succinum; sed Germania plurimum optimumque.
Quoniam ad
insulam Glæsariam veneramus, a succino cptum. Nam in Germaniæ continentibus
callaica reperitur, quam gemmam Arabicis anteponunt: vincit enim gratia. Arabes
quidem dicant non alibi eam deprehendi, quam in nidis avium, quas melancoryphos
vocant: quod nullus recepit, quum apud Germaniæ populos (quamvis rara ) in saxis
tamen pareat. Honore et pretio ad smaragdos, viret pallidum; nihil jucundius
aurum decet.
Cerauniorum porro genera divrsa sunt; Germanicum candidum
est: splendet tamen cærulo, et si sub divo habeas, fulgorem rapit siderum.
XXII. Gallia, et ex ea itinerarium. Item de oleo
Medico.
Galliæ inter Rhenum et Pyrenæum, item inter Oceanum et
montes Cebennam ac Juram porriguntur, felices præpinguibus glebis, accommodæ
proventibus fructuariis: pleræque consitæ vitibus et arbustis, omni ad usum
animantium ftu beatissimæ; riguæ aquis fluminum, et fontium; sed fontaneis
interdum sacris, ac vaporantibus. Infamantur ritu incolarum, qui, ut aiunt (veri
enim periculum non ad me recipio), detestabili sacrorum ritu, injuria
religionis, humanis litant hostiis. Ex isto sinu quoquo orbis velis, exeas; in
Hispanias, et in Italiam terra marique; in Africam mari tantum; si Thracia sit
petenda, excipit ager Rhæticus opimus, et ferax; inde Noricus, qua subducitur a
jugis Alpium, admodum lætus; dehinc Pannonia solo plano uberique, Dravo Savoque
inclytis amnibus circumflua; mox Msiæ, quas majores nostri jure Cereris horreum
nominabant, in quarum parte, quæ Pontica est, apparet herba, qua inficitur
oleum, quod vocant Medicum. Hoc ad incendium excitatum si obruere aqua gestias,
ardet magis, nec alio sopitur, quam jactu pulveris.
XXIII. Britannia. In ea de lapide gagate, et de gentibus
barbaris, insulisque circa eam claris.
Finis erat orbis ora Gallici
litoris, nisi Britannia insula non qualibet amplitudine nomen pæne orbis
alterius mereretur. Octingenta et amplius millia passuum longa detinet: ita ut
eam in Calidonicum usque angulum metiamur: in quo recessu Ulyxem Calidoniæ
appulsum manifestat ara Græcis litteris scripta Votum. Multis insulis nec
ignobilibus circumdatur: quarum Hibernia ei proximat magnitudine, inhumana
incolarum ritu aspero: alioquin ita pabulosa, ut pecua ibi nisi interdum a
pascuis arceantur, in periculum agat satias. Illic nullus anguis, avis rara,
gens inhospita, et bellicosa. Sanguine interemptorum hausto prius victores
vultus suos oblinunt. Fas ac nefas eodem loco ducunt. Puerpera, si quando marem
edidit, primos cibos gladio imponit mariti, inque os parvuli summo mucrone
auspicium alimentorum leviter infercit, et gentilibus votis optat, non aliter
quam in bello et inter arma mortem oppetat. Qui student cultui, dentibus mari
nantium belluarum insigniunt ensium capulos: candicant enim ad eburnam
claritatem: nam præcipua viris gloria eat in armorum nitela. Apes non habent:
advectum inde pulverem si quis sparserit inter alvearia, examina favos deserunt.
Mare quod Hiberniam et Britanniam interluit, undosum inquietumque toto in anno,
nonnisi pauculis diebus est navigabile. Navigant autem vimineis alveis, quos
circumdant ambitione tergorum bubulorum: quantocumque tempore cursus tenebit,
navigantes escis abstinent. Freti latitudinem in centum viginti millia passuum
diffundi, qui fidem ad verum ratiocinati sunt, æstimarunt.
Siluram
quoque insulam ab ora, quam gens Britanna Dumnonii tenent, turbidum fretum
distinguit. Cujus homines etiamnum custodiunt morem vetustum: nummum refutant;
dant res, et accipiunt; mutationibus necessaria potius quam pretiis parant. Deos
percolunt; scientiam futurorum pariter viri ac feminæ ostentant.
Adtanatos insula adspiratur freto Gallico, a Britanniæ continente
æstuario tenui separata, frumentariis campis felix et gleba uberi, nec tantum
sibi, verum et aliis salubris locis: nam quum ipsa nullo serpatur angue,
asportata inde terra quoquo gentium invecta sit, angues necat.
Multæ et
aliæ circum Britanniam insula, e quibus Thyle ultima, in qua æstivo solstitio
sole de Cancri sidere faciente transitum nox pæne nulla: brumali solstitio dies
adeo conductus, ut ortus junctus sit occasui. A Calidoniæ promontorio Thylen
petentibus bidui navigatione perfecta excipiunt Hebudes insulæ, quinque numero,
quarum incolæ nesciunt fruges, piscibus tantum et lacte vivunt. Rex unus est
universis: nam quotquot sunt, omnes angusta interluvie dividuntur. Rex nihil
suum habet, omnia universorum: ad æquitatem certis legibus stringitur; ac ne
avaritia devertat a vero, discit paupertate justitiam, utpote cui nihil sit rei
familiaris: verum alitur de publico. Nulla illi datur femina propria, sed per
vicissitudines, in quamcumque commotus fuerit, usurariam sumit. Unde ei nec
votum, nec spes conceditur liberorum. Secundam a continenti stationem Orcades
præbent: sed Orcades ab Hebudibus porro sunt septem dierum, totidemque noctium
cursu, numero tres. Vacant homine; non habent silvas, tantum junceis herbis
inhorrescunt. Cetera earum nudæ arenæ. Ab Orcadibus Thylen usque quinque dierum
ac noctium navigatio est. Sed Thyle larga et diutina pomona copiosa est. Qui
illic habitant, principio veris inter pecudes pabulis vivunt, deinde lacte. In
hiemem compereunt arborum fructus. Utuntur feminis vulgo; certum matrimonium
nulli. Ultra Thylen pigrum et concretum mare. Circuitus Britanniæ quadragies
octies septuaginta quinque millia passuum sunt. In quo spatio magma et multa
flumina, fontes calidi opiparo exculti apparatu ad usus mortalium: quibus
fontibus præsul est Minervæ numen, in cujus æde perpetui ignes nunquam canescunt
in favillas, sed ubi ignis tabuit, vertit in globos saxeos.
Præterea, ut
taceam metallorum largam variamque copiam, quibus Britanniæ solum undique
generum pollet venis locupletibus, gagates hic plurimus optimusque est lapis: si
decorem requiras, nigro gemmeus; si naturam, aqua ardet, oleo restinguitur; si
potestatem, attritu calefactus applicita detinet, atque succinum. Regionem
partim tenent barbari, quibus per artifices plagarum figuras, jam inde a pueris
variæ animalium effigies incorporantur, inscriptisque visceribus hominis
incremento pigmenti notæ crescunt: nec quidquam mage patientiæ loco nationes
feræ ducunt, quam ut per memores cicatrices plurimum fuci artus bibant.
XXIV. Hispania. In ea de ceraunio rubro, de Gaditano
freto et Mediterraneo mari, de Oceano.
Reversos ad continentem res
Hispanienses vocant. Terrarum plaga comparanda optimis, nulli posthabenda frugum
copia et soli ubere, sive vinearum proventus respicere, sive arborarios velis.
Omni materia affluit, quæcumque aut pretio ambitiosa est, aut usu necessaria.
Argentum vel aurum requiras, habet; ferrariis nunquam deficit; nec cedit
vitibus, vincit olea. Dividua est provinciis tribus, secundo Punico bello nostra
facta. Nihil in ea otiosum, nihil sterile. Quidquid cujuscumque modi negat
messem, viget pabulis: etiam quæ arida sunt ab sterilitate, rudentum materias
nauticis subministrant. Non coquunt ibi sales, sed effodiunt. Depurgant in
minium nitelas pulveris. Fucant vellera, ut ad ruborem merum deputent cocci
venenum. In Lusitania promontorium est, quod Artabrum alii, Olysipponense,
dicunt. Hoc clum, terras, maria distinguit: terris, Hispaniæ latus finit; clum
et maria hoc modo dividit, quod a circuitu ejus incipiunt Oceanus Gallicus, et
fons septentrionalis, oceano Atlantico et occasu terminatis. Ibi oppidum
Olysippone Ulyxi conditum; ibi Tagus flumen. Tagum ob arenas auriferas ceteris
ibi amnibus prætulerunt. In proximis Olysipponis equæ lasciviunt mira
fecunditate: nam aspirante favonio vento concipiunt, et sitientes viros aurarum
spiritu maritantur. Iberus amnis toti Hispaniæ nomen dedit, Bætisprovinciæ:
uterque nobilis. Carthaginem apud Iberos, quæ mox colonia facta est, Pni
condiderunt; Tarraconem Scipiones: ideo est caput provinciæ Tarraconensis.
Lusitanum litus floret gemma ceraunio plurimum, quam etiam Indicis
præferunt. Hujus ceraunii color est e pyropo; qualitas igni probatur: quem si
sine detrimento sui perferat, adversum vim fulgurum creditur opitulari.
Cassiterides insulæ spectant adversum Celtiberiæ latus: plumbi fertiles, et tres
Fortunatæ, e quibus solum vocabulum signandum fuit. Ebusus e Balearibus, quæ a
Dianio abest septingenta stadia, serpentem non habet: utpote cujus terra
serpentes fuget. Colubraria, Sucronem versus, fta est anguibus. Bocchoris
regnum Baleares fuerunt, usque ad eversionem frugum cuniculis animalibus quondam
copiosæ. In capite Bæticæ, ubi extremus est noti orbis terminus, insula a
continenti septingentis passibus separatur: quam Tyrii a Rubro profecti mari,
Erythræam: Pni lingua sua Gadis, id est sepem, nominarunt. In hac Geryonem ævum
agitavisse plurimis monumentis probatur, tametsi quidam putent, Herculem boves
ex alia insula abduxisse, quæ Lusitaniam contuetur.
Sed Gaditanum fretum
a Gadibus dictum, Atlanticus æstus in nostrum mare discidio orbis immittit. Nam
Oceanus, quem Graii sic nominant de celeritate, ab occasu solis irrumpens, lævo
latere Europam radit, Africam dextro, scissisque Calpe et Abinna montibus, quas
dicunt columnas Herculis, inter Mauros funditur, et Hispaniam: ac freto isti,
cujus quindecim millia passuum efficit longitudo, latitudo vix septem, quodam
ostio aperit limen interni æquoris mixtus mediterraneis sinibus; quos ad usque
orientem propellit. Horum qui Hispanias perfundit, Ibericus fertur, et
Balearicus; qui Narbonensem provinciam, Gallicus; mox Ligusticus; ab eo ad
Siciliam Tuscus, quem Græci Ionium vel Tyrrhenum, Itali Inferum vocant; a
Sicilia Cretam usque Siculus; inde Creticus, qui in Pamphyliam et Ægyptum
pertendit; quæ aquarum moles torto in septentrionem prius latere, anfractibus
magnis juxta Græcias et Illyricum per Hellespontum in angustias stringitur
Propontidis: quæ Propontis Europam Asiamque discriminans, ad Mæotidem pervenit.
Causas nominum non uniformis dedit ratio; Asiaticum et Phnicium a provinciis
dictum; ab insulis Carpathium, Ægæum, Icarium, Balearicum, Cyprium; a gentibus
Ausonium, Dalmaticum, Ligusticum, Tuscum; ab oppidis Adriaticum, Argolicum,
Corinthium, Tyrium; a casibus hominum Myrtoum, Hellespontus; a memoria regis
Ionium: a bovis transitu, vel angustis etiam meatibus boum perviis, Bosporus; a
moribus accolarum, Euxinus, Axinus ante appellatus; ab ordine fluenti,
Propontis: Ægyptium pelagus Asiæ datur; Gallicum, Europæ; Africum, Libyæ: his ut
quæque proxima sunt, venerunt in partes partium. Hæc in gremiis terrarum.
Oras autem extimas Oceanus amplectitur, qui a litoribus suis Arabicus,
Persicus, Indicus, Eous, Sericus, Hyrcanus, Caspius, Scythicus, Germanicus,
Gallicus, Atlanticus, Libycus, Æthiopicus dicitur. Cujus accessus incrementa
circa litora Indiæ vehementissime proruunt, maximosque ibi exitus faciunt: sive
quod suspensus altius sustollatur vi caloris, seu quod in ea parte orbis et
fontium et fluminum copia sit effusior. Dubitatur etiamnum quibus ex causis
intumescat Oceanus, vel quatenus, quum superfluus sibi fuerit, rursus in se
residat. Nec in obscuro est, plura pro ingeniis disserentium, potius quam pro
veritatis fide expressa. Sed omisso ancipiti concurrentium quæstionum, has
opiniones probatissimas invenimus. Physici aiunt mundum animal esse, eumque ex
variis elementorum corporibus conglobatum, moveri spiritu, regi mente; quæ
utraque diffusa per membra omnia, æternæ molis vigorem exerceant. Sicut ergo in
corporibus nostris commercia sunt spiritalia, ita in profundis Oceani nares
quasdam mundi constituta, per quas emissi anhelitus, vel reducti, modo inflent
maria, modo revocent. At hi, qui siderum sequuntur disciplinam, contendunt
meatus istos commoveri lunæ cursibus: adeo ut vicissitudines inter maciem
aquarum et plenitudinem, respiciant adauctus ejus, vel eliquia; neque eodem
semper tempore, sed prout illa aut minuatur, aut crescat, variari alternantes
recursus.
XXV. Libya. Horti Hesperidum. Mons
Atlas.
De Hispania est excursus in Libyam: nam Belone progressos,
quod Bæticæ oppidum est, ultra interjaceus fretum trium et triginta millium
passuum Tingi excipit, Mauritaniæ nunc colonia, sed cujus primus auctor Antæus
fuit. Porro, quod in illo ambitu Ægyptium finitur pelagus, et Libycum incipit,
placuit, ut Africam, Libyam diceremus. Quidam tamen Libyam a Libye Epaphi filia,
Africam autem ab Afro, Libyis Herculis filio, potius dictam receperunt. Lix
quoque colonia in eodem tractu constituta est, ubi Antæi regia, qui implicandis
explicandisque nexibus humi melius sciens, velut genitus matre terra, ibidem
Herculi victus est.
Nam de hortis Hesperidum, et pervigili dracone, ne
famæ licentia vulneretur fides, ratio hæc est. Flexuoso meatu æstuarium e mari
fertur, adeo sinuosis lateribus tortuosum, ut visentibus procul lapsus angueos
fracta vertigine mentiatur; idque quod hortos appellavere, circumdat; unde
pomorum custodem interpretantes, struxerunt iter ad mendacium fabulandi. Sed hæc
insula insinuata sinibus alvei recurrentis, et in quibusdam æquoris spiris sita,
præter arbores oleastri similes, et aram sacram Herculi, aliud nihil præfert,
quo propaget vetustatis memoriam. Verum ultra frutices aureos et metalla
frondentia, illud magis mirum, quod solum inferiore licet libra depressius,
nunquam tamen accessu freti superlabitur; sed obstaculo naturalis repaguli in
ipsis marginibus hæret unda, et intimis orarum superciliis sponte fluctus ingrui
resistuntur: spectandum nimirum ingenium loci, planities manet sicca, quamvis
prona superveniant æquora. Sala oppidum imminet Salæ flumini. Ab hoc per
Autololum gentem iter est in Atlanticas solitudines.
Atlas mons e media
arenarum consurgit vastitate, et eductus in viciniam lunaris circuli, ultra
nubila caput condit: qua ad Oceanum extenditur, cui a se nomen dedit, manat
fontibus, nemoribus inhorrescit, rupibus asperatur, squalet jejunio, humo nuda,
nec herbida: qua Africæ contraversus est, felix nascentibus sponte frugibus,
arboribus proceris opacissimus, quarum odor gravis, comæ cupressi similes
vestiuntur lanugine, sericis velleribus nihil viliore. In eo latere et herba
euphorbia copiosa, cujus succus ad oculariam proficit claritatem, nec
mediocriter percellit vim venenorum. Vertex semper nivalis. Saltus ejus
quadrupedes, ac serpentes et feræ, et cum his elephanti occupaverunt. Silet per
diem universus, nec sine horrore secretus est; lucet nocturnis ignibus: choris
Ægipanum undique personatur: audiuntur et cantus tibiarum, et tinnitus
cymbalorum per oram maritimam. A Lixo abest quinque et ducentis millibus
passuum: Lix a Gaditano freto centum duodecim millibus. Habitatus ante, ut
indicat loci facies, quondam cultu exercita, in qua usque adhuc vitis et palmæ
exstat vestigium. Apex Perseo et Herculi pervius, ceteris inaccessus: ita fidem
ararum inscriptio palam facit. Qua spectat occasum, inter ipsum et flumen Anatim
per quadringenta nonaginta sex millia passuum infames bestiis silvæ obsident.
Amnes circa eum non tacendi: qui licet separentur intervallis
amplioribus, transierunt tamen in quoddam Atlantici nominis ministerium. Asana
marino haustu, Bambothum crocodilis et hippopotamis refertum. Ultra adhuc amnis,
qui atro colore exit per intimas et exustas solitudines, quæ torrente perpetuo,
et sole nimio, plus quam ignito, nunquam ab æstu vindicantur. Hæc de Atlante,
quem Mauri Adderim nominant, et Hannonis Punici libri, et nostri annales
prodiderunt; Juba etiam Ptolemæi filius, qui utriusque Mauritaniæ regno potitus
est. Suetonius quoque Paulinus summam huic cognitioni imposuit manum, qui ultra
Atlantem primus, et pæne solus Romana signa circumtulit.
XXVI. Mauritania. In ea de elephantis, de pugna eorum et
draconum. Unde cinnabari.
E provinciis Mauritanis Tingitana, qua
solstitiali plagæ obvia est, quaque porrigitur ad Internum mare, exsurgit
montibus septem: qui, a similitudine, Fratres appellati, freto imminent.
Hi montes elephantis frequentissimi, submonent a principio hoc
animantium genus dicere. Igitur elephanti juxta sensum humanum intellectus
habent, memoria pollent, siderum servant disciplinam. Luna nitescente gregatim
amnes petunt, mox exspersi liquore, solis exortum motibus, quibus possunt,
salutant: deinde in saltus revertuntur.
Duo eorum genera sunt:
nobiliores indicat magnitudo, minores nothos dicunt. Candore dentium
intelligitur juventas: quorum alter semper in ministerio est, alteri parcitur,
ne hebetatus assiduo repercussu, minus vigeat, si fuerit dimicandum. Quum venatu
premuntur, pariter affligunt utrosque, ut ebore damnato non requirantur: hanc
enim sibi causam inesse periculi sentiunt. Oberrant agminatim. Nam maximus ducit
agmen, ætate proximus cogit sequentes. Flumen transituri, minimos antemittunt,
ne majorum ingressu alveum atterant, et profundus gurgites depressis vadis
faciant. Venerem ante annos decem feminæ, ante quinque mares nesciunt. Biennio
cúunt, quinis nec amplius in anno diebus, non prius ad gregarium numerum
reversuri, quam vivis aquis abluantur. Propter feminas nunquam dimicant: nulla
enim noverunt adulteria.
Inest illis clementiæ bonum: quippe si per
deserta vagabundum hominem forte viderint, ductus usque ad notas vias præbent;
vel, si confertis pecoribus occursitent, itinera sibi blanda et placida manu
faciunt, ne quod obvium animal interimant. At conflictu fortuito si quando
pugnatur, non mediocrem habent curam sociorum: nam fessos vulneratosque in
medium receptant. Quum captivitate venerint in manus hominum, mansuescunt hausto
hordei succo. Maria transmeaturi, in naves non prius subeunt, quam de reditu
illis sacramentum luatur. Indicos elephantos Mauri timent, et parvitatis suæ
conscii aspernantur ab his videri. Non annis decem ut vulgus, sed biennio, ut
Aristoteles definit, utero gravescunt, nec amplius quam semel gignunt, nec
plures quam singulos. Vivunt annos trecentos. Impatientissimi frigoris. Truncos
edunt, lapides hauriunt, gratissimas in cibatu habent palmas. Odorem muris vel
maxime fugiunt: pabula etiam, quæ musculis contacta sunt, recusant. Si quis casu
chamæleontem devoraverit, vermem elephantis veneficum, oleastro sumpto pesti
medetur. Durissimum dorso tergus est, ventri mollius. Setarum hirsutia nullæ.
Inter hos et dracones jugis discordia. Denique insidiæ hoc astu præparantur:
serpentes propter semitas delitescunt, per quas elephanti assuetis callibus
evagantur: atque ita, prætermissis prioribus, postremos adoriuntur, ne qui
antecesserint, queant opitulari: ac primum pedes nodis illigant, ut laqueatis
cruribus impediant gradiendi facultatem: nam elephanti, nisi præventi hac
spirarum mora, vel arboribus se, vel saxis applicant, ut pondere nitibundo
attritos necent angues. Dimicationis præcipua causa est, quod elephantis, ut
aiunt frigidior inest sanguis: et ob id a draconibus avidissime torrente
captantur æstu. Denique nunquam invadunt, nisi potu gravatos, ut venis
propensius irrigatis majorem sumant de oppressis satietatem. Nec aliud magis,
quam oculos petunt, quos solos expugnabiles sciunt, vel interiora aurium, quod
is tantum locus defendi non potest promuscide. Itaque quum ebiberunt sanguinem,
dum ruunt belluæ, dracones obruuntur. Sic utrinque fusus cruor terram imbuit,
fitque pigmentum quidquid soli tinxerit, quod cinnabari vocant.
Elephantes Italia anno U. C. quadringentesimo septuagesimo secundo in
Lucanis primum bello Epirotico vidit, et boves Lucas inde dixit. Cæsariensi
colonia Cæsaria inest, a divo Claudio deducta, Bocchi prius regia, postmodum
Jubæ indulgentia populi Romani dono data. Inest et oppidum Siga, quod habitatum
Syphaci fuit. Nec ab Icosio taciti recedamus Hercule enim ilia transeunte,
viginti, qui a comitatu ejus desciverant, lucum deligunt, jaciunt múnia; ac ne
quis imposito a se nomine privatim gloriaretur, de condentium numero, urbi nomen
datum.
XXVII. Numidia. In ea de ursis.
Quod est a flumine Amsaga, Numidiæ datur. Hujus incolæ quamdiu errarunt
pabulationibus vagabundis, Nomades dicti sunt. Urbes in ea quam plurimæ
nobilesque, sed Cirta eminet, dein Chulli purpurario fuco Tyriis velleribus
comparatæ. Omnis hæc regio finibus in Zeugitanum limitem desinit. Qua parte
silvestris est, feras educat; qua jugis ardua est, equos alit. Eximio etiam
marmore prædicatur.
Numidici ursi forma ceteris præstant, rabie duntaxat
et villis profundioribus: nam genitura par est quoquo loco genitis. Eam protinus
dixero. Cúunt non itidem, quo quadrupedes aliæ; sed apti amplexibus mutuis,
velut humanis conjugationibus copulantur. Desiderium veneris hiems suscitat.
Secreti honore reverentur mares gravidas, et in iisdem licet foveis, partitis
tamen per scrobes secubationibus dividuntur. Lucinæ illis properatius tempus
est: quippe uterum trigesimus dies liberat: unde evenit, ut præcipitata
fecunditas informes creet partus. Carnes pauxillulas edunt, quibus color
candidus, oculi nulli, et de festina immaturitate tantum rudis sanies, exceptis
unguium lineamentis. Has lambendo sensim figurant, et interdum adpectoratas
fovent; ut assiduo incubatu calefactæ animalem trahant spiritum. Interea cibus
nullus. Sane diebus primis quatuordecim matres in somnum ita concidunt, ut nec
vulneribus excitari queant. Enixæ quaternis latent mensibus. Mox egressæ in diem
liberum, tantam patiuntur insolentiam lucis, ut putes obsitas cæcitate.
Invalidum ursis caput, vis maxima in brachiis et in lumbis: unde interdum
posticis pedibus insistunt. Insidiantur alvearibus apium, maxime favos appetunt,
nec avidius aliud, quam mella captant. Quum gustavere mandragoræ mala,
moriuntur; sed eunt obviam, ne malum in perniciem convalescat, et formicas
devorant ad recipiendam sanitatem. Si quando tauros adoriuntur, sciunt, quibus
potissimum partibus immorentur; nec aliud, quam cornua aut nares, petunt:
cornua, ut pondere defatigentur; nares, ut acrior dolor sit in loco teneriore.
M. Messala consule, Domitius Ænobarbus curulis ædilis ursos Numidicos
centum, et totidem Æthiopas venatores in Circo Romano edidit: idque spectaculum
inter memorabiles titulos annotatur.
XXVIII.
Africa cum Cyrenaiea regione. In ea de leonibus, de leontophona, de hyæna, de
lapide hyænio, de crocotta, de onagris, de serpentibus, de gemma heliotropio, de
Psyllis, de lapide nasamonite, de lapide cornu Hammonis, de arbore melopo, de
lacte sirpicio, de serpente basilico, de genere simiarum.
Omnis
Africa a Zeugitano pede incipit, promontorio Apollinis Sardiniæ contraversa:
promontorio Mercurii procedens in frontem Sicanam. Proinde extenta in duas
prominentias, quarum altera promontorium Candidum dicitur; alteram, quæ est in
Cyrenaica regione, Phucuntem vocant. Ea per sinum Creticum opposita Cretæ
insulæ, contra Tænaron Laconicæ excurrit. Arenis Catabathmi Ægypto insinuata,
cui proximi Cyrenenses, extenditur inter duas Syrtes, quas inaccessas vadosum ac
reciprocum mare efficit: cujus sali defectus, vel incrementa haud promptum est
deprehendere, ita incertis motibus nunc in brevia crescit dorsuosa, nunc
inundatur æstibus inquietis: et auctor est Varro, perflabilem ibi terram ventis
penetrantibus subitam vim spiritus citissimi; aut revomere maria, aut resorbere.
Omnis hæc plaga ab Æthiopia et terminis Asiæ Nigri flumine, qui Nilum parit, ab
Hispania freto scinditur: latere, quo ad meridiem vergit, fontium inops et
infamis siti; altrinsecus, qua septentrionem patitur, aquarum larga. In agro
Byzaceno, qui patet passuum ducenta vel amplius millia, glebis ita præpinguibus,
ut jacta ibi semina cum incremento centesimæ frugis renascantur. Externos ibi
plurimos conventasse, argumentum de urbibus et locis dabimus. Borion
promontorium, quod aquilone cæditur, Græci advenæ sic vocaverunt. Hipponem,
Regium postea dictum, item Hipponem alterum de interfluente freto Diarrhyton
nuncupatum, nobilissima oppida, equites Græci condiderunt. Clypeam civitatem
Siculi exstruunt, et Aspida primum nominant. Veneriam etiam, in quam Veneris
Erycinæ religiones transtulerunt. Achæi Tripolin lingua sua signant de trium
urbium numero, åæ, Sabratæ, Leptis Magnæ. Philænis fratribus a laudis cupidine
Graium vocamen datum. Adrymeto atque Carthagini auctor est a Tyro populus; sed
quæ super Carthagine veraces libri prodiderunt, hoc loco reddam. Urbem istam, ut
Cato in oratione senatoria autumat, quum rex Japon rerum in Libva potiretur,
Elissa mulier exstruxit domo Phúnix, et Carthadam dixit, quod Phúnicum ore
exprimit civitatem novam. Mox sermone verso in verbum Punicum, et hæc Elissa, et
illa Carthago dicta est: quæ post annos septingentos triginta septem exciditur,
quam fuerat constituta. Deinde a C. Graccho colonis Italicis data, et Junonia
dicta, aliquantisper ignobilis, humili et languido statu; demum in claritatem
secundæ Carthaginis, interjectis centum et duobus annis, M. Antonio, P.
Dolabella consulibus enituit, alterum post urbem Romam terrarum decus.
Verum, ut ad Africam redeam, interna ejus plurimæ quidem bestiæ, sed
principaliter leones tenent: qui, ut Aristoteles perhibet, soli ex eo genere,
quod dentatum vocant, vident protinus atque nascuntur. Quorum trifarium genus
scinditur: nam breviores, et jubis crispi, plerumque ignavi sunt et imbelles;
longiores, et coma simplici, acres magis ac potentes; at hi, quos creant pardi,
in plebe remanent, jubarum inopes. Pariter omnes parcunt a sagina, primum quod
alternis diebus potum, alternis cibum capiunt, ac frequenter, si digestio non
est insequuta, solitæ cibationi superponunt diem: tum, quod carnes justo amplius
devoratas, quum gravantur, insertis in ora unguibus sponte protrahunt. Sane et
quum fugiendum est in satietate, idem faciunt. Senectam defectio probat dentium.
Nam clementiæ indicia multa sunt: prostratis parcunt; in viros potius, quam in
feminas sæviunt; infantes non nisi in magna fame perimunt. Nec a misericordia
separantur: assiduis denique exemplis patet, eos pepercisse, quum multi
captivorum aliquot leonibus obvii intacti repatriaverint. Gætulæ etiam mulieris
nomen Jubæ libris comprehensum est, quæ obtestata occursantes feras, impunis
rediit. Aversi cúunt; nec hi tantum, sed et lynces, et cameli, et elephanti, et
rhinocerotes, et tigres. Leænæ fútu primo catulos quinque edunt; deinde per
singulos partus numerum decoquunt annis insequentibus; sed postremo, quum ad
unum materna fecunditas recidit, steriles fiunt in æternum. Animos leonum frons
et cauda indicant, sicut motus equini de auribus intelliguntur. Dedit enim has
notas generosissimo cuique natura. Vis summa in pectore est, firmitas in capite
præcipua. Quum premuntur a canibus; contemptim recedunt, subsistentesque
interdum ancipiti recessu dissimulant timorem; idque agunt, si in campis
patentibus ac nudis urgeantur: nam silvestribus locis, quasi testem ignaviæ non
reformident, quanta possunt se fuga subtrahunt. Quum insequuntur, nisum saltu
adjuvant: quum fugiunt, non valent salire. Gradientes mucrones unguium vaginis
corporum claudunt, ne acumina attritu retundantur. Hoc adeo custodiunt; ut non
nisi aversis falculis currant. Septi a venantibus, obtutu terram contuentur, quo
minus conspectis venabulis terreantur. Nunquam limo vident, minimeque se volunt
aspici. Cantus gallinaceorum et rotarum timent strepitus, sed ignes magis.
Leontophonas vocari accepimus bestias modicas, quæ captæ exuruntur, ut
earum cineris aspergine carnes pollutæ jactæque per compita concurrentium
semitarum leones necent, si quantulumcumque ex illis sumpserint. Propterea
leones naturali eas premunt odio, atque ubi facultas data est, morsu quidem
abstinent, sed dilancinatas exanimant pedum nisibus.
Spectaculum ex his
primus Romæ edidit Scævola Publi filius in curuli ædilitate.
Hyænam
quoque mittit Africa, cui cum spina riget collum continua unitate, flectique non
quit, nisi toto corpore circumacto. Multa de ea mira: primum, quod sequitur
stabula pastorum, et auditu assiduo addiscit vocamen, quod exprimere possit
imitatione vocis humanæ, ut in hominem astu accitum nocte sæviat. Vomitus quoque
humanos mentitur, falsisque singultibus sollicitatos canes sic devorat; qui
forte si venantes umbram ejus, dum sequuntur, contigerint, latrare nequeunt,
voce perdita. Eadem hyæna inquisitione corporum sepultorum busta eruit. Præterea
promptius est marem capere: feminis enim ingenita est callidior astutia.
Varietas multiplex inest oculis, colorumque mutatio; in quorum pupulis lapis
invenitur, hyænium dicunt, præditum illa potestate, ut, cujus hominis fuerit
linguæ subditus, prædicat futura. Verum hyæna quodcumque animal ter lustraverit,
movere se non potest: quapropter magicam scientiam inesse ei pronuntiaverunt.
In Æthiopiæ parte coit cum leæna, unde nascitur monstrum: crocottæ nomen
est. Voces hominum et ipsa pariter affectat. Nunquam cohibet aciem orbium, sed
in obtutu sine nictatione contendit. In ore gingiva nulla, dens unus atque
perpetuus, qui, ut nunquam retundatur, naturaliter capsularum modo clauditur.
Inter ea, quæ dicunt herbatica, eadem Africa onagros habet, in quo
genere singuli imperitant gregibus feminarum. Æmulos libidinis suæ metuunt: inde
est, quod gravidas suas servant, ut expositos mares, si qua facultas fuerit,
truncatos mordicus privent testibus. Quod caventes feminæ, in secessibus partus
occulunt.
Africa serpentibus adeo facunda est, ut mali hujus merito illi
potissimum palma detur. Cerastæ præferunt quadrigemina cornicula, quorum
intentatione, veluti esca inlice, sollicitatas aves perimunt: nam reliqua
corporis de industria arenis tegunt, nec ullum indicium sui præbent, nisi ex ea
parte, quæ invitatis dolo pastibus necem præpetum aucupetur. Amphisbæna
consurgit in caput geminum: quorum alterum in loco suo est, alterum in ea parte,
qua cauda: quæ causa efficit, ut capite utrinque secus nitibundo serpat
tractibus circulatis. Jaculi arbores subeunt, e quibus vi maxima turbinati,
penetrant animal, quodcumque obvium fortuna fecerit. Scytale tanta præfulget
tergi varietate, ut notarum gratia videntes retardet, et quoniam reptando
pigrior est, quos assequi non quit, miraculo sui capiat stupentes. In hoc tamen
squamarum nitore hiemales exuvias prima ponit. Plures diversæque aspidum
species, verum dispares effectus ad nocendum: dipsas siti interficit, hypnale,
quod somno necat, teste etiam Cleopatra, emitur ad mortem. Aliarum virus,
quoniam medelas admittit, minus famæ meretur. Hæmorrhois morsu sanguinem elicit,
et dissolutis venarum commerciis, quidquid animæ est, evocat per cruorem.
Prester quem percusseri, distenditur, enormique corpulentia necatur extuberatus.
Ictus sepium putredo sequitur. Sunt et hammodytæ, est et cenchris, elephantiæ,
chersydri, chamædracontes. Postremo quantus nominum, tantus mortium numerus. Nam
scorpiones, scinci, lacertique vermibus, non serpentibus adscribuntur. Monstra
hæc si bibant, clementius feriunt. Habent affectus: non temere nisi conjuges
evagantur: capto altero, vel occiso, uter superfuerit, efferatur. Subtiliora
sunt capita feminis, alvi tumidiores, pestis nocentior. Masculus æqualiter teres
est, sublimior etiam mitiorque. Igitur anguibus universis hebes visus est. Raro
in adversum contuentur: nec frustra, quum oculos non in fronte habeant, sed in
temporibus, adeo, ut citius audiant, quam aspiciant.
De gemma
heliotropio inter Æthiopiam, Africam, Cyprum certamen fuit, quænam mitteret
generis hujus eminentissimam: deprehensumque est documentis plurimis Æthiopicam
aut Libycam, palmam tenere. Viridi colore est non ita acuto, sed nubilo magis et
presso, stellis puniceis superspersa. Causa nominis de effectu lapidis est et
potestate. Dejecta in labris æneis, radios solis mutat sanguineo repercussu,
extraque aquam splendorem æris abjicit, et avertit. Etiam illud posse dicitur,
ut herba ejusdem quod est nominis mixta, et præcantationibus legitimis
consecrata, eum a quocumque gestabitur, subtrahat visibus obviorum.
Inter Syrtes, quamvis terra pergentibus, iter sideribus destinatur; nec
aliter cursus patescit: nam putris soli faciem aura mutat, et minimo licet
vento, tantam diversitatem flatus efficit, ut subinde perversis sitibus locorum,
nulla indicia agnitioni relinquantur: quum modo quæ fuerant tumulis ardua, in
valles residunt: modo quæ vallibus pressa, cútu pulveris aggerantur. Ita etiam
continens naturam maris sui patitur: nec interest, ubi potius sint procellæ,
quum ad exitium viantium elementis congruentibus, in terris flabra sæviant, in
mari terræ. Utræque Syrtes ducentis quinquaginta millibus passuum separantur.
Aliquanto clementior, quæ minor est. Cn. denique Servilio, C. Sempronio
consulibus, inter hæc vadosa classem Romanam impune accipimus perfretasse. In
hoc sinu Meninx insula post Minturnenses paludes C. Mario fuit latebra.
Supra Garamantas Psy1li fuerunt, contra noxium virus muniti incredibili
corporis firmitate. Soli morsibus anguium non interibant, et quamvis dente
letali appetiti, incorrupta durabant sanitate. Recens etiam editos serpentibus
offerebant: si essent partus adulteri, matrum crimina plectebantur interitu
parvulorum; si pudici, probos ortus a morte paterni sanguinis privilegium
tuebatur. Sic originis fidem probabant venenis judicantibus. Sed hæc gens
interivit, a Nasamonibus capta; neque quidquam aliud, præter opinionem, de
vestigio nominis sui Psylli reliquerunt.
Nasamonitem lapidem Nasamones
dant, sanguineum universum, nigris venulis adumbratum. In intimo recessu Syrtis
majoris, circa Philænorum aras, Lotophagos fuisse discimus, nec incertum est. A
Philænorum aris non procul palus est, quam Triton amnis influit, ubi speculatam
se artium deam crediderunt.
Major Syrtis ostentat oppidum, Cyrenas
vocant, quod Battus Lacedæmonius olympiade quinta et quadragesima, rege Martio
res Romanas tenente, anno post Trojam captam quingentesimo octogesimo sexto
condidit: quæ domus Callimacho pútæ fuit patria. Inter hoc oppidum et templum
Hammonis, millia passuum quadringenta sunt. Templo fons proximat Soli sacer, qui
humoris nexibus humum favillaticam stringit, et in cespitem solidat. In qua
gleba non sine miraculo lucus viret, undique secus agris arentibus.
Illic et lapis legitur, Hammonis vocant cornum nam ita tortuosus est, et
inflexus, ut effigiem reddat cornus arietini. Fulgore aureo est. Prædivina
somnia repræsentare dicitur subjectus capiti incubantium. Et arbor est melopos
nomine, ex qua profluit lentus humor, quem a loco hammoniacum nominamus.
Apud Cyrenenses præterea sirpe gignitur, odoratis radicibus, virgulto
herbido magis, quam arbusto: cujus e culmo exsudat stato tempore pingue
roscidum, idque pascentium hircorum inhæret barbulis: ubi quum arefactum
inolevit guttis stiriacis, legitur ad usum mensarum, vel medelis. Dictum est
primum lac sirpicum, quoniam manat in modum lacteum: deinde usu derivante laser
nominatum. Quæ germina initio barbaricæ impressionis vastatis agris, postea ob
intolerandam vertigalis nimietatem, ferme penitus ipsi accolæ eruerunt.
Cyrenis ab læva Africa est, ab dextra Ægyptus, a fronte sævum et
importuosum mare, a tergo barbarorum variæ nationes, et solitudo inculta,
squalens et inaccessa, quæ basiliscum creat, malum in terris singulare.
Serpens est pæne ad semipedem longitudinis, alba quasi mitrula lineatus
caput, nec hominis tantum vel aliorum animantiam exitiis datus, sed terræ quoque
ipsius, quam polluit et exurit, ubicumque ferale sortitur receptaculum. Denique
exstinguit herbas, necat arbores, ipsas etiam corrumpit auras, ita ut æra nulla
alitum impune transvolet, infectum spiritu pestilenti. Quum movetur, media
corporis parte serpit, media arduus est, et excelsus. Sibilum ejus etiam alii
serpentes perhorrescunt: et quum acceperunt, fugam quæque, quoquo potest,
properant. Quidquid morsu ejus occiderit, non depascitur fera, non attrectat
ales. Mustelis tantum vincitur, quas illinc homines inferciunt cavernis, in
quibus delitescit. Vis tamen ne defuncto quidem deest. Denique basilisci
reliquias amplo sestertio Pergameni comparaverunt. Ut ædem Apellis manu
insignem, nec araneæ intexererit, nec alites involarent, cadaver ejus reticulo
aureo suspensum ibidem locarunt.
Circa extimum Syrtium cornum Berenicen
civitatem alluit Lethon amnis, inferna, ut putant, exundatione prorumpens, et
apud pristinos vates latice memoratus oblivionis. Hanc Berenicen Berenice
munivit, quæ Ptolemæo tertio fuit nupta, et in majori Syrti locavit.
Omne autem latifundium, quod inter Ægyptum, Æthiopiam, Libyamque
diffunditur, quacumque lucis opacum est, varium implevit simiarum genus. Nec
quisquam offensus nomine, cognitionem gravetur. Enimvero pretium operæ est,
nihil omittere, in quo naturæ spectanda sit providentia.
Plebes simiarum
in his est, quas passim videmus, non sine ingenio æmulandi; quo facilius, in
manus veniunt: nam dum avide venantium gestus affectant, relicta consulto visci
unguilla, quod mendacio factum vident, oculos suos oblinunt; ita visu obducto
pronum est eas corripi. Exsultant nova luna, tristes sunt cornuto et cavo
sidere. Immoderate fútus amant, adeo ut catulos facilius amittant quos impendio
diligunt, et ante se gestant, quoniam neglecti ponte matrem semper hærent.
Cercopitheci caudas habent. Hæc sola discretio est inter prius dictas.
Cynocephali et ipsi sunt e numero simiarum, in Æthiopiæ parte frequentissimi:
violenti ad saltum, feri morsu, nunquam ita mansueti, ut non sint magis rabidi.
Inter simias habentur et sphinges, villosæ comis, mammis prominulis ac
profundis, dociles ad feritatis oblivionem. Sunt et quas vocant satyros, facie
admodum grata, gesticulatis motibus inquietæ. Callithriches toto pæne aspectu a
ceteris differunt: in facie barba est, lata cauda. Has capere non est arduum,
sed proferre rarum: neque enim vivunt in altero, quam in Æthiopico, hoc est suo
cælo.
XXIX. Gens Amantum et Asbystarum.
Inter Nasamonas, et Troglodytas gens Amantum est, quæ salibus domos
exstruunt: quos in modum cautium e montibus excitatos, ad usum ædium cæmentitiis
nectunt struicibus. Tanta ibi hujusce venæ copia est, ut tecta faciant e
salinis. Hi sunt Amantes, qui commercium cum Troglodytis habent carbunculi
gemmæ. Citra Amantes propiores Nasamonibus Asbystæ lasere vivunt Hoc aguntur,
hoc illis dulce est.
XXX. Garamantum fons, et iter
Garamanticum. ltem pecora Garamantica, et natura insulæ Gaulús.
Garamanticum oppidum est Debris fonte miro: qui denique alternis vicibus
die frigeat, nocte efferveat, ac per eadem venarum commercia, interdum ignito
vapore æstuet, interdum glaciali algore inhorrescat. Incredibile memoratu, ut in
articulo temporis natura tam dissonam sui faciat varietatem! Idque qui
percontari velit, tenebris inesse fluori illi æternam facem credat; qui rimetur
die brumales scatebras, nunquam aliud æstimet, quam perpetuo rigere. Unde non
immerito per gentes Debris inclyta est, cujus aqua; ex cúlesti vertigine mutant
qualitatem, quamvis contraversa siderum disciplina: nam quum mundum a calore
vesper temperet, ab occasu incipit ita incalescere, ut ni tactu abstineas,
noxium sit contigisse: rursum quum ortus solis inclaruit, et radiis fervefacta
sint omnia, sic glaciales evomit scaturigines, ut fluorem suum prohibeat
hauriri. Quis ergo non stupeat fontem, qui friget calore, calescit frigore!
Garamanticæ regionis Garama caput est, ad quam iter diu inextricabile fuit, et
invium: nam latrones puteos arenis operiebant, ut temporaria fraude subductis
aquis, infame siti iter submoveret accessus viantium. Sed Vespasiano principe,
bello, quod cum åensibus gestum est, difficultas hæc dissoluta est, compendio
spatii brevioris reperto. Garamantas Cornelius Balbus subegit, et primus ex hac
victoria triumphavit. Primus sane de externis, utpote Gadibus genitus, accessit
ad gloriam nominis triumphalis.
Armenta gentis istius obliquis
cervicibus pabulantur: nam si recta ad pastum ora dirigant, officiunt prona ad
humum cornua et obnixa.
Ex parte, qua Cercina est, accepimus Gaulún
insulam, in qua serpens neque nascitur, neque vivit invecta: propterea jactus ex
ea quocumque gentium pulvis, arcet angues; scorpiones superjactus illico
perimit.
XXXI. Æthiopes, et in eorum locis ac
gentibus mira, de draconibus, de dracontia lapide, de camelopardalo, de cephis,
de rhinocerote, de catoblepa, de formicis Æthiopicis, de Lycaone, de parandro,
de lupis Æthiopicis, de hystrice, de ave pegaso. de ave tragopane, de hyacintho
lapide, de chrysopasto lapide, de lapide hæmatite.
Æthiopes, et
gentes Atlanticæ, Nigri flumine dividuntur, quem patrem putant Nili. Sic papyro
viret, sic calamo prætexitur, animalia eadem edit, isdem temporibus exundat,
intra ripas tunc quoque redit, quum contentus est alveo suo Nilus. Garamantici
Æthiopes matrimonia privatim nesciunt, sed vulgo omnibus in venerem licet. Inde
est, quod filios matres tantum recognoscunt; paterni nominis nulla reverentia
est. Quis enim verum patrem noverit in hac luxuria incesti lascivientis?
Eapropter Garamantici Æthiopes inter omnes populos degeneres habentur: nec
immerito, qui afflicta disciplina castitatis, successionis notitiam ritu improbo
perdiderunt.
Nomen Æthiopum late patet. In parte Africana, qua Meroen
videt Libya, plurimæ eorum sunt et variæ nationes. Harum e numero Nomades
cynocephalorum lacte vivunt. Syrbotæ longi sunt ad pedes duodecim. Azachæi
captos venatibus elephantos devorant. Apud Psambares nulla est aurita quadrupes,
ne elephanti quidem. His proximi summam regiæ potestatis cani tradunt: de cujus
motibus, quidnam imperitet, augurantur. Maritimos Æthiopas quaternos oculos
dicunt habere; sed fides alia est, illa denique, quod et vident plurimum, et
manifestissime destinant jactus sagittarum. Occidentem versus Agriophagi tenent,
qui solas pantherarum et leonum carnes edunt, rege præditi, cujus in fronte
oculus unus est. Sunt et Pamphagi, quibus esca est quidquid mandi potest, et
omnia fortuitu gignentia. Sunt et Anthropophagi, quorum mores vocamen sonat.
Cynomolgos aiunt habere caninos rictus, et prominula ora. Artabatitæ proni,
atque quadrupedes, nec secus, ac feræ, sine sedibus evagantur. Confines
Mauritaniæ certo tempore locustas terrestres legunt, duratasque salsugine in
præsidium vitæ solas habent: sed ex illis quadragesimum ævi annum nullus
supergreditur. Ab Oceano æstu ad Meroen, quam insulam amplexu primo Nilus facit,
millia passuum sunt sexcenta viginti.
Ultra Meroen super exortus solis
Macrobii Æthiopes vocantur: dimidio enim eorum protentior, quam nostra vita est.
Hi Macrobii justitiam colunt, amant æquitatem, plurimum valent robore, præcipua
decent pulchritudine, ornantur ære, auro vincula faciunt noxiorum. Locus apud
eos est ÑHlÛou trãpeza, opiparis epulis semper
refertus, quibus indiscretim omnes vescuntur: nam et divinitus eas augeri
ferunt. Est et ibidem lacus, quo perfusa corpora velut olivo nitescunt. Ex hoc
lacu potus saluberrimus. Sane adeo liquidus est, ut ne caducas quidem vehat
frondes, sed illico folia lapsa ad fundum demittat laticis tenuitate. Ultra hos
deserta: inhumanæque solitudines ad usque Arabicos sinus. Deinde in ultimis
Orientis monstrosæ gentium facies. Aliæ sine naribus, æquali totius oris
planitie, informes habent vultus. Aliis concreta ora sunt, modico tantum
foramine calamis avenarum pastus hauriunt. Nonnullæ linguis carent, in vicem
sermonis utentes nutibus motibusque. Quædam ex istis nationibus ante Ptolemæum
Lathyrum regem Ægypti, incognitum habuerunt ignis usum. Æthiopia omnis ab
oriente hiberno ad occidentem hibernum tenet. Quidquid ejus sub meridiano
cardine lucis nitet, qui maxime virent hieme. A meridiana parte mons editus mari
imminet, ingenuo igne per æternum fervidus, et inquiete jugis flagrantibus:
inter quæ incendia jugis æstus, draconum magna copia est.
Porro veris
draconibus ora nulla sunt ad morsum dehiscentia, sed arctæ fistulæ, per quas et
trahunt spiritus, et linguas exserunt: quippe non in dentibus vim, sed in caudis
habent, et verbere potius, quam rictu nocent.
Exciditur e cerebris
draconum dracontias lapis, sed lapis non est, nisi detrabatur viventibus: nam si
obeat prius serpens, cum anima simul evanescit, duritie soluta. Usu ejus
orientis reges præcipue gloriantur, quanquam nullum lenocinium artis admittat
soliditate, et quidquid in eo nobile est, non manus faciunt, nec alterius quam
naturæ candor sit, quo reluceat. Auctor Sotacus gemmam hanc etiam visam sibi
scribit, et, quibus intercipiatur modis, edocet. Præstantissimi audacia viri
explorant anguium foveas, et receptus: inde præstolati ad pastum exeuntes,
prætervectique percitis cursibus, objiciunt gramina medicata, quantum potest ad
incitandum soporem: ita somno obsopitis, e capitibus exsecant lapides, et de
manubiis præcipitis ausi, prædam revehunt temeritatis.
Quæ locorum
Æthiopes tenent, feris plena sunt, e quibus quam nabun vocant, nos
camelopardalim dicimus, collo equi similem, pedibus bubulis, capite camelino,
nitore rutilo, albis maculis superspersa. Hoc animal Romæ Circensibus dictatoris
Cæsaris primum publicatum.
Iisdem ferme temporibus illinc exhibita
monstra sunt, cepos appellant, quorum posteriores pedes crure, et vestigio
humanos artus mentiuntur; priores hominum manus referunt. Quæ tamen a nostris
non amplius, quam semel visa sunt.
Ante ludos Cneii Pompeii rhinocerotem
Romana spectacula nesciebant: cui bestiæ color huxeus, in naribus cornu unicum
et repandum, quod subinde attritum cautibus in mucronem excitat, eoque adversus
elephantos prúliatur, par ipsis longitudine, brevior cruribus, naturaliter alvum
petens, quam solam intelligit ictibus suis perviam.
Juxta Nigrim fluvium
catoblepas nascitur modica atque iners bestia, caput prægrave ægre ferens,
aspectu pestilenti: nam qui in oculos ejus offenderint, protinus vita exeunt.
Formicæ ibi ad formam canis maximi, arenas aureas pedibus eruunt, quos
leoninos habent: qua, custodiunt, ne quis auferat, captantesque ad necem
persequuntur.
Eadem Æthiopia mittit lycaonem. Lupus est cervicem
jubatus, et. tot modis varius, ut nullum illi colorem dicant abesse.
Mittit et tarandum, boum magnitudine, bisulco vestigio, ramosis
cornibus, capite cervino, ursino colore et pariter villo profundo. Hunc tarandum
affirmant habitum metu vertere, et quum delitescat, fieri assimilem cuicumque
rei proximaverit, sive illa saxo alba sit, seu frutecto virens, sive quam aliam
præferat qualitatem. Faciunt hoc idem in mari polypi, in terra chamæleontes; sed
et polypus, et chamæleon glabra sunt, ut sit pronius cutis lævitatem proximanti
æmulari: in hoc novum est ac singulare, hirsutiam pili colorum vices facere.
Hinc evenit ut difficulter capi possit.
Æthiopicis lupis proprium est,
quod in saliendo ita nisus habent alitis, ut non magis proficiant cursu, quam
meatu: homines tamen nunquam impetunt. Bruma comati sunt, æstate nudi: thoas
vocant.
Hystrix quoque inde loci frequentissima, erinaciis similis,
spinis tergum hispida, quas plerumque laxatas jaculatione emittit voluntaria, ut
assiduis aculeorum nimbis canes vulneret ingruentes.
Illius cúli ales
est pegasus: et hæc ales equinum nihil præter aures habet. Tragopan quoque avis
major aquilis, cornibus arietinis proferens armatum caput.
Ethiopes
legunt cinnamum. Id frutectum situ brevi nascitur, remo humili et depresso,
nunquam ultra duas ulnas altitudinis: quod gracilius provenit, eximium magis
ducitur: quod in crassitudinem extuberatur, despectui est. Verum legitur per
sacerdotes hostiis prius cæsis: quæ quum litaverunt, observatur, ut messis nec
ortum solis anticipet, nec egrediatur occasum. Quisquis principatum tenet,
sarmentorum acervos hasta dividit, quæ sacrata est in hoc ministerium: atque ita
portio manipulorum soli dicatur: quæ si juste divisa est, sponte incenditur.
Inter ea, quæ diximus, nitore cærulo hyacinthus invenitur, lapis
pretiosus, si quidem inculpabilis inveniatur: est enim vitiis non parce
obnoxius: nam plerumque aut violaceo diluitur, aut nubilo obducitur, aut
albicantius in aquaticum eliquescit. Optimus in illo tenor, si nec densiore fuco
sit obtusior, nec propensa perspicuitate detectior, sed ex utroque temperamento
lucis et purpuræ fucatum suaviter florem trahat. Hic est, qui sentit auras, et
cum cúlo facit; nec æqualiter rutilat, quum aut nubilosus est, aut serenus dies.
Præterea in os missus magis friget. Scalpturis certe minime accommodatus, ut qui
attritum respuat; nec tamen penitus invictus est: nam adamante scribitur et
notatur.
Ubi hyacinthus, ibi et chrysopastus apparet: quem lapidem lux
celat, produnt tenebræ. Hæc enim est in illo diversitas, ut nocte igneus sit,
die pallidus.
Ex ipso solo sumimus hæmatitem rubore sanguineo: ac
propterea hæmatitem vocatum.
XXXII. De intimis
gentibus Libyæ, de lapide hexecontalitho.
Quod ab Atlante ad usque
Canopitanum ostium panditur, ubi Libyæ finis est, et Ægyptium limen, dictum a
Canopo Menelai gubernatore ibi sepulto in ea insula, quæ ostium Nili facit,
gentes tenent dissonæ, quæ in aviæ solitudinis secretum recesserunt. Ex his
Atlantes ab humano ritu prorsus exsulant. Nulli proprium vocabulum, nulli
speciale nomen. Diris solis ortus excipiunt, diris occasus prosequuntur, ustique
undique torrentis plagæ sidere, oderunt deum lucis. Affirmant eos somnia non
videre, et abstinere penitus ab animalibus universis. Troglodytæ specus
excavant, illis teguntur. Nullus ibi habendi amor: a divitiis paupertate se
abdicaverunt voluntaria.
Tantum lapide uno gloriantur, quem
hexecontalithon nominamus, tam diversis notis sparsum, ut sexaginta gemmarum
colores in parvo ejus orbiculo deprehendantur.
Homines isti carnibus
vivunt serpentium; ignarique sermonis, stridunt potius, quam loquuntur. Augylæ
vero solos colunt inferos. Feminas suas primis noctibus nuptiarum adulteriis
cogunt patere: mox ad perpetuam pudicitiam legibus stringunt severissimis.
Gamphasantes abstinent prúliis, fugiunt commercia, nulli se externo misceri
sinunt. Blemmyas credunt truncos nasci parte, qua caput est, os tamen et oculos
habere in pectore. Satyri de hominibus nihil aliud præferunt, quam figuram.
Ægipanes hoc sunt, quod pingi videmus. Himantopodes fluxis nisibus crurum repunt
potius, quam incedunt, et pergendi usum lapsu magis destinant, quam ingressu.
Pharusii quum Herculi ad Hesperiadas pergenti forent comites, itineris tædio hic
resederunt. Hactenus Libya.
XXXIII. Ægyptus. In ea
de origine et natura Nili, de tauro Apide de crocodilo, de scinco, de
hippopotamo, de ave ibide, et serpentibus Arabicis, de ficu Agyptia, de palma
Ægyptia, de disciplina Ægyptiorum, et urbibus inclytis.
Ægyptus ad
meridiem introrsus recedit, quoad prætendant Æthiopes a tergo. Inferiorem ejus
partem Nilus circumfluit, qui scissus a loco, cui Delta nomen est, ad insulæ
faciem spatia amplectitur interamna, et incerto pæne fonte decurrens proditur,
ut loquemur. Originem habet a monte inferioris Mauritaniæ, qui Oceano
propinquat. Hoc affirmant Punici libri; hoc Jubam regem accepimus tradidisse.
Igitur protinus lacum efficit, quem Nilidem dicunt.
Nilum autem jam inde
conjiciunt, quod hoc stagnum in herbis, piscibus, belluis nihil minus procreet,
quam in Nilo videmus; ac si quando Mauritania, unde origo ejus est, aut nivibus
densioribus, aut imbribus largioribus irrigatur, incrementa exundationis in
Ægypto augentur. Sed effusus hoc lacu arenis sorbetur, et cuniculis cæcis
absconditur; deinde in Cæsariensis pede prorumpens amplior, eadem indicia
præfert, quæ in exortu notavimus: rursusque subsidit, nec se prius reddit, quam
post intervalla itineris extenti contingat Æthiopas. Ubi exit, Nigrim facit
fluvium, quem supra diximus terminum esse limitis Africani. Astapum eum indigenæ
vocant, scilicet aquam e tenebris profluentem. Multas magnasque ambit insulas:
quarum pleræque sunt tam diffusæ et vastæ magnitudinis, ut vix eas dierum
quinque cursu prætermeet, quamvis concitus ibi feratur. Nobilissima eorum est
Meroe, circum quam divisus dextero alveo Astosapes, lævo Astabores nominatur.
Tunc quoque emensus magna longinqua, quum primum occurrentibus scopulis
asperatur, tantis agminibus extollitur inter objecta rupium, ut ruere potius,
quam manare credatur: demumque a cataracte ultimo tutus est: ita enim quædam
claustra ejus Ægyptii nuncupant. Relicto tamen hoc pone se nomine, quo Nigris
vocatur, mox inoffensus meat. Septem ostiis conditur, in meridiem versus
excipitur Ægyptio mari. Ignari siderum, vel locorum, varias de excessibus ejus
causas dederunt. Alii affirmant etesias nubium densitatem illo cogere, unde
amnis hic auspicatur, ipsumque fontem humore supero saginatum, tantam
inundationis habere substantiam, quantum pabuli ad liquorem nubila
subministraverint. Ferunt alii, quod ventorum flatibus repercussus, quum fluorem
solitæ velocitatis non queat promovere, aquis in arcto luctantibus intumescat:
et quanto jam impensius contraversi spiritus repugnaverint, tanto excelsius
sublimari in altitudinis vertices repercussam celeritatem; quando nec solitus
extenuet cursus alveum, et stipato jam flumine, venis originalibus torrentium
pondera superveniant: ita concurrente violentia hinc urgentis elementi, hinc
resistentis, undis exsultantibus molem colligi, quæ excessus facit. Nonnulli
affirmant fontem ejus, qui Phialus vocatur, siderum motibus excitari,
extractumque radiis candentibus cúlesti igne suspendi, non tamen sine certa
legis disciplina, hoc est lunis cúptantibus. Verum omnem abscessus originem de
sole concipi, primosque fieri excessus tumoris, quum, per Cancrum sol vehatur:
postmodum triginta ejus partibus evolutis, ubi ingressus Leonem, ortus Sirios
excitavit, propulso omni fluore tantam vim amnis erumpere. Quod tempus
sacerdotes natalem mundi judicarunt, id est inter tertium decimum kalendas
augustas, et undecimum. Deinde revocari exitus universos, quum in Virginem
transeat, penitusque intra ripas suas capere, quum Libram sit ingressus. Hoc
etiam addunt, pariter eum nocere, sive abundantius exæstuet, sive parcius:
quandoquidem exiguitas minimum apportet fecunditatis, propensior copia diuturno
humore culturam moretur. Maximos deinde ejus exitus cubitis duodeviginti
consurgere, justissimos sedecim temperari: nec in quindecim abesse proventus,
sed quidquid intra sit, famem facere. Dant illi etiam hoc majestatis, ut
portendat futura, quandoquidem Pharsalico bello non fuerit egressus quinque
ulnas. Jam illud palam est, solum illum ex amnibus universis nullas exspirare
auras. Ditionis Ægyptiæ esse incipit a Syene, in qua fines Æthiopum; et inde
usque dum mari intimatur, Nili nomen tenet.
Inter omnia, quæ Ægyptus
habet digna memoratu, præcipue bovem mirantur: Apim vocant. Hunc ad instar
colunt numinis, insignem notæ albæ macula, quæ dextero ejus lateri ingenita,
corniculantis lunæ refert faciem. Statu ævi spatium est, quod ut affuit,
profundo sacri fontis immersus necatur, ne diem longius trahat., quam licebit.
Mox alter, nec sine publico luctu, requiritur, quem repertum centum antistites
Memphim prosequuntur, ut incipiat, sacris ibi initiatus, sacer fieri. Delubra,
quibus succedit aut incubat, mystice thalamos nominant. Dat omnia manifestantia
de futuris: illud maximum, si de consulentium manu cibum capiat. Denique
aversatus Germanici Cæsaris dexteram, prodidit ingruentia, nec multo post Cæsar
exstinctus est. Pueri Apim gregatim sequuntur, et repente velut lymphatici
ventura præcinunt. Bos illi ostenditur femina in anno semel, et ipsa non absque
certis insignibus, quæ atque inventa et oblata est, eadem die neci datur. Apis
natalem Memphi celebrant jactu aureæ pateræ, quam projiciunt in Nili statum
gurgitem. Hæc solemnitas per septem dies agitur: quibus diebus cum sacerdotibus
quasdam crocodili inducias habent, nec attrectant lavantes. Verum octavo die
cæremoniis jam peractis, velut reddita sæviendi licentia, solitam resumunt
atrocitatem.
Crocodilus malum quadrupes et in terra, et in flumine
pariter valet, linguam non habet, maxillam movet superiorem; morsus ejus
horribili tenacitate conveniunt, stipante se pectinatim serie dentium. Plerumque
ad viginti ulnas magnitudinis evalescit. Qualia anseres edit ova. Metatur locum
nido naturali providentia, nec alibi fútus premit, quam quo procrescentis Nili
aquæ non possint pervenire. In partu fovendo mas et femina vices servant. Præter
hiatum oris, armatus est etiam unguium immanitate. Noctibus in aqua degit, per
diem humi acquiescit. Circumdatur maxima cutis firmitate, in tantum, ut ictus
quovis tormento adacto tergo repercutiat. Trochilos avis parvula: ea reduvias
escarum dum affectat, os belluæ hujusce, paulatim scalpit, et sensim
scalpurrigine blandiente aditum sibi in usque fauces facit. quod ichneumon
conspicatus, penetrat belluam, populatisque vitalibus, erosa exit alvo.
Sunt delphines in Nilo, quorum dorsa serratas habent cristas. Hi
delphines crocodilos studio eliciunt ad natandum, demersique astu fraudulento
tenera ventrium subternatantes secant, et interimunt. Præterea habitant in
insula Nili homines forma perexigui, sed audacia usque eo perditi, ut crocodilis
se offerant obvios: nam hæc monstra fugientes insequuntur, formidant
resistentes. Ergo capiuntur, subactique etiam intra aquas suas serviunt, et
perdomiti metu ita obsequuntur, ut immemores atrocitatis, victores suos
inequitantes dorso vehant. Hanc ergo insulam, et hanc gentem ubicumque indicio
odoris persenserint, procul fugiunt. In aqua obtusius vident, in terra
acutissime. Hieme nullum cibum capiunt, quin etiam quatuor menses a cúptu brumæ
inedia exigunt.
Scinci quoque circa Nilum frequentissimi, crocodilis
quidem similes; sed forma modica, et angusta, verum ad opem salutarem non
qualibet necessarii: medentes quippe ex ipsis pocula inficiunt, quibus et stupor
nervorum excitetur, et veneni vis exigatur.
Hippopotamus in eodem
flumine ac solo nascitur, equino dorso et juba et hinnitu, rostro resimo,
ungulis bifidis, aprugineis dentibus, cauda tortuosa. Noctibus segetes
depascitur, ad quas pergit aversus astu doloso, ut fallente vestigio revertenti
nullæ insidiæ præparentur. Idem quum distenditur nimia satietate, arundines
recens cæsas petit, per quas tamdiu obversatur, quoad stirpium acuta pedes
vulnerent, ut profluvio sanguinis levetur sagina: plagam deinde cúno oblinit,
usque dum vulnus conducatur in cicatricem. Hippopotamos et crocodilos primus
Romam Marcus Scaurus invexit.
Circa easdem ripas ales est ibis. Ea
serpentium populatur ova, gratissimamque ex his escam nidis suis defert. Sic
rarescunt proventus fútuum noxiorum. Nec tamen aves istæ tantum intra fines
Ægyptios prosunt: nam quacumque Arabicæ paludes pennatorum anguium mittunt
examina, quorum tam citum virus, ut morsum ante mors quam dolor insequatur;
sagacitate qua ad hoc valent, aves excitatæ, in procinctum eunt universæ, et
prius quem terminos proprios externum malum vastet, in ære occursant catervis
pestilentibus: ibi agmen devorant universum: quo meritu sacræ sunt, et illæsæ.
Ore pariunt. Nigras solum Pelusium mittit, reliqua pars candidas.
De
arboribus, quas sola fert Aegyptus, præcipua est ficus Aegyptia, foliis moro
comparanda, poma non ramis tantum gestitans, sed et caudice, usque adeo
fecunditati suæ angusta est. Uno anno septies fructum sufficit: unde pomum si
decerpseris, alterum sine mora protuberat. Materies ejus in aquam missa
subsidit; deinde quum diu desederit in liquore, levior facta sustollitur; et
versa vice, quod natura in alio ligni genere non recipit, fit humore sicca.
Palma quoque Ægyptia dicenda res est, proprie adipsos vocatur, ut dici
oportuit eam, quæ gustata arcet sitim. Odor ei idem, qui et malis cydoniis; sed
demum sitim sedat, si prius quam maturuerit, decerpatur: nam si matura sumatur,
sensum intercipit, gressum præpedit, linguam retardat, obsessisque officiis
mentis et corporis, vitium facit ebrietatis.
Ægyptium limitem, qua ad
Diacecaumenem tendit, incolunt populi, qui momentum, quo reparari mundum ad
motus ferunt annuos, hoc studio deprehendunt. Eligitur sacer lucus, in quo
conseptant animalia diversissimi generis. Ea, ubi ad statum modum cúlestis
pervenit disciplina, sensus suos significationibus produnt, quibus possunt: alia
ululant, alia mugiunt, quædam stridunt, quædam rudunt, nonnulla simul confugiunt
ad volutabra. Hoc argumentum illis est magistrum ad indicium temporis
deprehendendi. Idem populi ferunt a primis sibi gentis suæ avis traditum, ubi
nunc occasus est, quondam ibi ortus solis fuisse.
Inter Aegyptias urbes
numero portarum Thebæ nobiles, ad quas commercia Arabes Indique subvehunt: hinc
regio Thebaica. Abydos et ipsa nobilis, olim Memnonis regia, nunc Osiridis fano
exculta. Alexandriam et operis ipsius magnitudo, et auctor Macedo nobilitant:
quam metatus Dinocrates architecton alterum a conditore in memoria locum
detinet. Condita autem Alexandria est duodecima centesimaque olympiade, L.
Papyrio Spurio Spurii filio, C. Pútilio Caii filio, consulibus Romanis, haud
longe ab ostio fluminis Nili, quod Heracleoticon alii, alii Canopicon appellant.
Est et Pharos, colonia a Cæsare dictatore deducta, de qua facibus accensis
nocturna dirigitur navigatio: nam Alexandria insidioso accessu aditur,
fallacibus vadis, cæco mari, tribusque tantum canalibus admittit navigantes,
Tegano, Posideo, Tauro. Hinc igitur in portibus machinas ad prælucendi
ministerium fabricatas pharos dicunt. Pyramides turres sunt in Ægypto fastigatæ
ultra excelsitatem omnem, quæ fieri manu possit: itaque mensuram umbrarum
egressæ nullas habent umbras. Nunc ab Ægypto provehamus stilum.
XXXIV. Arabia. In ea mira, de fontibus, de moribus et habitu
populorum, de Eulæo flumine, de thure, myrrha, de cinnamo, de phúnice ave, de
cinnamolgis avibus, de gemma sardonyche, de lapide molochite, de iride, de
andradamante lapide, de pæderote lapide, de gemma Arabica.
Ultra
Pelusiacum ostium Arabia est, ad Rubrum pertinens mare, quod Erythræum ab
Erythra rege Persei et Andromedæ filio, non solum a colore appellatum. Varro
dicit, qui affirmat, in litore maris istius fontem esse, quem si oves biberint,
mutent vellerum qualitatem, et antea candidæ amittant quod fuerint usque ad
haustum, ac furvo postmodum nigrescant colore. Rubri autem maris Arsinoe
oppidum.
Verum hæc Arabia procedit ad usque illam odoriferam et divitem
terram, quam Catabani et Scenitæ tenent Arabes, nobiles monte Casio: qui Scenitæ
causam nominis inde ducunt, quod tentoriis succedunt, nec alias domos habent;
ipsa autem tentoria cilicina sunt: ita nuncupant velamenta caprarum pilis texta.
Præterea suillis carnibus prorsus abstinent. Sane hoc animalis genus, si
invectum illo fuerit, moritur illico. Hanc Arabiam Græci Eudæmonem, nostri
Beatam nominaverunt. Habitatur colle manu facto inter flumen Tigrim, et flumen
Eulæum, quod ortum a Medis tam poro fluore inclytum est, ut omnes inde reges non
alias quam ejus aquas bibant.
Eudæmonem non frustra cognominatam hinc
capessas, quod præter odores, quos creat plurimos, sola thus mittit, nec tamen
universa: nam in medio ejus sunt Atramitæ, pagus Sabæorum, a quo octo
mansionibus regio thurifera disterminatur: Arabia appellatur, id est sacra: hoc
enim significari interpretantur. Virgulta hæc non sunt publica, sed quod inter
barbaros novum, in jus posterorum per successiones transeunt familiarum. Ergo
quicumque dominatum istius tenent nemoris, Arabice sacri vocantur. Idem illi
quum lucos istos vel metunt vel incidunt, non funeribus intersunt, non
congressionibus feminarum polluuntur. Hanc arborem, prius quam penitus fides
proderet, alii lentisco, alii terebintho comparabant, usque dum libris, quos
Juba rex scripsit ad Cæsarem Augusti filium palam fieret, intorto eam esse
vimine, ramis ad aceris qualitatem, amygdalæ modo succum fundere, incidi ortu
canis flagrantissimis solibus.
In isdem saltibus myrrha provenit, cujus
radices ut vitium rastris proficiunt, ablaqueationibus gaudent. Nudatæ pinguiore
fluunt lacryma. Sponte manans pretiosior ex ea sudor est: elicitus corticis
vulnere, vilior judicatur. Codex in vertiginem flexus, et spinis hispidus;
folium crispius licet, olivæ tamen simile; maxima altitudine extollitur ad
quinque cubita proceritatis. Arabes sarmentis ejus ignes fovent; quorum fumo
satis noxio, nisi odore cremati storacis occurrant, plerumque insanabiles morbos
contrahunt.
Apud eosdem nascitur phúnix avis, aquilæ magnitudine, capite
honorato in conum plumis exstantibus, cristatis faucibus, circa colla fulgore
aureo, postera parte purpureus absque cauda, in qua roseis pennis cæruleus
interscribitur nitor. Probatum est, quadraginta et quingentis eum durare annis.
Rogos suos struit cinnamis, quos prope Panchaiam concinnat, in Solis urbem strue
altaribus superposita. Quum hujus vita magni anni fieri conversionem rata fides
est inter auctores; licet plurimi eorum magnum annum non quingentis et
quadraginta, sed duodecim millibus, nongentis quinquaginta quatuor annis
constare dicant. Plautio itaque Sextio et P. Apronio consulibus, Aegyptum phúnix
involavit; captusque anno octingentesimo Urbis conditæ, jussu Claudii principis
in comitio publicatus est. Quod gestum, præter censuram, quæ manet, actis etiam
Urbis continetur.
Cinnamolgos perinde Arabiæ avis in excellentissimis
lucis texit nidos e fruticibus cinnatmorum; ad quos quoniam non est pervenire
propter ramorum altitudinem et fragilitatem, accolæ illas congeries plumbatis
petunt jaculis, dejectasque pretiis vendunt amplioribus, quod hoc cinnamum
magis, quam alia, mercatores probent. Arabes longe lateque diffusi, diversis
moribus vivunt et cultibus. Plurimis crinis intonsus, mitrata capita, pars rasa
in cutem barba. Commerciis student, aliena non emunt, vendunt sua: quippe et
silvis, et mari divites. Umbræ, quæ nobis dexteræ sunt, illis sinistræ. Pars
eorum, quibus asper victus est, angues edunt, nulla vel animi cura vel corporis,
ac propterea ophiophagi nominantur.
Ex istius litoris sinu Polycrati
regi advecta sardonyx gemma, prima in orbe nostro luxuriæ excitavit facem. Nec
multum de ea disserendum puto, adeo sardonyx in omnium venit conscientiam.
Superficies ejus probatur, si meracius rubeat; arguitur, si fuerit fæculentior;
medietas circumitur limite candidante; optima est, si nec colorem suum spargat
in proximum, nec ipse ex altero mutuetur; reliqua nigro finiuntur. Quod si
transluceat, vitio vertitur; si perspicuitatem arceat, proficit ad decorem.
Et molochitem Arabs invenit, virentem crassius quam smaragdus, contra
infantum pericula ingenita vi resistentem. Invenit et iridem in mari Rubro,
sicut crystallum sexangulatam. Quæ radiis icta solis, rutilo æris repercussu
cúlestis arcus ex sese jacit speciem.
Androdamantem iidem legunt Arabes
nitoris argentei, lateribus æqualiter quadris, quem de adamante nonnihil
mutuatum putes. Datum illi nomen ex eo censent, quod animorum calentium mollit
impetus, et tumentes refrenat iras.
Pæderotem et Arabicam inde sumimus.
Arabica aspectu eburnea est, radi abnuit; contra nervorum molestias prodest
habentibus. In pæderote congruit quidquid eximium est, quadam decoris
prærogativa; crystallinum lucet, rubet purpuram, in orarum extimis corona crocea
velut e liquido renitente; hac suavitate oculos afficit, visum illicit, detinet
intuentes; hac etiam gratia Indis placet. Hoc Arabia sat est; hinc ad Pelusium
repatriemus.
XXXV. Regio Ostracina. Joppe oppidum.
Andromedæ viucula.
A Pelusio Casius mons est, et delubrum Jovis
Casii, atque ita Ostracinæ locus Pompeii Magni sepulcro inclytus. Idumæa inde
incipit palmis opima. Deinde Joppe oppidum antiquissimum orbe toto, utpote ante
inundationem terrarum conditum, Id oppidum saxum ostentat, quod vinculorum
Andromedæ vestigia adhuc retinet; quam expositam belluæ non irritus rumor
circumtulit: quippe ossa monstri illius M. Scaurus inter alia miracula in
ædilitate sua Romæ publicavit. Annalibus nota res est: mensuræ quoque veracibus
libris continentur, scilicet quod costarum longitudo excesserit pedes
quadraginta, sublimitas autem elephantis Indicis eminentior fuerit: porro
verticuli spinæ ipsius latitudine semipedem sint supergressi.
XXXVI. Judæa. In ea de Asphaltite lacu, de balsamo, de gente
Hessenorum.
Judæa illustris est aquis, sed natura non eadem aquarum
omnium. Jordanes amnis eximiæ suavitatis. Pancade fonte demissus, regiones
præterfluit amúnissimas, mox in Asphaltiten lacum mersus stagno corrumpitur. Qui
Asphaltites gignit bitumen, animal non habet, nihil in eum mergi potest: tauri
etiam camelique impune ibi fluvitant. Est et lacus Genesara extentus passuum
sedecim millibus, circumsessus urbibus plurimis, et celebribus, ipse par
optimis. Sed lacus Tiberiadis omnibus anteponitur, salubris ingenuo æstu, et ad
sanitatem usu efficaci. Judææ caput fuit Hierosolyma, sed excisa est. Successit
Hiericus, et hæc desivit, Artaxerxis bello subacta. Callirrhoe Hierosolymis
proxima, fons calore medico probatissimus, et ex ipso aquarum præconio sic
vocatus est.
In hac terra balsamum nascitur, quæ silva intra terminos
viginti jugerum usque ad victoriam nostram fuit: ac quum Judæa potiti sumus, ita
luci illi propagati sunt, ut jam nobis latissimi colles sudent balsama. Similes
vitibus stirpes habet, malleolis digeruntur, rastris nitescunt, aqua gaudent,
amant amputari, tenacibus foliis sempiterno inumbrantur. Lignum caudicis
attrectatum ferro sine mora emoritur: ea propter aut vitro, aut cultellis
osseis, sed in solo cortice artifici plaga vulneratur, ex qua eximiæ suavitatis
gutta manat. Post lacrymam secundum in pretiis locum poma obtinent, cortex
tertium, ultimus honos ligno.
Longo ab Hierosolymis recessu tristis
sinus panditur, quem de cúlo tactum testatur humus nigra, et in cinerem soluta.
Duo ibi oppida, Sodomum nominatum alterum, alterum Gomorrhum, apud quæ pomum
quod gignitur, habeat licet specimen maturitatis, mandi tamen non potest: nam
fuliginem intrinsecus favillaciam ambitio tantum extimæ cutis cohibet, quæ vel
levi pressa actu fumum exhalat, et fatiscit in vagum pulverent.
Interiora Judææ, quæ occidentem contuentur, Esseni tenent, qui præditi
memorabili disciplina recesserunt a more gentium universarum, majestatis, ut
reor, providentia ad hunc morem destinati. Nulla ibi femina. Venere se penitus
abdicarunt. Pecuniam nesciunt. Palmis victitant. Nemo ibi nascitur, nec tamen
deficit hominum multitudo. Locus ipse addictus pudicitiæ est: ad quem plurimi
licet undique gentium properent, nullus admittitur, nisi quem castitatis fides,
et innocentiæ meritum prosequatur: nam qui reus est vel levis culpæ, quamvis
summa ope adipisci ingressum velit, divinitus summovetur. Ita per immensum
spatium seculorum, incredibile dictu, æterna gens est, cessantibus puerperiis.
Engadda oppidum infra Essenos fuit, sed excisum est. Verum inclytis nemoribus
adhuc durat decus, lucisque palmarum eminentissimis nihil vel ævo vel bello
derogatum. Judææ terminus Massada castellum.
XXXVII. De Scythopoli oppido, de monte Casio.
Transeo Damascum, Philadelphiam, Raphianam, Scythopoli primos incolas,
et auctorem dabo. Liber pater quum humo nutricem tradidisset, condidit hoc
oppidum, ut sepulturæ titulum etiam urbis múnibus ampliaret. Incolæ deerant; e
comitibus suis Scythas delegit, quos ut animi firmaret ad promptam resistendi
volentiam, præmium loci nomen dedit.
In Seleucia alter Casius mons est,
Antiochiæ propinquus, cujus e vertice vigilia adhuc quarta conspicitur globus
solis, et brevi corporis circumactu radiis caliginem dissipantibus, illinc nox,
hinc dies cernitur. Talis e Casio specula est, ut lucem prius videas, quam
auspicetur dies.
XXXVIII. De
fluminibus Tigri et Euphrate. Item de lapidibus zmilanthi, sagda, myrrhite,
mithridace, tecolitho, hammochryso, ætite, pyrite, chalazia, echite, dionysia,
de glossopetra, gemma solis, crine Veneris, selenite, meconite, myrmecite,
chalcophthongo, siderite, phlogite, anthracia, enhydro.
Euphratem
fundit Armenia major, ortum supra Zizamam sub radicibus montis, quem Capoten
accolæ nominant, Scythis proximum. Hic receptis in se aliquot amnibus
convalescit, et stipatus convenis aquis, luctatur cum Tauri montis objectu, quem
apud Elegeam scindit, resistat licet duodecim millibus passuum latitudine;
longisque excursibus dextera Comagenen, Arabiam læva relinquit; deinde prælabens
plurimas gentes, Babyloniam, quondam Chaldæorum caput, dividit. Mesopotamiam
opimat inundationis annuæ excessibus, ad instar Ægyptii amnis terras contegens,
invecta soli fecunditate, isdem ferme temporibus, quibus Nilus exit, sole
scilicet in parte Cancri vicesima constituto; tenuatur quum, jam Leone decurso,
ad extima Virginis curricula facit transitum. Quod gnomonici similibus
parallelis accidere contendunt, quos pares in terrarum positione æqualitas
normalis efficit lineæ. Unde apparet, ista duo flumina ad modulum ejusdem
perpendiculi constituta, licet diversis manent plagis, easdem incrementi causas
habere.
De Tigri quoque dicere hoc loco par est. In Armeniæ regione
caput tollit mire quam lucidum, conspicuo fonte, in loco edito, qui Elegos
nominatur. Nec ab exordio statim totus est. Primo pigre fluit, nec cum suo
nomine; at quum fines Medorum invectus est, Tigris statim dicitur: ita enim
nominant Medi sagittam. Influit in Arethisam lacum omnia pondera sustinentem:
cujus pisces nunquam se alveo Tigridis miscent, sicut nec amnici pisces in
stagnum transeunt Arethisæ, per quem dissimilis colore, volucri meat cursu. Mox,
Tauro resistente, in profundum specum mergitur, quem subter labens in altero
ejus latere apud Zomadam emicat, ulvas et purgamenta plurima secum trahens;
deinde identidem absconditur, rursusque redditur. Adiabenos Arabesque
præterfluit; Mesopotamiam amplectitur; amnem nobilissimum Choaspem accipit;
Euphratem defert in sinum Persicum. Quæcumque Euphratem bibunt gentes, diverso
nitent lapide.
Zmilantis in ipso Euphratis alveo legitur, gemma ad
imaginem marmoris Proconensis, nisi quod in medio umbilico lapidis istius
glaucum, ut oculi pupula, internitet.
Sagda a Chaldæis usque ad nos
fluxit, haud facilis repertu, nisi, ut perhibent, ipsa se capessendam daret:
namque ingenita spiritus efficacia supermeantes naves e profundo petit, et
carinis ita tenaciter adcorporatur, ut, nisi abrasa parte ligni ægre separetur.
Ea sagda apud Chaldæos propter effectus, quos ex ea sciunt, habetur in loco
principe, ceteris propter gratiam magis complacet jucundissime virens.
Myrrhites Parthis familiaris est. Hunc si visu æstimes, myrrhæ color
est, et non habet, quo afficiat aspectum; si penitus explores, et attritu
incites ad calorem, spirat nardi suavitatem. In Perside lapidum tanta copia est,
tantaque diversitas, ut longum pæne sit ipsis vocabulis immorari.
Mithridax sole percussa coloribus micat variis.
Tecolithos
nucleo olivæ similis, spernitur, quum videtur, sed remediis bonus, vincit
aliorum pulchritudinem: solutus quippe et haustus, pulsis calculis, renium
dolores ac vesicæ levat.
Hammochrysos, arenis auro intermixtis, nunc
bractearum, nunc pulveris habet quadrulas.
Aetites et fulvus est, et
tereti positione alterum lapidem intrinsecus cohibens: cujus crepitu sonorus
est, quum movetur, quamlibet tinnitum illum non internum scrupulum facere; sed
spiritum scientissimi dicant. Hunc ætitem Zoroastres præfert omnibus, maximamque
illi tribuit potestatem. Invenitur autem in nidis aquilæ, aut in litoribus
Oceani: in Perside tamen plurimus. Subnexus spem uteri defendit a fluxibus
abortivis.
Pyrites fulvus est, tenerique se vehementius non permittit:
ac si quando arctiori manu premitur, digitos adurit. Chalazias grandinis et
candorem præfert et figuram, duritia robustissima et invicta. Echites vipereas
habet maculas. Dionysias fuscus est, rubentibus notis sparsus. Idem si aquæ
mixtus conteratur, vinum fragrat, et, quod in illo odore mirificum est,
ebrietati resistit. Glossopetra deficientibus lunis cúlo cadit, linguæ similis
humanæ, non modicæ, ut magi ferunt, potestatis, qui ex ea lunares motus excitari
putant. Solis gemma percandida est ad speciem fulgidi sideris, rutilosque ex se
jacit radios. Veneris crinis nitet nigro, internis ductibus ostentans ruforum
crinium similitudinem. Selenites translucet fulgore candido melleoque, continens
lunæ imaginem, quam juxta cursum astri ipsius perhibent diebus singulis vel
minui vel augeri. Meconites papavera exprimit. Myrmecites reptantis formicæ
effigie notatur. Chalcophthongos resonat, ut pulsata æra; pudice habitus servat
vocis claritatem. Siderite, a contemplatione ferri nihil dissonat, verum
maleficus quoquo inferatur, discordiam excitat. Phlogites ostentat intra se
quasi flamulas æstuantes. Anthracias coruscat, velut scintillantibus stellis.
Enhydros exsudat, ut clausam in eo putes fontaneam scaturiginem.
XXXIX. Cilicia. In ea Cydnus amnis,
antrum Corycium, mons Taurus.
Ciliciam, qua de agitur, si, ut nunc
est, loquamur, derogasse videbimur fidei vetustatis; si terminos sequimur, quos
habuit olim, absonum est a contemplatione rerum præsentium. Ergo inter utramque
culpam factu optimum est, amborum temporum statum persequi. Cilicia antea usque
Pelusium Ægypti pertinebat, Lydis, Medis, Armeniis, Pamphilia, Cappadocia, sub
imperio Cilicum constitutis; mox ab Assyriis subacta, in breviorem modum scripta
est. Plurima jacet campo, sinu lato recipiens mare Issicum, a tergo montium
Tauri et Amani jugis clausa. A Cilice nomen trahit, quem ætas pristina pæne
ultra ævum memoriæ abscondit. Hunc Phúnice ortum, qui antiquior Jove, de primis
terræ alumnis habetur.
Matrem urbium habet Tarson, quam Danaæ prole,
nobilissima Perseus locavit. Hanc urbem intersecat Cydnus amnis. Hunc Cydnum
alii præcipitari Tauro, alii derivari ex alveo Choaspis, tradiderunt. Qui
Choaspes ita dulcis est, ut Persici reges, quamdiu intra ripas Persidis fluat,
solis sibi ex eo pocula vindicaverint, et quum eundum peregre esset, aquas ejus
secum vectitarent. Ex illo igitur parente Cydnus miram trahit suavitatem.
Quidquid candidum est, illinc homines cydnum dicunt: unde amni huic nomen datum.
Tumet vere, quum liquuntur nives, reliqua parte anni tenuis et quietus.
Circa Corycum Ciliciæ crocum plurimum, optimumque; det licet Sicilia,
det Cyrenæa, det et Lycia, hoc primum est: spirat fragrantius, colore plus aureo
est, succi ope citius proficit ad medelam.
Ibi Corycos oppidum est, et
specus, qui montem impositum mari a summo cavat vertice, patulus hiatu
amplissimo: nam, dejectis lateribus in terræ profundum, nemoroso orbe
amplectitur mediam inanitatem, virens introrsus lucis pendentibus. Descensus in
eum per duo millia et quingentos passus, non sine largo die, hinc inde fontium
assidua scaturigine. Ubi perventum ad ima primi sinus, alter rursus specus
panditur: quod antrum latis primum patet faucibus, postmodum in processu per
angustias obscuratur. In eo sacrum est Jovi, fanum, in cujus recessu intimo
Typhonis gigantis cubile positum, qui volunt, credunt. Heliopolis antiquum
oppidum Ciliciæ fuit, patria Chrysippi stoicæ spientiæ potentissimi; quod a
Tigrane Armenio subactum, et diu solum, Pompeiopolim, devictis Cilicibus, Cn.
Magnus cognominavit.
Mons Taurus ab Indico primo mari surgit; deinde a
scopulis Chelidoniis inter Ægyptium et Pamphylium pelagus objectus septentrioni
dextero latere, lævo meridianæ plagæ, occidenti obversus fronte profusa. Prorsus
palam est, terras eum continuare voluisse penetrato mari, nisi profundis
resistentibus extendere radices suas vetaretur. Denique qui periclitantur
naturas locorum, tentasse eum omnes exitus promontoriis probant: nam quoquorsum
mari alluitur, procedit in prominentias; sed modo intercluditur Phúnicio, modo
Pontico sinu, interdum Caspio vel Hyrcano: quibus renitentibus subinde fractus,
contra Mæoticum lacum flectitur, multisque difficultatibus fatigatus, Riphæis se
jugis annectit. Pro gentium ac linguarum varietate plurifariam nominatus, apud
Indos Imaus, mox Paropamisus, Choatras apud Parthos, post Niphates, inde Taurus;
atque ubi excelsissima consurgit sublimitate, Caucasus. Interea etiam a populis
appellationem trahit: a dextro latere Caspius dicitur vel Hyrcanus, a lævo
Amazonicus, Moschicus, Scythicus; ad hæc, vocabula habet alia multa. Ubi
dehiscit hiulcis jugis, facit portas, quarum primæ sunt Armeniæ, tum Caspiæ,
post Ciliciæ. In Græciam, verticem exserit, ubi Ceraunius prædicatur. A Ciliciæ
finibus Africum limitem dispescit, quantus meridiem videt, sole æstuat; quidquid
septentrioni oppositum est. vento tunditur et pruina; quod silvestris est,
efferatur plurimis bestiis et leonibus immanissimis.
XL. Lycia. In ea mons Chimæra.
Quod in Campania
Vesuvius, in Sicilia Ætna, hoc in Lycia mons Chimæra est. Hic mons nocturnis
æstibus fumidum exhalat. Unde fabula triformis monstri in vulgum data est, quod
Chimæram animal putaverunt. Et quoniam natura ibidem subest ignea, Vulcano urbem
proximam Lycii dicarunt, quam de vocabulo sui nominis Hephæstiam vocant. Olympos
quoque inter alia ibi oppidum fuit nobile, sed intercidit: nunc castellum est,
infra quod aquæ regiæ ob insigne fluoris spectaculo sunt visentibus.
XLI. Asie, Phrygia, Lydia, Teuthrania. In bis de urbe Epheso, de
monte Mimante, de illustribus viris, de Homeri et Hesiodi temporibus, de animali
bonnaco, de sepulcris Ajacis et Memnonis, de Memnoniis avibus, de chamæleonte,
de ciconiis.
Sequitur Asia; sed non eam Asiam loquor, quæ in tertio
orbis divortio terminos amnes habet, ab Ægyptio mari Nilum, a Mæotio lacu
Tanaim: verum eam, quæ a Telmesso Lyciæ incipit, unde etiam Carpathius
auspicatur sinus. Eant igitur Asiam ab oriente Lycia includit et Phrygia, ab
occidente Ægea litora; a meridie mare Ægyptium, Paphlagonia a septentrione.
Ephesos in ea urbs clarissima est: Epheso decus templum Dianæ, Amazonum
fabrica, adeo magnificum, ut Xerxes, quum omnia Asiatica templa igni daret, huic
uni pepercerit; sed hæc Xerxi clementia sacras ædes non diu a malo vindicavit:
namque Herostratus, ut nominis sui memoriam fama sceleris extenderet, incendium
nobilis fabricæ manu sua struxit: sicut ipse fassus est, voto adipiscendæ famæ
latioris. Notatur ergo eadem die conflagravisse templum Ephesi; qua Alexander
Magnus Pellæ natus est. Qui oritur, ut Nepos edidit, M. Fabio Ambusto, Tito
Quintio Capitolino consulibus post Romam conditam anno trecentesimo octogesimo
quinto. Id templum quum postmodum ad cultum augustiorem Ephesii reformarent,
faber operi Dinocrates præfuit: quem Dinocratem Alexandri jussu Alexandriam in
Ægypto præmetatum supra exposuimus.
Nusquam orbe toto tam assiduos terræ
motus, et tam crebras urbium demersiones, quam in Asia esse, cladibus Asiaticis
patuit, quum Tiberio principe urbes duodecim simul una ruina occiderint.
Ingenia Asiatica inclyta per gentes fuere. Pútæ Anacreon inde,
Mimnermus, et Antimachus, deinde Hipponax, deinde Alcæus, inter quos etiam
Sappho mulier; at historiæ conditores, Xanthus, Hecatæus, Herodotus: cum quibus
Ephorus, et. Theopompus. Namque de septem sapientia præditis, Bias, Thales,
Pittacus; Cleanthes, stoicæ eminentissimus; Anaxagoras naturæ indagator;
Heraclitus etiam subtilioris doctrinæ arcanis immoratus.
Asiam excipit
Phrygia, in qua Celæne, quæ antiquato priori nomine in Apamiam transit, oppidum
a rege Seleuco postmodum constitutum. Istic Marsyas ortus, istic et sepultus;
unde qui proximat fluvius, Marsyas dicitur: nam sacrilegi certaminis factum, et
audaces in deum tibias testatur non procul cum fonte vallis, quæ eventum gesta
rei signat, et ab Apamia decem millibus passuum separata, Aulocrene usque adhuc
dicitur.
Ex arce hujusce oppidi Mæander amnis caput tollit, qui
recurrentibus ripis flexuosus inter Cariam et Ioniam præcipitat in sinum, qui
Miletum dividit et Prienam. Ipsa Phrygia Troadi superjecta est, aquilonia parte
Galatiæ collimitanea; meridiana Lycaoniæ, Pisidiæ, Mygdoniæque contermina; eidem
ab oriente vicina Lydiæ; a septentrione Músiæ; Cariæ a parte, qua dies medius
est.
Mons Lydiæ Tmolus croco florentissimus; amnis Pactolus, quem aurato
fluore incitum, aliter et Chrysorrhoan vocant.
In his locis animal
nascitur, quod bonnacum dicunt, cui taurinum caput ac deinceps corpus omne;
tantum juba equina. Cornua autem ita multiplici flexu in se recurrentia, ut si
quis in ea offenderit, non vulneretur. Sed quidquid præsidii monstro illi frons
negat, alvus sufficit: nam quum in fugam vertit, proluvie citi ventris fimum
egerit per longitudinem trium jugerum, cujus ardor quidquid attigerit, amburit.
Ita egerie noxia summovet insequentes.
Miletos Ioniæ caput, Cadmi olim
domus, sed ejus qui primus invenit prosæ orationis disciplinam.
Non
longe Ephesum Colophon civitas, nobilis oraculo Clarii Apollinis.
Unde
haud procul Mimas surgit, cujus vertices de nubilis supervolantibus futuræ
tempestatis significant qualitatem.
Caput Mæoniæ Sypilus excipit,
Tantalis antea dictus, et in illam vocabuli memoriam orbitatibus datus Niobæ.
Smyrnam Meles circumfluit, inter flumina Asiatica facile præcipuus
amnis. Smyrnæos vero campos fluvius Hermus secat, qui ortus a Dorylao Phrygiæ,
Phrygiam scindit a Caria. Hunc quoque Hermam fluctibus aureis æstuasse
antiquitas credidit. Smyrna, unde præcipue nitet, Homero vati patria exstitit,
qui post Ilium captum anno ducentesimo septuagesimo secundo humanis rebus
excessit, Agrippa Sylvio, Tyberini filio, Albæ regnante, anno ante Urbem
conditam centesimo sexagesimo. Inter quem et Hesiodum pútam, qui in auspiciis
olympiadis primæ obiit, centum triginta octo anni medii fuerunt.
In
Rhúteo litore Athenienses et Mitylenæi ad tumulum ducis Thessali Achillion
oppidum condiderunt, quod propemodum interiit; deinde interpositis quadraginta
ferme stadiis, in altero cornu ejusdem litoris ob honorem Salaminis Ajacis
alterum oppidum, cui Æantio datum nomen est, Rhodii exstruxerunt.
At
juxta Ilium Memnonis stat aliud sepulcrum, ad quod sempiterno ex Æthiopia
catervatim aves advolant, quas Ilienses Memnonias vocant. Cremutius auctor est,
has easdem anno quinto in Æthiopia catervatim coire, et undique versum quod
usquam gentium sit, ad regiam Memnonis convenire.
Mediterranea, quæ sunt
supra Troadis partem, Teutrania tenet regio, quæ prima Músorum fuit patria. Hæc
Teutrania perfunditur Caico flumine.
Per omnem Asiam chamæleon plurimus,
animal quadrupes, facie qua lacertæ, nisi crura recta et longiora ventri
jungerentur; prolixa cauda, eademque in vertiginem torta; hamati ungues subtili
aduncitate; incessus piger, et fere idem qui testudinum motus; corpus asperum
squamosa cute, qualem in crocodilis deprehendimus; subducti oculi, et recessu
concavo introrsum recepti, quos nunquam nictatione obnubit. Visum denique non
circumlatis pupillis, sed obtutu rigidi orbis intentat. Hiatus ejus æternus, ac
sine ullius usus ministerio: quippe quum neque cibum capiat, neque potu alatur,
nec alimento alio, quam haustu æris vivat. Color varius, et in momenta
mutabilis, ita ut cuicumque se rei conjunxerit, concolor ei fiat. Colores duo
sunt, quos fingere non valet, rubrus et candidus; ceteros facile mentitur.
Corpus pæne sine carne, vitalia sine liene; nec nisi in corculo pauxillum
sanguinis deprehenditur. Latet hieme, producitur vere. Impetibilis est coraci, a
quo quum interfectus est, victorem suum perimit interemptus: nam si vel modicum
ales ex eo ederit, illico moritur; sed corax quoque habet præsidium ad medelam,
natura manum porrigente: nam quum afflictum se intelligit, sumpta fronde laurea
recuperat sanitatem.
Pythonos Come in Asia locus est campis patentibus,
ubi primo adventus sui tempore ciconiæ advolant, et eam, quæ ultima advenerit,
lancinant universæ. Aves istas ferunt linguas non habere, verum sonum, quo
crepitant, oris potius quam vocis esse. Eximia illis inest pietas: etenim
quantum temporis impenderint fútibus educandis, tantum et ipsæ a pullis suis
invicem aluntur. Ita enim impense nidos fovent, ut incubitus assiduitate plumas
exuant. Noceri eas, omnibus quidem locis nefas ducunt, sed in Thessalia vel
maxime, ubi serpentum immanis copia est, quos dum escandi gratia insectantur,
regionibus Thessalicis plurimum mali detrahunt.
XLII. Galatia.
Galatiam primis seculis priscæ
Gallorum gentes occupaverunt: Tolistobogi, Veturi, et Ambitoti: quæ vocabula
adhuc permanent; quamvis Galatia unde dicta sit, ipso sonat nomine.
XLIII. Bithynia. In ea Hannibalis exitus et sepulcrum.
Bithynia in Ponti exordio ad partem solis orientis adversa Thraciæ,
opulenta ac dives urbium, a fontibus Sangarii fluminis primos fines habet; ante
Bebrycia dicta; deinde Mygdonia; mox a Bithyno rege Bithynia.
In ea
Prusiadem urbem alluit Hylas flumen, et perspergit Hylas lacus, in quo resedisse
credunt delicias Herculis, Hylam puerum, nymphis rapinam: in cujus memoriam
usque adhuc solemni cursitatione lacum populus circumit, et Hylam voce clamant.
In Bithyno quoque agro Lybyssa locus Nicomediæ proximus, sepulcro
Hannibalis famæ datus: qui post Carthaginiense judicium transfuga ad regem
Antiochum, deinde post Antiochum apud Thermopylas pugnantem mala pugna,
fractumque regem fortunæ vicibus, in hospitium Prusiæ devolutus, ne traderetur
Tito Quintio ob hanc causam in Bithyniam misso, captivusque Romam veniret,
veneni mali poculo animam expulit, et ab Romanis se vinculis morte defendit.
XLIV. Aconæ portus el Acherusius specus.
In ora Pontica post Bosphori fauces, et Rhesum amnem, portumque Calpas,
Sagaris fluvius ortus in Phrygia, dictusque a plerisque Sangarius, exordium
facit Maryandini sinus, in quo oppidum Heraclea appositum Lyco flumini; et Acone
portus, qui proventu malorum graminum usque eo celebris est, ut noxias herbas
aconita illinc nominemus. Proximus inde Acherusius specus, quem foraminis cæci
profundo a usque inferna aiunt patere.
XLV.
Paphlagonia, et Venetorum origo.
Paphlagoniam limes a tergo
Galaticus amplectitur. Ea Paphlagonia Carambi promontorio spectat Tauricam,
consurgit Cytoro monte porrecto in spatium passuum trium et sexaginta millium,
insignis loco Heneto: a quo, ut Cornelius Nepos perhibet, Paphlagones in Italiam
transvecti, mox Veneti sunt nominati. Plurimas in ea regione urbes Milesii
condiderunt, Eupatoriam Mithridates: quo subacto a Pompeio, Pompeiopolis est
dicta.
XLVI. Cappadocia. In ea de equis.
Cappadocia gentium universarum, quæ Pontum accolunt, præcipue introrsus
recedit. Latere lævo utrasque Armenias, et Comagenem simul transit; dextro
plurimis Asiæ populis circumfusa. Attollitur ad Tauri juga et solis ortus.
Præterit Lycaoniam, Pisidiam, Ciliciam. Vadit super tractum Syriæ Antiochiæ,
parte regionis alterius in Scythiam pertendens, ab Armenia majore divisa
Euphrate amne: quæ Armenia, unde Parydri montes sunt, auspicatur. Multæ in
Cappadocia urbes inclytæ; verum, ut ab aliis referamus pedem, coloniam
Archelaidem, quam deduxit Claudius Cæsar, Halys præterfluit; Neocæsaream fluvios
Lycus alluit; Melitam Semiramis condidit; Mazacam sub Argæo sitam Cappadoces
matrem habent urbium: qui Argæus nivalibus jugis arduus, ne æstivo quidem
torrente pruinis caret, quemque indidem populi habitari deo credunt.
Terra illa ante alias altrix equorum, et proventui equino
accommodatissima est. Quorum hoc in loco ingenium persequemur: nam equis inesse
judicium documentis plurimis patefactum est, quum jam aliquot inventi sint, qui
nonnisi primos dominos recognoscerent, obliti mansuetudinis, si quando mutassent
consueta servitia. Inimicos partis suæ norunt adeo, ut inter prúlia hostes morsu
petant. Sed illud majus est, quod rectoribus perditis, quos diligebant,
arcessunt fame mortem. Verum hi mores in genere equorum præstantissimo
reperiuntur: nam qui infra nobilitatem sati sunt, nulla documenta sui
præbuerunt.
Sed ne quid videamur dicendi licentia contra fidem
arrogasse, exemplum frequens dabimus.
Alexandri Magni equus Bucephalus
dictus, sive de aspectus torvitate, seu ab insigni, quod taurinum caput armo
inustum gerebat, seu quod de fronte ejus quædam corniculorum protuberabant minæ;
quum ab equario suo alias etiam molliter sederetur, accepto regio stratu neminem
unquam alium præter dominum vehere dignatus est. Documenta ejus in prúliis plura
sunt, quibus Alexandrum e durissimis certaminibus sospitem ope sua extulit: quo
merito effectum, ut defuncto in India exsequias rex duceret, et suprema ornaret
sepulcro; urbem etiam conderet, quam in nominis memoriam Bucephalam nominavit.
Equus C. Cæsaris nullum præter Cæsarem dorso recepit. Cujus primores pedes facie
vestigii humani tradunt fuisse, sicuti ante Veneris Genitricis ædem hac effigie
locatus est. Regem Scytharum, quum singulari certamine interemptum adversarius
victor spoliare vellet, ab equo ejus calcibus morsuque est lancinatus.
Agrigentina etiam regio frequens est equorum sepulcris, quod manus supremorum
meritis datum creditur. Voluptatem his inesse Circi spectacula prodiderunt:
quidam enim equorum cantibus tibiarum, quidam saltationibus, quidam colorum
varietate, nonnulli etiam accensis facibus ad cursus provocantur. Affectum
equinum lacrymæ probant. Denique interfecto Nicomede rege, equus ejus vitam
inedia expulit. Quum prúlio Antiochus Galatas subegisset, Cintareti nomine
ducis, qui in acie ceciderat, equum insiluit ovaturus, isque adeo sprevit
lupatos, ut de industria cernuatus, ruina pariter et se et equitem affligeret.
Ingenia equorum etiam Claudii Cæsaris Circenses probaverunt, quum effuso
rectore, quadrigæ currus æmulos non minus astu quam velocitate præverterent, et
post decursa legitima spatia, ad locum palmæ sponte consisterent, velutque
victoriæ præmium postularent. Excusso quoque auriga, quem Rutumannam nominabant,
relicto certamine ad Capitolium quadriga prosiluit, nec ante substitit,
quamlibet obviis occursibus impedita, quam Tarpeium Jovem terna dextratione
lustraret.
In hujusce animalis genere ætas longior maribus: nam legimus
equum ad usque annos septuaginta vixisse. Jam illud non venit in ambiguum, quod
in annum tertium et tricesimum generant, utpote qui etiam post vicesimum
mittatur ad sobolem reficiendam. Notatum etiam advertimus, Opuntem nomine equum
ad gregariam Venerem durasse in annos quadraginta. Equarum libido exstinguitur
jubis tonsis.
In quarum partu amoris nascitur veneficium, quod frontibus
præferunt recens editi, furvo colore, cicatricis simile, hippomanes nominatum;
quod si præreptum statim fuerit, nequaquam mater pullo ubera præbet felitanda
Quo quis acrior fuerit, speique majoris, eo profundius nares mersitat in
bibendo.
Mas ad bella nunquam producitur apud Scythas, eo quod feminæ
exonerare vesicas etiam in fuga possint. Edunt equæ ex ventis conceptos: sed hi
nunquam ultra triennium ævum trahunt.
XLVII.
Assyria cum Media. In his de unguentorum origine, de arbore Medica.
Assyriorum initium Adiabene facit; in cujus parte Arbelitis regio est:
quem locum victoria Alexandri Magni non sinit præteriri: nam ibi copias Darii
fudit, ipsumque subegit, expugnatisque ejus castris in reliquo apparatu regis
reperit scrinium unguentis refertum, unde primum Romana luxuria fecit ingressum
ad odores peregrinos. Aliquantisper nos tamen virtute veterum ab hac vitiorum
illecebra defensi sumus, atque adeo in censuram Publii Crassi, et Julii Cæsaris:
qui edixerunt anno Urbis conditæ sexcentesimo sexagesimo quinto, ne quis
unguenta inveheret peregrina. Postmodum vicerunt nostra vitia, et senatui adeo
placuit odorum delicia, ut ea etiam in púnalibus tenebris uteretur: sicut L.
Plotium, fratrem L. Planci bis consulis, proscriptum a triumviris, in
Salernitana latebra unguenti odor prodidit.
Hos terrarum ductus excipit
Media, cujus arbor inclaruit etiam carminibus Mantuanis: ingens ipsa, cui tale
ferme, quale unedonibus folium est; tantum eo differt, quod spinosis fastigiis
hispida turgescat. Malum inimicum venenis, sapore aspero, el amaritudinis meræ;
odoris autem fragrantia plus quam jucundum, longeque sensibile. Verum pomorum
illi tanta ubertas inest, ut onere proventus semper gravetur: nam protinus atque
poma ejus deciderunt maturitate, alia protuberant, eaque tantum est opimitati
mora, fútus ut decidant ante nati. Usurpare sibi nemora ista optaverunt et aliæ
nationes per industriam tralati germinis, sed beneficium soli Mediæ datum,
natura resistente terra alia non potuit mutuari.
XLVIII. Portæ Caspiæ.
Caspiæ portæ panduntur·
itinere manu facto, longo octo millibus passuum; nam latitudo vix est, plaustro
permeabilis. In his angustiis etiam illud asperum, quod præcisorum laterum saxa
liquentibus inter se salis venis, exundant humorem affluentissimum, qui
constrictus vi caloris, velut in æstivam glaciem corporatur: ita labes invia
accessum negat. Præterea octo et viginti millium passuum tractus omnis, quoquo
inde pergitur, nullis puteis vel fontibus, sine præsidio sitit: tum serpentes
undique gentium convenæ, a verno statim die illuc confluunt. Ita periculi ac
difficultatis concordia; ad Caspios, nisi hieme, accessus negatur.
XLIX. Direum locus. Margiane regio, et in ea oppida.
A Caspiis ad orientem versus est locus, quod Direum appellatur, cujus
ubertati non est, quod uspiam comparari queat. Hunc circumsident Tapyri,
Narieli, Hyrcani. Proximat ei Margiane regio, inclyta cúli ac soli commodis,
adeo ut in toto illo latifundo vitibus sola gaudeat. In faciem theatralem
montibus clauditur, ambitu stadiorum mille quingentorum, pæne inaccessa ob
incommodum arenosæ solitudinis, quæ per centum et viginti millia passuum undique
versum circumfusa est. Regionis hujus amúnitatem Alexander Magnus usque adeo
miratus est, ut ibi primum Alexandriam conderet: quam mox a barbaris excisam,
Antiochus Seleuci filius reformavit, et de nuncupatione domus suæ dixit
Seleuciam: cujus urbis circuitus diffunditur in stadia quinque et septuaginta.
In hanc Orodes Romanos captos Crassiana clade deduxit. Et aliud in Caspiis
Alexander oppidum excitavit, idque Heraclea dictum, dum manebat, sed hoc quoque
ab iisdem eversum gentibus; deinde ab Antiocho restitutum, ut ille maluit,
Achais postmodum nominatum est.
L. Gentes circum Oxum
amnem. Terminus itinerum Liberi patris et Herculis. Item regiones cum gentibus.
Simul de camelorum natura.
Oxus amnis oritur de lacu Oxo, cujus oras
hinc inde Bateni et Oxistacæ accolunt; sed præcipuam partem Bactri tenent.
Bactris præterea est proprius amnis Bactros; unde et oppidum, quod incolunt,
Bactrum. Gentis hujus quæ pone sunt, Paropamisi jugis ambiuntur; quæ aversa,
Indi fontibus terminantur; reliqua includit Oxus flumen.
Ultra hos Panda
oppidum Sogdianorum, in quorum finibus Alexander Magnus tertiam Alexandriam
condidit, ad contestandos itineris sui terminos. Hic enim locus est, in quo
primum a Libero patre, post ab Hercule, deinde a Semiramide, postremo etiam a
Cyro aræ sunt constitutæ, quod proximum gloriæ omnes duxerint, illo usque
promovisse itineris sui metas.
Universi ejus ductus duntaxat ab illa
terrarum parte Iaxartes fluvius secat fines, quem tamen Iaxartem soli vocant
Bactri: nam Scythæ Silin nominant. Hunc eumdem esse Tanain exercitus Alexandri
Magni crediderunt; verum Demodamas, dux Seleuci, et Antiochi, satis idoneus vero
auctor, transvectus amnem istum, titulos omnium supergressus est, aliumque esse,
quam Tanain, deprehendit. Ob cujus gloriæ insigne dedit nomini suo, ut altaria
ibi statueret Apollini Didymæo. Hoc est collimitium, in quo limes Persicus
Scythis jungitur; quos Scythas Persæ lingua sua Sacas dicunt, et invicem Scythæ
Persas Chorsacos nominant, montemque Caucasum Croucassim, id est nivibus
candidantem. Densissima hic populorum frequentia, cum Parthis legem placiti ab
exordio moris incorrupta custodit disciplina. E quibus celeberrimi sunt
Massagetæ, Essedones Satarchæ et Apalæi. Post quos, immanissimis barbaris
interjacentibus, de ritu aliarum nationum pæne inconstanter definitum
advertimus.
Bactri camelos fortissimos mittunt, licet et Arabia plurimos
gignat. Verum hoc differunt, quod Arabici bina tubera in dorso habent, singula
Bactriani. Hi nunquam pedes atterunt: sunt enim illis reciprocis quibusdam
pulmunculis vestigia carnulenta. Unde et contraria est labes ambulantibus, nullo
favente præsidio ad nisum insistendi. Habentur in duplex ministerium. Sunt alii
oneri ferundo accommodati, a1ii perniciores; sed nec illi ultra justum pondera
recipiunt, nec isti amplius qua solita spatia volunt egredi. Genituræ cupidine
efferantur adeo, ut sæviant, quum Venerem requirunt. Oderunt equinum genus.
Sitim etiam in quatriduum tolerant; verum quum occasio bibendi data est, tantum
implentur, quantum et satiet desideria præterita, et in futurum diu prosit.
Lutulentas aquas captant, puras refugiunt. Denique nisi cúnosior liquor fuerit,
ipsi assidua proculcatione limum excitant, ut turbidetur. Durant in annos
centum, nisi forte tralati in peregrina, insolentia mutati æris morbos trahant.
Ad bella feminæ præparantur, inventumque est ut desiderium ejus coitioni, quadam
castratioue exsecaretur: putant enim fieri validiores, si a coitibus arceantur.
LI. Seres. Item Sericum vellus.
Qua ab
Scythico Oceano, et mari Caspio in oceanum Eoum cursus inflectitur, ab exordio
hujusce plagæ profundæ nives; mox longa deserta; post Anthropophagi, gens
asperrima, dein spatia sævissimis bestiis efferata, ferme dimidiam itineris
partem impenetrabilem reddiderunt. Quarum difficultatum terminum facit jugum
mari imminens, quod Tabim barbari dicunt; post quæ adhuc longinquæ solitudines.
Sic in tractu ejus oræ, quæ spectat æstivum orientem, ultra inhumanos situs
primos hominum Seres cognoscimus, qui aquarum aspergine inundatis frondibus,
vellera arborum adminiculo depectunt liquoris, et lanuginis teneram subtilitatem
humore domant ad obsequium. Hoc illud est Sericum, in usum publicum damno
severitatis admissum, et quo ostendere potius corpora, quam vestire, primo
feminis, nunc etiam viris luxuriæ persuasit libido.
Seres ipsi quidem
mites, et inter se quietissimi, et qui reliquorum mortalium cútus refugiant,
adeo ut ceterarum gentium commercia abnuant. Primum eorum fluvium mercatores
ipsi transeunt, in cujus ripis nullo inter partes linguæ commercio, sed
depositarum rerum pretia oculis æstimantibus sua tradunt, nostra non emunt.
LII. Gens Attacorum.
Sequitur Attacenus
sinus, et gens hominum Attacorum, quibus temperies prærogativa miram æris
clementiam subministrat. Arcent sane afflatum noxium colles, qui salubri
apricitate undique secus objecti prohibent auras pestilentes; atque ideo, ut
Amometus affirmat, par illis et Hyperboreis genus vita est. Inter hos et Indiam
gnarissimi Ciconas locaveruut.
LIII. India. In ea de
ritu hominum et qualitate, de cúli clementia, de natura soli, de serpentibus
Indicis, de leucrocotta bestia, de eale bestia, de tauris Indicis, de mantichora
bestia, de bubus Indicis, de monocerote bestia, de anguillis Gangeticis, de
Gangeticis vermibus, de balæna Indica, de physetere, de ave psittaco, de Indicis
lucis, de ficu Indica, de Indicis arundinibus, de arboribus in insula Indiæ
nascentibus, de piperis arbore, de ebeno, de adamante lapide, de lapide beryllo,
de chrysoberyllo lapide, de chrysopraso lapide, de hyacinthizonte lapide.
Ab Emodis montibus auspicatur India, a Meridiano mari porrecta ad Eo,
favonii spiritu saluberrima. In anno bis æstatem habet, bis legit frugem, vice
hiemis etesias patitur auras. Hanc Posidonius adversam Galliæ statuit. Sane nec
quidquam ex ea dubium: nam Alexandri Magni armis comperta, et aliorum postmodum
regum diligentia peragrata penitus cognitioni nostræ addicta est. Megasthenes
sane apud Indicos reges aliquantisper moratus, res Indicas scripsit, ut fidem,
quam oculis subjecerat, memoriæ daret. Dionysius quoque, qui et ipse a
Philadelpho rege spectator missus est, gratia periclitandæ veritatis, paria
prodidit. Tradunt ergo in India fuisse quinque millia oppidorum præcipua
capacitate, populorum novem millia. Diu etiam credita est tertia pars esse
terrarum. Nec mirum sit, vel de hominum, vel de urbium copia, quum soli Indi
nunquam a natali solo recesserint.
Indiam Liber pater primus ingressus
est, utpote qui Indis subactis omnium primus triumphavit. Ab hoc ad Alexandrum
Magnum numerantur annorum sex millia quadringenti quinquaginta unus, additis et
amplius tribus mensibus, habita per reges computatione, qui centum quinquaginta
tres tenuisse medium ævum deprehenduntur.
Maximi in ea amnes Ganges, et
Indus: quorum Gangen quidam fontibus incertis nasci et Nili modo exsultare
contendunt; alii volunt a Scythicis montibus exoriri. Hypanis etiam ibi
nobilissimus fluvius, qui Alexandri Magni iter terminavit, sicuti aræ in ripa
ejus positæ probant. Minima Gangis latitudo per octo millia passuum, maxima per
viginti patet; altitudo, ubi vadosissimus est, mensuram centum pedum devorat.
Gangarides extimus est lndiæ populus; cujus rex equites mille,
elephantos septingentos, peditum sexaginta millia in apparatu belli habet.
Indorum quidam agros exercent, militiam plurimi, merces alii; optimi
ditissimique rem publicam curant, reddunt judicia, assident regibus. Quietum ibi
eminentissimæ sapientiæ genus est, vita repletos incensis rogis mortem
accersere. Qui vero ferociori sectæ se dediderunt, et silvestrem agunt vitam,
elephantos venantur, quibus perdomitis ad mansuetudinem aut arant, aut vehuntur.
In Gange insula est populosissima, amplissimam continens gentem, quorum
rex peditum quinquaginta millia, equitum quatuor millia in armis habet. Omnes
sane, quicumque præditi sunt regia potestate, non sine maximo elephantorum,
equitum, peditumque numero militarem agitant disciplinam.
Prasia gens
validissima Palibotram urbem incolunt, unde quidem gentem ipsam Palibotros
nominarunt. Quorum rex peditum sexaginta millia, equitum triginta millia,
elephantorum octo millia omnibus diebus ad stipendium vocat. Ultra Palibotram
mons Maleus, in quo umbræ hieme in septentriones, æstate in austros cadunt,
vicissitudine hac durante mensibus senis. Septentriones in eo tractu in anno
semel, nec ultra quindecim dies parent, sicut auctor est Beton, qui perhibet hoc
in plurimis Indiæ locis evenire.
Indo flumini proximantes, versa ad
meridiem plaga, ultra alios torrentur calore; denique vim sideris prodit hominum
color. Montana Pygmæi tenent. At ii, quibus est vicinus Oceanus, sine regibus
degunt. Pandæa gens a feminis regitur, cui reginam primam assignant Herculis
filiam. Et Nysa urbs regioni isti datur. Mons etiam Jovi sacer, Meros nomine, in
cujus specu nutritum Liberum patrem veteres Indi affirmant: ex cujus vocabuli
argumento lascivienti famæ creditur, Liberum patrem femine natum.
Extra
Indi ostium sunt insulæ duæ, Chryse et Argyre, adeo fecundæ copia metallorum, ut
plerique eas aurea sola prodiderint habere et argentea. Indis omnibus promissa
cæsaries, non sine fuco cæruli aut crocei coloris. Cultus præcipuus in gemmis.
Nullus funerum apparatus. Praterea, ut Jubæ et Archelai regum libris editum est
in quantum mores populorum dissonant, habitus quoque discrepantissimus est: alii
lineis, alii laneis peplis vestiuntur, pars nudi, pars obscena tantum amiculati,
plurimi etiam flexibilibus libris circumdati. Quidam populi adeo proceri, ut
elephantos, velut equos, facillima insultatione transiliant. Plurimis placet,
neque animal occidere, neque vesci carnibus. Plerique tantum piscibus aluntur,
et e mari vivunt. Sunt qui proximos parentesque priusquam annis aut ægritudine
in maciem eant, velut hostias cædunt: deinde peremptorum viscera epulas habent,
quod ibi non sceleris sed pietatis loco numerant. Sunt etiam qui, quum incubuere
morbi, procul a ceteris in secreta abeunt, nihil anxie mortem exspectantes.
Astacanorum gens laureis viret silvis, lucis buxeis; vitium vero, et
arborum universarum, quibus gratia dulcis est, proventibus copiosissima.
Philosophos habent Indi, gymnosophistas vocant, qui ab exortu ad usque
solis occasum contentis oculis orbem candentissimi sideris contuentur, in globo
igneo, rimantes secreta quædam, arenisque ferventibus perpetem diem alternis
pedibus insistunt. Ad montem, qui Nulo dicitur, habitant quibus adversæ plantæ
sunt, et octoni digiti in plantis singulis. Megasthenes per diversos Indiæ
montes esse scribit nationes capitibus caninis, armatas unguibus, amictas
vestitu tergorum, ad sermonem humanum nulla voce, sed latratibus tantum
sonantes, asperis rictibus. Apud Ctesiam legitur quasdam feminas ibi semel
parere, natosque canos illico fieri. Esse rursum gentem alteram, quæ in juventa
cana sit, nigrescat in senectute, ultra ævi nostri terminos perennantem. Legimus
monocolos quoque ibi nasci singulis cruribus, et singulari pernicitate; qui ubi
defendi se velint a calore, resupinati plantarum suarum magnitudine inumbrentur.
Gangis fontem qui accolunt, nullius ad escam opis indigi, odore vivunt pomorum
silvestrium, longiusque pergentes eadem illa in præsidio gerunt, ut olfactu
alantur. Quod si tetriorem spiritum forte traxerint, exanimari eos certum est.
Perhibent esse et gentem feminarum, quæ quinquennes concipiant, sed
ultra octavum annum vivendi spatium non protrahunt. Sunt qui cervicibus carent,
et in humeris habent oculos. Sunt qui silvestres, hirti corpora, caninis
dentibus, stridore terrifico. Apud eos vero, quibus ad vivendi rationem exactior
cura est, multæ uxores in ejusdem viri cúunt matrimonium, et, quum maritus
homine decesserit, apud gravissimos judices suam quæque de meritis agunt causam,
et quæ officiosior ceteris sententia judicum vicerit, hoc palmæ refert præmium,
ut arbitratu suo accendat rogum conjugis, et supremis ejus semetipsam det
inferias; ceteræ in nota vivunt.
Enormitas in serpentibus tanta est, ut
cervos et animantium alia ad parem molem tota hauriant; quin etiam oceanum
Indicum, quantus est, penetrent, et insulas magno spatio a continenti separatas
pabulandi petant gratia. Idque ipsum palam est, non qualibet magnitudine
evenire, ut per tantam sali latitudinem ad loca permeent destinata. Sunt illic
multæ ac mirabiles bestiæ, quarum partem persequemur.
Leucrocotta
velocitate præcedit feras universas; ipsa asini feri magnitudine, cervi
clunibus, pectore ac cruribus leoninis, capite melium, bisulca ungula, ore ad
usque aures dehiscente, dentium locis osse perpetuo. Hæc quod ad formam; voce
autem loquentium hominum sonos æmulatur.
Est et eale, ut equus cetera,
cauda vero elephanti, nigro colore, maxillis aprugnis, præferens cornua ultra
cubitalem modum longa, ad obsequium cujus velit motus accommodata: neque enim
rigent, sed moventur, ut usus exigit prúliandi; quorum alterum quo cum pugnat,
protendit, alterum replicat, ut si nisu aliquo fuerit alterius acumen obtusum,
acies succedat alterius. Hippopotamis comparatur; et ipsa sane aquis fluminum
gaudet.
Indicis tauris color fulvus est, volucris pernicitas, pilus in
contrarium versus, hiatus omne quod caput. Hi quoque circumferunt cornua
flexibilitate qua volunt, tergi duritia omne telum respuunt, et tam immiti
ferocitate, ut capti animas projiciant furore.
Mantichora quoque nomine
inter hæc nascitur, triplici dentium versu cúunte ordinibus alternis, facie
hominis, glaucis oculis, sanguineo colore, corpore leonino, cauda veluti
scorpionis aculeo spiculata, voce tam sibila, ut imitetur modulos fistularum,
tubarumque concinentum. Humanas carnes avidissime affectat. Pedibus sic viget,
saltu sic potest, ut morari eam nec extentissima spatia possint, nec obstacula
altissima.
Sunt præterea boves unicornes et tricornes, solidis ungulis
nec bifissis.
Sed atrocissimum est monoceros, monstrum mugitu horrido,
equino corpore, elephanti pedibus, cauda suilla, capite cervino. Cornu e media
fronte ejus protenditur, splendore mirifico, ad longitudinem pedum quatuor, ita
acutum, ut quidquid impetat, facile ictu ejus perforetur. Vivus non venit in
hominum potestatem: et interimi quidem potest, capi non potest.
Aquæ
etiam gignunt miracula non minora. Anguillas ad tricenos pedes longas educat
Ganges; quem Statius Sebosus inter miracula præcipua ait vermibus abundare,
cæruleis nomine et colore. Hi bina habent brachia longitudinis cubitorum non
minus senum, adeo robustis viribus, ut elephantos ad potum ventitantes, mordicus
comprehensos ipsorum manu rapiant in profundum. Indica maria balænas habent
ultra spatia quatuor jugerum; sed et quos physeteras nuncupant, qui enormes
supra molem ingentium columnarum, ultra antennas se navium extollunt, haustosque
fistulis fluctus ita eructant, ut nimbosa alluvie plerumque deprimant alveos
navigantium.
Sola India mittit avem psittacum, colore viridem, torque
puniceo, cujus rostri tanta duritia est, ut quum e sublimi præcipitat in saxum,
nisu se oris excipiat, et quodam quasi fundamento utatur extraordinariæ
firmitatis; caput vero tam valens, ut si quando ad discendum plagis siet
admonendus, nam studet, ut quod homines alloquatur, ferrea clavicula sit
verberandus. Dum in pullo est, atque adeo intra alterum ætatis suæ annum, quæ
monstrata sunt, et citius discit, et retinet tenacius; major pullo, est et
obliviosus, et indocilis. Inter nobiles et ignobiles discretionem digitorum
facit numerus; qui præstant, quinos in pedes habent digitos, ceteri ternos;
lingua lata, multoque latior quam ceteris avibus: unde perficitur ut articulata
verba penitus eloquatur. Quod ingenium ita Romæ deliciæ miratæ sunt, ut barbaris
psittacos mercem fecerint.
Indorum nemora in tam proceram sublimantur
excelsitatem, ut transjaci ne sagittis quidem possint. Pomaria ficus habent,
quarum codices in orbem spatio sexaginta passuum extuberantur; ramorum umbræ
ambitu bina stadia consumunt; foliorum latitudo forma; Amazonicæ peltæ
comparatur; pomum eximiæ suavitatis. Quæ palustria sunt, arundinem creant ita
crassam, ut fissis internodiis, lembi vice vectitet navigantes. E radicibus ejus
exprimitur humor dulcis ad melleam suavitatem. Tylos Indiæ insula est; ea fert
palmas, oleam creat, vinis abundat. Terras omnes hoc miraculo sola vincit, quod
quæcumque in ea arbos nascitur, nunquam caret folio. Mons Caucasus inde incipit,
qui maximam orbis partem perpetuis jugis penetrat. Idem fronte, qua soli
obversus est, arbores piperis ostentat, quas ad juniperi similitudinem diversos
fructus edere asseverant. Eorum, qui primus erumpit, velut corylorum fimbria,
dicitur piper longum; qui deinde caducus torretur fervido sole, vocamen trahit
de colore; at qui ex ipsa arbore stringitur, ut est, album piper dicitur. Sed,
ut piper sola India, ita et ebenum sola mittit, nec tamen universa, verum exigua
sui parte silvas hoc genus edit. Arbor est plerumque tenuis, et frequentior
vimine, raro in crassitudinem caudicis extuberatur, hiulco cortice et admodum
reticulato, dehiscentibus venis, adeo ut per ipsos sinus pars intima vix tenui
libro contegatur; lignum omne atque mediale eadem ferme et facie et nitore, qui
est in lapide gagate. Indi reges ex eo sceptra summunt, et quascumque deorum
imagines nonnisi ex ebeno habent. Idem ferunt, materia ista liquorem noxium non
contineri, et quidquid maleficum fuerit, tactu ejus averti: hac gratia pocula ex
ebeno habent. Ita nihil mirum, si peregre sit in pretio, quod etiam ipsi, quibus
provenit, honorantur. Ebenum Romæ Mithridatico triumpho primum Magnus Pompeius
exhibuit. Mittit India et calamos odoratos, potentes adversum intestinæ
ægritudinis incommoda; dat et multa alia fragrantia mirifici spiritus suavitate.
Indicorum lapidum in adamantibus dignitas prima, utpote qui lymphationes
abigunt, venenis resistunt, et pavitantium vanos metus pellunt. Hæc primum de
iis prædicari oportuit, quæ respicere ad utilitatem videbamus; nunc reddemus quæ
adamantum sint species, et quis colos cuique eximius. In quodam crystalli genere
invenitur, materiæ in qua nascitur adæque similis splendore liquidissimo, in
mucronem sexangulum utrinque secus leniter turbinatus, nec unquam ultra
magnitudinem nuclei avellanæ repertus. Huic proximus in excellentissimo auro
deprehenditur, pallidior, ac magis ad argenti colorem renitens. Tertius in venis
cupri apparet, propior ad æream faciem. Quartus in metallis ferrariis legitur,
pondere ceteros antecedens, non tamen et potestate: nam et hi, et qui in cupro
deprehenduntur, frangi queunt, plerique etiam adamante altero perforantur; at
illi, quos primos significavimus, nec ferro vincuntur nec igne domantur. Verum
tamen, si diu in sanguine hircino macerentur, non aliter, quam si calido vel
recenti, malleis aliquot ante fractis, et incudibus dissipatis, aliquando
cedunt, atque in particulas dissiliunt; quæ fragmenta scalptoribus in usum
insigniendæ cujuscumque modi gemmæ expetuntur. Inter adamantem et magnetem est
quædam naturæ occulta dissensio, adeo ut juxta positus non sinat magnetem capere
ferrum; vel, si admotus magnes ferrum traxerit, quasi prædam quamdam adamas
magneti rapiat, atque auferat.
Lychnitem perinde fert India, cujus lucis
vigorem ardor excitat lucernarum: qua ex causa lychniten Græci vocaverunt.
Duplex ei facies: aut enim purpurea emicat claritate, aut meracius suffunditur
cocci rubore, per omne intimum sui, siquidem pura sit, inoffensam admittens
perspicuitatem; at si excanduit rediis solis incita, vel ad calorem digitorum
attritu excitata est, aut palearum cassa, aut chartarum fila ad se rapit,
contumaciter scalpturis resistens; ac si quando insignita est, dum signa
exprimit, quasi quodam animali morsu partem ceræ retentat. Beryllos in
sexangulas formas Indi atterunt, ut hebetem coloris lenitatem angulorum
repercussu excitent ad vigorem. Beryllorum genus dividitur in speciem
multifariam; eximii intervirente glauci et cæruli temperamento, quamdam
præferunt puri maris gratiam. Infra hos sunt chrysoberylli, qui languidius
micantes nube aurea circumfunduntur. Chrysoprasos quoque ex auro et porraceo
mixtam lucem trahentes, æque beryllorum generi adjudicaverunt. Hyacinthizontas,
scilicet qui hyacinthos prope referant, et ipsos probent; eos vero, qui
crystallo similes, capillamentis intercurrentibus obscurantur (hoc enim vitio
illorum nomen est) scientissimi lapidum plebi dederunt. Indici reges hoc genus
gemmas in longissimos cylindros amant fingere, eosque perforatos elephantorum
setis suspendunt, ac monilia habent, aut ex utroque capite inserunt aureos
umbilicos, ut marcentem faciem ad nitelam incendant pinguiorem, quo per
industriam metallo hinc inde addito fulgentiorem trahant lucem.
LIV. Taprobane. In ea de qualitate hominum, de sideribus, de
natura maris, et nationis disciplina, de testudinum magnitudine, de
margarito.
Taprobanem insulam, antequam temeritas humana exquisito
penitus mari fidem panderet, diu orbem alterum putaverunt, et quidem eum, quem
habitare antichthones crederentur. Verum Alexandri Magni virtus ignorantiam
publici erroris exstinxit, dum in hæc usque secreta propagavit nominis sui
gloriam. Missus igitur Onesicritos, præfectus classi Macedonicæ, terram istam,
quanta esset, quid gigneret, quomodo haberetur, exquisitam notitiæ nostræ dedit.
Patet in longitudinem stadium septem millia, in latitudinem quinque millia.
Scinditur amni interfluo. Nam pars ejus bestiis et elephantis repleta est,
majoribus multo, quam fert India; partem homines tenent. Margaritis scatet, et
gemmis. Sita est inter ortum et occasum. Ab Eoo mari incipit, prætenta Indiæ. A
Prasia Indorum gente, dierum viginti primo in eam fuit cursus, sed hoc cum
papyraceis et Nili navibus illo pergeretur: mox navibus nostris septem dierum
iter factum est. Mare vadosum interjacet altitudinis non amplius senum passuum,
certis autem canalibus depressum adeo, ut nullæ unquam ancoræ ad profundi illius
ima potuerint pervenire. Nulla in navigando siderum observatio: nam neque
Septentriones illic conspiciuntur, nec Vergiliæ apparent. Lanam ab octava in
sextam decimam tantum supra terram vident. Lucet ibi Canopos, sidus clarum et
amplissimum. Solem orientem dextera habent, occidentem sinistra. Observatione
itaque navigandi nulla suppetente, ut ad destinatum pergentes locum capiant,
vehunt alites, quarum meatus terram petentium, magistros habent regendi cursus.
Quaternis non amplius mensibus in anno navigatur.
Ad usque Claudii
principatum de Taprobane hæc tantum noveramus: tunc enim fortuna patefecit
scientiæ viam latiorem. Nam libertus Annii Plocami, qui tunc Rubri maris
vectigal administrabat, Arabiam petens, aquilonibus præter Carmaniam raptus,
quinto decimo demum die appulsus est ad hoc litus, portumque invectus, qui
Hippuros nominatur. Sex deinde mensibus sermonem perdoctus, ductusque ad
colloquia regis, quæ compererat, reportavit. Stupuisse scilicet regem, pecuniam,
quæ capta cum ipso erat, quod tametsi signata disparibus foret vultibus, parem
tamen haberet modum ponderis; cujus æqualitatis contemplatione, quum Romanam
amicitiam flagrantius concupivisset, Rachia principe legatos nos adusque
transmisit, a quibus cognita sunt universa.
Ergo inde homines corporum
magnitudine alios omnes antecedunt; crines fuco imbuunt, cæruleis oculis ac
truci visu, terrifico sono vocis. Quibus immatura mors est, in annos centum ævum
trahunt; aliis omnibus annosa ætas, et extenta pæne ultra humanam fragilitatem.
Nullus aut ante diem, aut per diem somnus; noctis partem quieti destinant; lucis
ortum vigilia antevertunt. Ædificia modica ab humo tollunt. Annona pari semper
tenore. Vites nesciunt; pomis abundant. Colunt Herculem. In regis electione non
nobilitas prævalet, sed suffragium universorum. Populus eligit spectatum
moribus, et inveteratæ clementiæ, annis etiam gravem. Sed hoc in eo quæritur,
cui liberi nulli sint: nam qui pater sit, etiamsi vita spectetur, non admittitur
ad regendum; et si forte, dum regnat, sobolem velit edere, exuit potestatem.
Idque eo maxime custoditur, ne fiat hereditarium regnum. Deinde etiamsi rex
maximam præferat æquitatem, nolunt ei totum licere; quadraginta ergo rectores
accipit, ne in causis capitum solus judicet; et sic quoque, si displicuerit
judicatum, ad populum provocatur: a quo datis judicibus septuaginta fertur
sententia, cui necessario acquiescitur. Cultu rex dissimilis a ceteris vestitur
syrmate, ut est habitus, quo Liberum patrem amiciri videmus. Quod si etiam ipse
in peccato aliquo arguitur, morte multatur; non tamen ut cujusquam attrectetur
manu, sed consensu publico rerum omnium interdicitur ei facultas; etiam
colloquii potestas punito negatur. Culturæ student universi. Interdum venatibus
indulgent, nec plebeias agunt prædas, quippe quum tigres aut elephanti tantum
requirantur.
Maria quoque sagacissime expiscantur: marinas testudines
capere gaudent, quarum tanta est magnitudo, ut superficies earum domum faciat,
et numerosam familiam non arte receptet. Major pars hujus insulæ calore ambusta
est, et in vastas desinit solitudines. Latus ejus mare alluit perviridi colore
fruticosum, ita ut jubæ arborum plerumque gubernaculis atterantur. Cernunt latus
Sericum de montium suorum jugis. Mirantur aurum, et ad gratiam poculorum omnium
gemmarum adhibent apparatum. Secant marmora testudinea varietate.
Margaritas legunt plurimas, maximasque; conchæ sunt, in quibus
reperiuntur, quæ certo anni tempore, luxuriante conceptu, sitiunt rorem velut
maritum, cujus desiderio hiant; et quum maxime lunares liquuntur aspergines,
oscitatione quadam hauriunt humorem cupitum; sic concipiunt, gravidæque fiunt,
et de saginæ qualitate reddunt habitus unionum: nam si purum fuit, quod
acceperant, candicant orbiculi lapillorum; si turbidum, aut pallore languescunt,
aut rufo innubilantur. Ita magis de cúlo, quam de mari partus habent. Denique
quoties excipiunt matutini æris semen, fit clarior margarita; quoties vespere,
fit obscurior; quantoque magis hauserit, tanto magis proficit lapidum magnitudo.
Si repente micaverit coruscatio, intempestivo metu comprimuntur, Clausæque
subita formidine vitia contrahunt abortiva; aut enim perparvuli fiunt scrupuli,
aut inanes. Conchis ipsis inest sensus: partus suos maculari timent; quumque
flagrantioribus radiis excanduit dies, ne fucentur lapidis solis calore,
subsidunt in profundum, et se gurgitibus ab æstu vindicant. Huic tamen
providentia: ætas opitulatur: nam candor senecta disperit, et grandescentibus
conchis flavescunt margaritæ. Lapis iste in aqua mollis est, duratur
evisceratus. Nunquam duo simul reperiuntur: unde unionibus nomen datum. Ultra
semunciales inventos negant. Piscantium insidias timent conchæ: inde est, ut aut
inter scopulos, aut inter marinos canes plurimum delitescant. Gregatim natant;
certa examini dux est; illa si capta sit, etiam qua evaserint, in plagas
revertuntur. Dat et India margaritas, dat et litus Britannicum; sicut divus
Julius thoracem, quem Veneri Genitrici in templum ejus dicavit, ex Britannicis
margaritis factum, subjecta inscriptione testatus est. Lolliam Paullinam Caii
principis conjugem vulgatum est habuisse tunicam ex margaritis, sestertio tunc
quadringenties æstimatam: cujus parandæ avaritiæ pater ipsius M. Lollius,
spoliatis orientis regionibus, offendi speravit Caium Cæsarem Augusti filium,
interdictaque amicitia principis, veneno interiit. Illud quoque expressit vetus
diligentia, quod Sullanis primam temporibus Romam illati sunt uniones.
LV. Itinerarium Indicum. Sinus Persicus et Arabicus.
Azanium mare.
Ab insulensi, ut consequens est, ad continentem.
Igitur a Taprobane in Indiam revertamur: convenit enim res Indicas videre. Sed
si in his aut urbibus aut nationibus resistamus, egrediemur repromissæ
concinnitatis modum. Proximam Indo flumini urbem habuere Caphusam, quam Cyrus
diruit. Arachosiam Erumando amni impositam Semiramis condidit. Cadrusia oppidum
ab Alexandro Magno ad Caucasum constitutum est, ubi et Alexandria, quæ patet
amplitudinis stadia triginta. Multa et alia sunt, sed hæc cum eminentissimis.
Post Indos, montanas regiones Ichthyophagi tenent, quos subactos
Alexander Magnus in reliquum abstinere jussit a piscibus: nam antea sic
alebantur.
Ultra hos deserta Carmaniæ, Persis deinde, atque inde
navigatio: in qua Solis insula rubens semper, et omni animantium generi
inaccessa, quippe quæ nullum non animal illatum necet. Ex India revertentes ab
Azario Carmaniæ flumine Septentriones primum vident. Achæmenides in hoc tractu
sedes fecerunt. Inter Carmaniæ promontorium et Arabiam quinquaginta millia
passuum interjacent; deinde tres insulæ, circa quas hydri marini egrediuntur
vicenum cubitum longitudinem.
Dicendum hoc loco, quatenus ab Alexandria
Ægypti pergatur in usque Indiam. Nilo vehente Copton usque etesiis flatibus
cursus est; deinde terrestre iter Hydreum tenus; post, transactis aliquot
mansionibus, Berenicen pervenitur, ubi Rubri maris portus est. Inde Occlis
Arabiæ portus tangitur. Proximum Indiæ emporium excipit Zmirim infame piraticis
latronibus. Deinde per diversos portus Cottonare pervenitur, ad quam monoxylis
lintribus piper convehunt. Petentes Indiam, ante exortum canis, aut protinus
post exortum, navigia media æstate solvunt. Revertentes navigant decembri mense.
Secundus ex India ventus est vulturnus; at quum ventum est in Rubrum mare, aut
africus, aut auster vehunt. Spatium Indiæ decies septies quinquaginta millia
passuum proditur; ac Carmaniæ centum millia, cujus pars non caret vitibus.
Præterea habet genus hominum, qui non alia, quam testudinis carne vivunt,
hirsuti omnia facie tenus, quæ sola lævis est. Idem coriis, piscium vestiuntur,
Chelonophagi cognominati.
Irrumpit hæc litora Rubrum mare, idque in duos
sinus scinditur: quorum qui ab oriente est, Persicus appellatur, quandoquidem
oram illam habitavere Persidis populi, vicies et sexagies centena millia passuum
circuitu patens; ex adverso, unde Arabia est, alter Arabicus vocatur; Oceanum
vero, qui ibi influit, Azanium nominarunt.
Carmaniæ Persis annectitur,
quæ incipit ab insula Aphrodisiæ variarum opum dives, translata quondam in
Parthicum nomen, litore, quo occasui objacet, porrecta millia passuum quingenta
quinquaginta. Oppidum ejus nobilissimum Susa, in quo templum Susia Dianæ. A
Susis Babytace oppidum centum et triginta quinque millibus passuum distat, in
quo mortales universi odio auri cúmunt hoc genus metallum, et abjiciunt in
terrarum profunda, ne polluti usu ejus avaritia corrumpant æquitatem. Hic
inconstantissimus est mensurarum modus; nec immerito, quum aliæ circa Persidem
nationes schúnis, aliæ parasangis, aliæ incomperta disciplina terras metiantur,
et incertam fidem faciat mensuræ ratio discors.
LVI.
Parthia et circa Parthiam regiones. Item Cyri sepulcrum.
Parthia
quanta omnis est, a meridie Rubrum mare, a septentrione Hyrcanum salum claudit.
In ea regna duodeviginti dividuntur in duas partes. Undecim, quæ vocantur
superiora, incipiunt ab Armenico limite, et Caspio litore, porrecta ad terras
Scytharum, quibuscum concorditer degunt; reliqua septem inferiora, sic enim
vocitant, habent ab ortu Arios Arianosque, Carmaniam a medio die, Medos ab
occidui solis plaga, a septentrione Hyrcanos. Ipsa autem Media ab occasu
transversa, utraque Parthiæ regna amplectitur; a septentrione Armenia
circumdatur; ab ortu Caspios videt; a meridie Persidem. Deinde tractus hic
procedit usque ad castellum, quod Magi obtinent, Passargada nomine. Hic Cyri
sepulcrum.
LVII. Babylon. Deinde recursus ad oceanum
Atlanticum: in eo insulæ Gorgades, Hesperides, Fortanatæ.
Chaldææ
genti caput Babylon, Semiramidi condita, tam nobilis, ut propter eam et Assyrii
et Mesopotamia in Babyloniæ nomen transierint. Urbs est sexaginta millia passuum
circuitu patens, muris circumdata, quorum altitudo ducentos pedes detinet,
latitudo quinquaginta, in singulos pedes ternis digitis ultra quam mensura
nostra est altioribus. Amni interluitur Euphrate. Beli ibi Jovis templum, quem
inventorem cúlestis disciplinæ tradidit etiam ipsa religio, quæ deum credit. In
æmulationem urbis hujus Ctesiphontem Parthi condiderunt.
Tempus est ad
Oceani oras reverti, represso in Æthiopiam stilo: namque ut Atlanticos æstus
occipere ab occidente et Hispania dudum dixeramus; ab his quoque partibus mundi,
unde primum Atlantici nomen induat, exprimi par est. Pelagus Azanium usque ad
Æthiopum litora promovetur. Æthiopicum ad Mossylicum promontorium; inde rursus
oceanus Atlanticus. Juba igitur universæ partis, quam plurimi propter solis
ardorem perviam negaverunt, facta etiam, vel gentium, vel insularum
commemoratione ad firmandæ fidei argumentum, omne illud mare ab India ad usque
Gades voluit intelligi navigabile, cori tamen flatibus; cujus spiritus præter
Arabiam, Ægyptum, Mauritaniam, evehere quamvis queant classem, dummodo ab eo
promontorio Indiæ cursus dirigatur, quod alii Lepten Acran, alii Drepanum
nominaverunt. Addidit et loca stationum, et spatiorum modum: nam ab Indica
prominentia ad Malichu insulam affirmat esse quindecies centena millia passuum:
a Malichu ad Sceneon ducenta et viginti quinque millia; inde ad insulam Adanu
centum quinquaginta millia: sic confici ad apertum mare decies octies centena et
septuaginta quinque millia. Idem opinioni plurimorum, qui ob solis flagrantiam,
maximam partis istius regionem ferunt humano generi inaccesam, sic reluctatur,
ut mercantium ibi transitus infestari ex Arabicis insulis dicat: quas Ascitæ
habent Arabes, quibus e re nata datum nomen: nam bubulis utribus contabulatas
crates superponunt, vectatique hoc ratis genere prætereuntes infestant sagittis
venenatis. Habitari etiam addit Æthiopiæ adusta Troglodytarum et Ichthyophagorum
nationibus; quorum Troglodytæ tanta pernicitate pollent, ut feras, quas agitant,
cursu pedum assequantur; Ichthyophagi non secus, quam marina belluæ, nando in
mari valent. Ita exquisito Atlantico mari usque in occasum, etiam Gorgadum
meminit insularum.
Gorgades insulæ, ut accepimus, obversæ sunt
promontorio, quod vocamus Hesperuceras. Has incoluerunt Gorgones monstra, et
sane usque adhuc monstrosa gens habitat. Distant a continenti bidui navigatione.
Prodidit denique Xenophon Lampsacenus, Hannonem Púnorum regem in eas
permeavisse, repertasque ibi feminas aliti pernicitate, atque ex omnibus, quæ
apparuerant, duas captas tam hirto atque aspero corpore, ut ad argumentum
spectandæ rei duarum cutes miraculi gratia inter donaria Junonis suspenderit;
quæ duravere usque in tempora excidii Carthaginiensis.
Ultra Gorgadas
Hesperidum insulæ, sicut Sebosus affirmat, dierum quadraginta navigatione in
intimos maris sinus recesserunt.
Fortunatas insulas certe contra
lævam Mauritaniæ tradunt jacere, quas Juba sub meridie quidem sitas, sed
proximas occasui dicit. De harum nominibus exspectari magna non miror, sed infra
famam vocabuli res est. In prima earum, cui nomen Norion, ædificia nec sunt, nec
fuerunt. Juga montium stagnis madescunt. Ferulæ ibi surgunt ad arboris
magnitudinem: earum, quæ nigræ sunt, expressæ liquorem reddunt amarissimum; quæ
candidæ, aquas revomunt etiam potui accommodatas. Alteram insulam Junoniam
appellari ferunt, in qua pauxilla ædes ignobiliter ad culmen fastigata. Tertia
huic proximat eodem nomine, nuda omnia. Quarta Capraria appellatur, enormibus
lacertis plus quam referta. Sequitur Nivaria nebuloso ære, et coacto, ac
propterea semper nivalis. Deinde Canaria repleta canibus forma eminentissimis:
inde etiam duo exhibiti Jubæ regi. In ea ædificiorum durant vestigia. Avium
magna copia, nemora pomifera, palmeta caryotas feritantia, multa nux pinea,
larga mellatio, amnes siluris piscibus abundantes. Perhibent etiam exspui in eam
undoso mari belluas; deinde quum monstra illa putredine tabefacta sunt, omnia
illic infici tetro odore; ideoque non penitus ad nuncupationem sui congruere
insularum qualitatem.
Copyright (c) 2004 Acolat Tous droits réservés. delphine.acolat@tiscali.fr
|